Juges 9 - Ma Zhiklè

Ta fi Abimélec a bai

¹ Abimélec, kra Jerubbaal, a ndo Sichem, a sam kramammamhi na, a ngaɗa ta, a ngaɗa ta gwoli mam na tèlèba:

² Vo-dzhoɗo a sam ndohi Sichem tèlèba: Ambaha kinè mè? Ndohi 70, wudahi Jerubbaal 70 tèlèba, ta gi bi a géɗ kinè dè, mʼmbela ndo stadgenè dè? Va-huro, i zluèɗ va kinè, i zluzlor kinè.

³ A kramamhi na ta ngreda ta ma haha a ndohi Sichem. A ta hera na gèɗ a Abimélec, te man ta goɗ te ndav ta: Nengaʼa kramam nga!

⁴ A ta hul Suli 70.000 te gi Zhiklè Baal mbiaʼa a Abimélec a mpar ta nder-kèzhè ndohai a fali ndohai a vna, a verzi na.

⁵ Te deɓaʼa a mdo a gi bab na, te Ophra, a mbazl ta kramamhi na, wudahi Jerubbaal 70 a géɗ pra staɗ. Njèkè Jotham, ntabaw Jerubbaal, te man a nʼnghede va na.

⁶ A ndohi Sichem tèlèba a ndohi Millo ta ɓicko va a ta fu Abimélec a bai te verzi mbrom man kwa nzlatseda a pa, te Sichem.

Tsaval Jotham

⁷ Ndo ngiɗè a nʼngra na Jotham. A nengaʼa a mdo a géɗ za Garizim, a mboho, a ngaɗa ta: Kinè ndohi Sichem, va-tsena ma ga! Bi-Zhiklè da tsena ma kinè!

⁸ Wofhi nhayaʼa ta woy ngi a bi te va staɗ, a ta goɗ a wof tsna: gau a bi nga!

⁹ Wof tsna a ngaɗa ta: I jèkeda ngi mbar ga, man ta va na Zhiklè, mbar ga man ndohi ta til va ta a vna, a i da gi bi a géɗ wofhi dè?

¹⁰ Te deɓaʼa wofhi ta gaɗa na wof kslor: Washkè, gau a bi nga!

¹¹ Wof kslor a ngaɗa ta: I jèkeda njén ga, a nyi ga mbelaʼa a i da gi bi a géɗ wofhi dè?

¹² Te deɓaʼa wofhi ta gaɗa na wof tondoz: Washkè, gau a bi nga!

¹³ Wof tondoz a ngaɗa ta: I jèkeda iyam-nyi wof ga man a wuffèdè ndav zhiklèhai a ndav ndohai, a i da gi bi a géɗ wofhi dè?

¹⁴ Te deɓaʼa wofhi tèlèba ta gaɗa na vatak wondar: Washkè, gau a bi nga!

¹⁵ Vatak wondar a ngaɗa ta wofhai: Aman a vava kin woy a kin fiyè a bai, a i gi bi a géɗ kinè, vo-washkè, va-nza a hwaɗ mèzhèɓ ga! Man ɓai vogwa a da shkè auda te vatak, a da ndi wof, ha ndè a wof ɗawai te Liban tèlèba.

¹⁶ A patsna kin fu Abimélec a bai, kin gau skwi nzuraʼa a di na dè? Te skwi haha, kin ga ta skwi man amba a Jerubbaal a ndohi gi nengaʼa dè? Kin gau a sam na ara man a nʼnga kinè dè?

¹⁷ Bab ga a ngu var a géɗ kinè, a mhur nshèffè na ɓai, a mʼmbelka kinè auda te ri ndohi Madian.

¹⁸ Kinè a patsna kin gra gèɗ kinè a sam ndohi gi bab ga, kin bazl ta wudahi nengaʼa, ndohi 70, a géɗ pra staɗ. Te deɓaʼa kin feda Abimélec, kra man a myu tʼhwaɗ ɓèl na, a bai a géɗ ndohi Sichem, a géɗ man nengaʼa kramam kinè.

¹⁹ Aman skwi man kin gau a patsna a haha, skwi nzuraʼa a nlèɓèslèa a sam Jerubbaal, a ndohi gi nengaʼa a vava, va-wuffa a géɗ Abimélec mènè, a nengaʼa da wuffa a géɗ kinè mènè!

²⁰ Man ɓai, vogwa da shkè auda te Abimélec, da ndeda ndohi Sichem a ndohi Millo a ma. Vogwa da shkè auda te ndohi Sichem a ndoh Millo, da ndeda Abimélec a ma!

²¹ A Jotham a m wuc na auda a sam kramam na a mhu na a kokwar Beer, a nʼnza a pa.

Abimélec ngedas na

²² Abimélec a ngu bi a géɗ Israel mvi makar.

²³ Te deɓaʼa Bi-Zhiklè a nzlündo mèzhèɓ ambaɓiaʼa, a mpa ta gèɗ a va a Abimélec a ndohi Sichem, a ndohi Sichem ta fi gèɗ a ma Abimélec asaɓai.

²⁴ A mali man a mbazla wuda Jerubbaal a nʼngwoda na va a gèɗ a Abimélec, a Sichem, man ta takaha te pa.

²⁵ Ndohi Sichem a ta pu zliagai a géɗ za, ndohi metsarhai, man ta helama ta skwi a ndawa ndawa man a mbeza a civèdèʼa. A ndo ngiɗè a nʼngra na Abimélec.

²⁶ Gaal, kra Ebed, a mshkè a nda kramamhi nengaʼa, a ta gu gi te Sichem, a ndohi Sichem ta gsa ndav ta a vna.

²⁷ Pats ngiɗè to do a gi lak, a ta por nyi wof, a ta kèlè te klok, a ta gu ngolala. Ta shkè a gi zhiklèhi tengaʼa, ta ndau skwai, ta sau skwai, a ta durɗo Abimélec.

²⁸ Gaal, kra Ebed, a ngaɗa: Abimélec wa? Ndohi Sichem wa, a nga gi ɓèl tengaʼa ɗè? Kra Jerubbaal ka ɓi ɗè? Zebul bigol nengaʼa ka ɓi ɗè? Ta gu ɓèl ndohi Hamor, bab Sichem ka ɗi ɗè? A nga, nga gi ɓèl na ɗè?

²⁹ Dara man iyè, i gi bi kinè! Aman agassa i bi kinè, ar i zede bi Abimélec a i gaɗa na: Ɓickoɗi ndohi var ngaya, a ka poko na ndohi a vaʼa, a ka shkè dai!

³⁰ A Zebul, nsal ndo kokwar, a ntsena ma Gaal, kra Ebed, a ngi ndav kumba.

³¹ A nzlündo ndohi sak a sam Abimélec a metsar, aman a hada na: Gaal, kra Ebed, a kramamhi na ta shkè a kokwar Sichem, a ta poko ta gèɗ auda a ndohi kokwar, a ta vhè ma a gèɗ a ka.

³² Anai slambaɗa, a vaɗ, a nda ndohi ngaya, peda zliagai a deɓ ta te dak.

³³ A prèk te gai, aman pats a shkè auda, ngezla na va a kokwar! Aman a da hakaɗauda a nda ndohai, a ta da gi var a kinè, gu genè, ka da rkaʼa!

³⁴ A Abimélec a nslambaɗa a vaɗ, a nda ndohi tèlèba man ta zhè a sam na. Ta pu nzliagai te deɓa fad, a tsagi kokwar Sichem.

³⁵ Gaal, kra Ebed, a mshkè auda, a nzlatsa a ntamagi kokwar. Abimélec a ndohi nengaʼa ta haka fe deɓa.

³⁶ Gaal a nrka ta ndohai, a ngaɗa na Zebul: Na haha ndohi ngiɗè ta shkèhi te za! Aman Zebul a ngaɗa na: Ka rka mèzhèɓ za genè ɓi ba ka, ndohi ka ɓai.

³⁷ Gaal a ngaɗa na genè: Ka rka ndohi man ta shkè te civèɗ za ka ɓi ɗè, ndohi ngiɗè ta shkè te civèɗ gi mblom!

³⁸ Te deɓaʼa Zebul a ngaɗa na: A géɗ mpilèɗ ma ngaya man ka gaɗa: Abimélec wa, nga gi ɓèl nengaʼa èhèmè, nana skwa kalka ma! Ndohi man ka derde ta ta haka ma! Do a ma var mènè!

³⁹ A Gaal a mdo a ma ndohi kokwar Sichem, a ngu var a Abimélec.

⁴⁰ Aman Abimélec a mhu a verzi Gaal, a Gaal a mhu na a Abimélec. Ta kumba man ta bazl ta, ha ndè a ntamagi kokwar.

⁴¹ Te deɓaʼa Abimélec a nʼnza te kokwar Aruma. Zebul a ndzam ta ndohi Gaal a kramamhi nengaʼa, ta slaha ta nza a kokwar Sichem asaɓai.

⁴² Te mangoslèmaʼa, ndohi to do dak, a ndo ngiɗè a nʼngra na Abimélec.

⁴³ A nengaʼa a mɓic ta ndohi na, a mpa ta a mogoɓ ngiɗè makar, a mpu nzliagai te deɓa te dak. Aman a nrka, ndohi ta shkè auda te kokwar, a nkala ta a va, a mbazl ta.

⁴⁴ Abimélec a ndohi mogoɓ nengaʼa ta hakaɗai a ta haya va a ntamagi kokwar. Mogoɓ ngiɗè cèw ta hu a verzi ndohi a dak, a ta bazl ta.

⁴⁵ Abimélec a vak a va var a pats sa lèk-lèk, a nduma kokwar, a mbazl ta ndohi nte pa, a ngedassa kokwar, a nkuteda skwi ngiɗè ara boma a pa.

⁴⁶ Ndohi te gi bi Sichem ta tsenaʼa, ta hu a gi Baal Berith, ntʼhwaɗaʼa.

⁴⁷ A ndo ngiɗè a nʼngra na Abimélec, ndohi gi bi Sichem ta ɓicaʼa.

⁴⁸ Te deɓaʼa Abimélec a ndohi nengaʼa tèlèba to do za Tsalmon. Abimélec a nceda dzana a rai, a nʼngel shegwa, a nzuɓda a daʼai. A ngaɗa ta ndohai man ta zhè a sam na: Skwi man kin rka man i giaʼa, va-gu lèmèlèmè, va-gu tsam-tsam!

⁴⁹ A ndohi tèlèba ta ngul man a ta, a ta dzodzor Abimélec a ta pa na a deɓa a gi Baal, a ta fa na vogwa a gi man ndohi te pa. Aranta ndohi te gi bi Sichem ta bazl ta, a gi ndohi 1.000, ngurhi a ngwozihai.

⁵⁰ Te deɓaʼa Abimélec a ndo a ndaha va a ma kokwar Thébets, a ndumaʼa.

⁵¹ Te ndev kokwar, gi ngurèa a zhè, a ngurhi a ngwozi tèlèba a ndohi kokwar ta hu ta a pa. Ta pizléda gi a pa a ta teva a géɗèʼa.

⁵² Abimélec a mshkè a ma gi ngurèa, a woya man a ndumaʼa, a ndikè a ntamagi ndul ndul, a woya a nfa na vogwa.

⁵³ A ngwoz ngiɗè a ngudumbolko na kwa vova a gèɗ, a mbatsama na gèɗ.

⁵⁴ A nengaʼa a mbaha na gol nzuɓa na skwi var na, a ngaɗa na: Pho tsakwal a ka ndevdyè a vna, ta da gaɗa: ngwoz a nkeɗaʼa. A ndo mizline nengaʼa a ntuzo, a mʼmets na.

⁵⁵ A ndohi Israel ta rkaʼa, Abimélec a mʼmets na ma, ta men ta a deɓa a ngwi ta.

⁵⁶ Gar anta Bi Zhiklè a nʼngwoda na mali Abimélec man a ngu a sam bab na, man a mbazl ta kramamhi na 70, a gèɗ a nengaʼa.

⁵⁷ A ndohi Sichem ba, Bi Zhiklè a nʼngwoda ta mali a gèɗ, a ngu a sam ta, ara man Jotham, kra Jerubbaal man a mphomde ta.