Juges 8 - Ma Zhiklè

¹ Ndohi Ephraim ta gaɗa na Gédé-on: Ka ga nga skwi aranta èhème; aman ka de a ka gi var a ndohi Madian, ka ngra nga ɓi èhèmè? A ta ga na ndzoan kumba.

² Aman nengaʼa a ngaɗa ta: Aman nga lèmdè skwi man nga ngu cèw: skwi kinè a fena man a ga ka ɓi ɗè? Vanda man ta mbèdè te Ephraim kumba a fena man ta ria te Abiézer ka bi dè?

³ Bi Zhiklè a mpa kinè bihi Madian, Oreb a Zeeb, a ri a kinè. Kinè, kin gau: iyè, i ga mè? Aman a ngaɗa ta ma haha, a mpa ta a pa ndav.

Gédéon a gs ta bihi Madian ngiɗè

⁴ Gédéon a mshkè a ma woyam Jourdain. A ntawaɗa a nda ndohi nengaʼa 300, ntulè a nkeɗ ta, mi a mbazl ta.

⁵ A ngaɗa ta ndohi Succoth: Va-va ta movar a ndohi man a verzi ga, mi a keɗ ta! A iyè i hi a verzi Zébak a Tsalmunna, bihi Madian.

⁶ Bihi Succoth ta gaɗa: Zébak a Tsalmunna, ka kwor ta ma ɗè? A nga va ta movar a ndohi var ngaya dè?

⁷ Gédéon a ngaɗa: Amba genè! Aman Ndo nzi pèc pècèk a nda pa ta Zèbak a Tsalmunna a ri ga, i da kurats kinè a vatak zhilèr, a vatak golom.

⁸ A nengaʼa a mdo a ma a Penuel, a ngaɗa ta arsa. Ndohi Penuel ta mbeɗka na a ma lèmèlèmè ara ndohi Succoth.

⁹ Gédéon a ngaɗa ta ndohi Penuel arsa: Aman i da ndikkaɗa deɓa amba amba, i da mbeɗda gi ngurèa a ntamagi kokwar haha aussa.

¹⁰ Zébak a Tsalmunna ta zhè te Karkor, a ndohi var a nda tengaʼa ta gi 15.000, njèkèdia te va ndohi var tèlèba man ta shkè te civèɗ mvèng pats. Ndohi var mbazlaʼa, a tsakwal te rai, tèlèba, ta gi 120.000.

¹¹ Gédéon a ngso civèɗ mvèng pats, a nkala ta va a ndohi var man ta mana a pa,

¹² a ta hur skwi ngiɗè ɓai, a nvenda ta gèɗ a ndohi var tengaʼa tèlèba. Zèbak a Tsalmunna ta hu ta, a ta hu a verzi tengaʼa a ta gs ta, Zèbak a Tsalmunna, bihi Madian cèw.

¹³ Gédéon, kra Joas, a mshkè ngwi te var, a mbeza a za Hérès,

¹⁴ a ngso gol Succoth staɗ, a jénjèrèa a sam na. A nengaʼa a nʼngra na nzlembaɗ bihi Succoth a ndohi nengaʼa nhalaʼa tèlèba, 77.

¹⁵ A mshkè a sam ndohi Succoth, a ngaɗa: Zébak a Tsalmunna, a géɗ tengaʼa man kin ngwossayè, ta ana, i hulko ma. Kin gaɗa: Zébak a Tsalmunna, ka kwor ta ma dè, a nga va ta movar a ndohi var ngaya man mi a keɗe ta dè?

¹⁶ A ngso ndohi nhalaʼa te kokwar, a vatak zhilèr a vatak golom, a nkurats ta ndohi Succoth a vna.

¹⁷ Te deɓaʼa a mʼmbeɗa gi ngurèa te kokwar Penuel aussa, a mbazl ta ndohi kokwar.

¹⁸ Te deɓaʼa a ngaɗa ta Zèbak a Tsalmunna: Ndohi man kin bazl ta te Thabor, gwoli mè? Ta gaɗa na: Ta cka ka te dai. Staɗ staɗ tèlèba ta ara kra bai.

¹⁹ A nengaʼa a ngaɗa: Nasa kramamhi ga, wud mam ga! Ara man Ndo nzi pèc pècèk a zhè aman agassa kin jèka ta nshèffè, ar i bazl kinè azɓai.

²⁰ Te deɓaʼa a ngaɗa na Jéther, tsuvom na: Slambaɗa, bazl ta! Aman kra a ngeda tsakwal ɓai, a gi zlau, te man gèlèɓi kra.

²¹ Zébak a Tsalmunna ta gaɗa: Slambaɗa, a ka teze nga ar ka! Ka nguraʼa! Ndo sa a wuɗi na, ndo sa a wuɗi na. Gédéon a nslambaɗa, a nkeɗa Zébak, a nkeɗa Tsalmunna. Te deɓaʼa a nhelda skwi daʼai zlugumihi tengaʼa a ma.

Gédéon a woy bi ɓai. Mblom na

²² Ndohi Israel ta gaɗa na Gédéon: Gau a bi nga, ka a kra ngaya a kra kra ngaya, te man ka mbelka nga auda te ri ndohi Madian.

²³ Aman Gédéon a ngaɗa ta: I gi bi kinè azɓai, kra ga da gu bi kiné ɓai: Ndo nzi pèc pècèk da gu bi kinè!

²⁴ Te deɓaʼa Gédéon a ngaɗa ta: Aman skwi man i woy a i jhèdè te ri kinè a zhè: va-vayè dasiri man kin ngotskoɗi te va skwi man kin dumkodai. (Ndohi Ismaél mayamhi ta ta ngots dasiri guro.)

²⁵ Ta gaɗa: Nga woy a nga va ka. A ta wuzhè dawar maslaka a ta kalda dasiri guro man ta ngotskoɗi te va skwi man ta dumkodai a pa.

²⁶ Guro a gi kilo 28 man ta tsakala, a ta va na. Skwi daʼai zlugumihai a dangurai, a skwi te va maslaka man bihi Madian ta vau a va, a jèrɓihai a daʼai zlugumihai, ta te va ɓai.

²⁷ A Gédéon a ngau mblom a vna, a mfeda a Ophra, a kokwar nengaʼa, a ndohi Israel tèlèba ta kalahi a deɓ sak nengaʼa, a ta mboh skwi a vna, a nʼnga a skwi man a nslafaɗama ta sak a Gédéon a ndohi gi na.

Mʼmetsi Gédéon

²⁸ Aranta ndohi Israel ta gu ngul ndohi Madian, a ndohi Madian ta slambaɗa te deɓaʼa asaɓai. A kokwar a nʼnza a gumai, mvi 40, ha Gédéon a mʼmets na.

²⁹ Jerubbaal, kra Joas, a mdo na, a nʼnza a gi nengaʼa.

³⁰ Gédéon a myau wudahi 70, ngwozi nengaʼa ta zhe kumba.

³¹ Ngwoz ngiɗè te Sichem ba a nya na kra nguraʼa, a mva na nzlembaɗ na Abimélec.

³² Te deɓaʼa Gédéon, kra Joas, a mʼmets na, nhala kumba ma, a ta rda a vèvèɗ, a vèvèɗ Joas, bab na, te Ophra, man a ndohi Abiézer.

³³ Te deɓaʼa aman Gédéon a mʼmets na ma, ndohi Israel ta dzodzor Baalhi zaʼa, a ta gu Baal mbiaʼa a zhiklè ta.

³⁴ Aranta ndohi Israel ta hera Ndo nzi pèc pècèk, Zhiklè tengaʼa, asaɓai, nengaʼa man a mpreka ta auda te ri mayamhi tengaʼa tèlèba,

³⁵ ta shüd gèɗ a ndohi gi Jerubbaal, Gédéon, asaɓai, a géɗ skwi man amba tèlèba man a ga ta ndohi Israel.