Juges 7 - Ma Zhiklè

Gédéon a pèr ndohi na

¹ Jerubbaal, nengaʼa Gédéon, a ndohi tèlèba a sam nengaʼa, ta slambaɗa a prèk te gai, a ta ɓica va a tsagi nlèlè iyam Harod. Ndohi Madian ta ɓica va te man a géɗèʼa, a hinè te za Moré, ha ndè a nkulgodok.

² Ndo nzi pèc pècèk a ngaɗa na Gédéon: Ndohi da nza ka a tsagi kumba ar haha bai. I slaha a i pa ta ndohi Madian a ri a tengaʼa azɓai, man ɓai ndohi Israel ta da fi va a sam ga, a ta gaɗa: Nga mbel nga a ri nga.

³ Anai sèi ka bèhè, a ka gaɗa ta ndohai: Ko wawa man a gi zlau, a gudzai, do do a deɓa a ngwai, da hu na za Galaad! A ndohi 22.000 ta men ta a deɓa; njèkè ndohi 10.000.

⁴ Ndo nzi pèc pècèk a ngaɗa na Gédéon: Ko anai ndohi kumba. De ta a ma woyam, aman i jkede ta. Ndo man i da ngra ka: zana do do, zana do do, nengaʼa a dè a verzi ngaya. A ndo man i da ngra ka: zana do do ɓai, zana do do ɓai, nengaʼa a dè a verzi ngaya azɓai.

⁵ A Gédéon a mbaha ta ndohi tèlèba a ma woyam, a Ndo nzi pèc pècèk a ngaɗa na Gédéon: Ko wawa man a si iyam a ma, a cèɗè iyam ara kda, pe ta a gèɗ ta. Ko wawa man a gurɓahai a si iyam a rai, a gèɗ ta.

⁶ A ndohi man ta cèdè iyam ara kda, ta 300. Njèkèɗia ndohi tèlèba ta gurɓahai a ta su iyam a rai.

⁷ Ndo nzi pèc pècèk a ngaɗa na Gédéon: I da mbel kinè a nda ndohi 300 man ta cèdè iyam ara kda, a i pa ta ndohi Madian a ri a tengaʼa. Njè-kèɗia ndohi ngiɗè do do ngwai!

⁸ Skwi nʼndi man ta helda rai a tolom ta pa ta a ri a ndohi man ta dè var. A Gédéon a mpre ta ndohi Israel, staɗ staɗ a dè a gi na, a ndohi 300 ta nza a sam na. Ndohi Madian ta ɓica va a pa te godok, te nkulgodok.

Gédéon a fen ta ndohi Madian

⁹ A vaɗ sa, Ndo nzi pèc pècèk a ngaɗa na: Slambaɗa, a ko do a sam man ndohi ta ɓica va a pa, i pe ta a ri a ka.

¹⁰ Aman ka da gi zlau aman ka kala ta a va, do a ma a nda Pura, gol ngaya, a kin pu va a sam man ta ɓiceda va a pa.

¹¹ Fu zlembaɗ? a skwi man ta gèɗèʼa. Te deɓaʼa ka da ngècè wuɗai, a ka kala ta a va a sam man ta ɓiceda va a pa. A to do a hai, ta cèw a Pura, gol nengaʼa, ha ta ndikè a tsagi sam man ta ɓiceda va a pa.

¹² Aman ndohi Madian, a ndohi Amalek a ndohi te verzi gi tèlèba, rèdèdèa ara dzarai. Zlugumihi tengaʼa a ngrè azɓai, ara wyak te woyam.

¹³ A Gédéon a mshkè, a ntsena ndo ngiɗè man a njè ma nshunè a mandal na, a ngaɗa: Nshun a nkedyè ar haha: Movar ngedemalaʼa a ngudumbel va a Madian, a nkala a dergai, a gi a mʼmbeɗ na.

¹⁴ Mandal nengaʼa a mʼmbeɗa na a ma: Nasa tsakwal Gédéon, kra Joas, ndo Israel. Bi Zhiklè a mpe ta ndohi Madian a kokwar tèlèba a ri a nengaʼa.

¹⁵ Aman Gédéon a ntsena ma nshunè, a ntsena ara man ta ngreda verzi nshunè, a ngurɓahai. Te deɓaʼa a mshkè a deɓa a sam man ndohi Israel ta ɓica va a pa. A ngaɗa: Va-slambaɗa, Ndo nzi pèc pècèk a mva nga ndohi var Madian a ri a nga!

¹⁶ Te deɓaʼa a nʼngel ta ndohi 300 nengaʼa te va makar, a mpa ta tolom a ri tèlèba, a shidèfihai, man skwi ngiɗè a te pa ɓai, sèi skwi ntiv vogwa te pa.

¹⁷ A ngaɗa ta: Va-paka di a iyè, va-gu lèmèlèmè ara iyè. Aman i da ndikè a tsagi sam man ndohi ta ɓiceda va a pa, va-gu lèmèlèmè ara iyè.

¹⁸ Aman nga a ndohi ga, nga tsi tolom, va-tsu tolom arsa, kinè man kin tèuda sam mɓicè va a pa, a kin boho: A gèɗ Ndo nzi pèc pècèk, a gèɗ Gédéon!

¹⁹ A Gédéon a ndohi nengaʼa 100 ta shkè a dal var, gèɗ vaɗ, aman ta pu ndohi mɓer kokwar tok-tok, a ta tsu tolom, a ta bazla shidèfihai te ri ta.

²⁰ A ndohi a sam nʼngelaʼa makar ta tsu tolom a ta bazla shidèfihai, a ta co skwi ntiv vogwa a ri gula, a tolom a ri mandai, a ta tsiaʼa, a ta boho: A gèɗ Ndo nzi pèc pècèk, a gèɗ Gédéon!

²¹ A ta zlatsahi a samaʼa, a ta tèuda sam man ta ɓiceda va a pa, a ndohi Madian ta slambaɗa a ta hu ta toɗoɗom-toɗoɗomaʼa, a ta tsu lalau, a ta hu ta.

²² Ndohi 300 ta tsu tolom, a Ndo nzi pèc pècèk a ngau aman ndohi Madian ta keɗa va ta a tsakwal, a ta hi ta tèlèba, ha ndè Beth-Shitta, ha ndè Tserera, ha ndè a ma woyam te Abel-Mehola, a tsagi Tabbath.

²³ A ndohi Israel ta ɓica va ta: ta shkè te Nephthali, te Aser, te Manassé tèlèba, a ta hu a verzi ndohi Madian.

²⁴ Te deɓaʼa Gédéon a nzlinde ta ndohi sak a za Ephraim tèlèba, aman ta gaɗa ta: Vo-washkè, a kin gi var a ndohi Madian, va-ngala ta auda a ma iyam, ha ndè Beth-Bara, a ma woyam Jourdain! A ndohi Ephraim tèlèba ta ɓica va a ta ngala ta auda a ma iyam, ha ndè Beth-Bara a ma woyam Jourdain.

²⁵ A ta gso Oreb a Zeeb, bihi Madian cèw, a ta keɗa Oreb te za Oreb, a ta keɗa Zeeb te klok Zeeb. Te deɓaʼa ta hu a verzi ndohi Madian. A ta hulkoɗi gèɗ Oreb a Zeeb a sam Gédéon a wud woyam Jourdain.