Juges 6 - Ma Zhiklè

Ndohi Madian ta ngul Israel

¹ Aman ndohi Israel ta gu skwi man ambaha Ndo nzi pèc pècèk ɓai, Ndo nzi pèc pècèk a mpe ta a ri a ndohi Madian, mvi tsaraɗ…

² Ri ndohi Madian a nʼnza ta a gèɗ a ndohi Israel. A gèɗ ndohi Madian, ndohi Israel ta gu gi te za, te vèvèɗ te za, a slrats kwa.

³ Pats ngiɗè, aman ndohi Israel ta zlekau skwai, ndohi Madian ta shkè a nda Amalek a ndohi te kokwar te civèɗ mveng pats, a ta kala ta a va.

⁴ Ta nza ta a ma, ta gedassa skwi ta, ha ndè Gaza. Ta jèka skwi nʼndi ɓai te kokwar ndohi Israel, ko tambak, ko zlè, ko kɗèh.

⁵ Aman ta shkè, tengaʼa a rèwè ta, a gi ta, rèdèdèa ara dzarai, ta ngrè azɓai, tengaʼa a zlugumihi ta. Ta shkè aman ta gedassa kokwar.

⁶ Aranta ndohi Madian ta tawassede ta ndohi Israel kumba. A ndohi Israel ta kuɗau a sam Ndo nzi pèc pècèk.

⁷ A pats ngiɗè, aman ndohi Israel ta kuɗau a sam Ndo nzi pèc pècèk a géɗ Madian,

⁸ Ndo nzi pèc pècèk a nzlündo ndo nhadka ma a sam ndohi Israel, a ngaɗa ta: Ndo nzi pèc pècèk, Zhiklè Israel, a goɗo aranta: Iyè man i helka kinè auda te kokwar Egypte, a i de kinè auda te ɓèlè.

⁹ I mbel kinè auda te ri ndohi Egypte, te ri ndohi nʼnga kinè matakwan teleba. I dzam ta a ma kinè, a i va kinè kokwar ta.

¹⁰ Te deɓaʼa i gaɗa kinè: Iyè Ndo nzi pèc pècèk, Zhiklè kinè. Kin gu zlau zhiklèhi ndohi Amor, te kokwar tengaʼa man kin te pa, ɓai! Aman kin fa gèɗ a ma ga ɓai.

Zhiklè a Gédéon

¹¹ Bigol Zhiklè a mshkè, a nzahai a verzi wof tsna man a Joas, te verzi Abiézer, te Ophra. Gédéon, kra nengaʼa, a kizlè dau te gai, a woya a nghédè te ri ndohi Madian.

¹² Bigol Zhiklè a mshke a sam na, a ngaɗa na: Ndo nzi pèc pècèk a zhè a nda ka, ka ngul ndo!

¹³ Gédéon a ngaɗa na: Wa, bi ga, aman Ndo nzi pèc pècèk a zhè a nda nga, skwi haha a shkè a gèɗ nga èhèmè? Mrkedi tèlèba man bababhi nga ta njè nga, a ta gaɗa: Ndo nzi pèc pècèk a nhelka nga auda te kokwar Egypte, na tema? Antanta Ndo nzi pèc pècèk a nkwol nga ma, a mpe nga a ri a ndohi Madian.

¹⁴ A Ndo nzi pèc pècèk a nʼngwoda na ma, a ngaɗa: Do a wuɗi man a zhè a sam ngaya. Ka da mbelka ta ndohi Israel te ri ndohi Madian, iyè man i zlinde ka.

¹⁵ Aman nengaʼa a ngaɗa: Wa, bi ga, i da mbel ta ndohi Israel a mè? Ndohi verzi ga mʼman ɓai, nkèshèa te Manassé, a iyè, ntabawaʼa te va gwoli ga.

¹⁶ Ndo nzi pèc pècèk a ngaɗa na: I da zhe a nda ka, a ka da bazl ta ndohi Madian tèlèba, ara man ka keɗa ndo stadgenè.

¹⁷ A nengaʼa a ngaɗa na: Aman i ngots pombai a sam ngaya a vava, ngray skwi man i da shinè te pa, ka Zhiklè man ka gadayè.

¹⁸ Ko do ngay ɓai, zlatsa a haha, sèi man i shkè a i feda skwi man i va ka a hi a sam sak ngaya! A nengaʼa a ngaɗa: I zhèr ka, ha ka shke.

¹⁹ A Gédéon a ndo a gai, a nzlaha kra ɓok, a mtau gufa dau agoda staɗ, a movar man skwi nshégèrè a te dia ɓai, a mpeda zluèɗ a gadagar, a mɓalda mokoyom a gandaf, a nda auda a verzi wof tsna, a mpa na.

²⁰ Gol Bi-Zhiklè a ngaɗa na: Co zluèɗ a movar man skwi nshégèrè a te dia ɓai, feda a géɗ kwa ahngata, a ka bada na mokoyom a gèɗ. A nengaʼa a ngau arsa.

²¹ Te deɓaʼa gol Ndo nzi pèc pècèk a ngeda gaɗa te ri na, a nlama na zluèɗ a movar man skwi nshégèrè a te dia ɓai a ma gaɗa, a vogwa a mshkè auda te kwa, a nʼndeda zluèɗ a movar man skwi nshégèrè a te dia ɓai a ma. A gol Ndo nzi pèc pècèk a mwuc na a sam di na.

²² Gédéon a suna, gol Ndo nzi pèc pècèk a vava, a ngaɗa: Wo-bayè, Zhiklè, Ndo nzi pèc pècèk, a géɗ man nga peda di a iyam di iyam dai, a gol Ndo nzi pèc pècèk a vava!

²³ Aman Ndo nzi pèc pècèk a ngaɗa na: Gumi a sam ngaya! Ka gu zlau ɓai, ka metsi azɓai.

²⁴ A Gédéon a nrom sam mvi skwi a Ndo nzi pèc pècèk a samaʼa, a mbaha na ‘Ndo nzi pèc pècèk man a vi gumai’. Na zhè ha patsna, te Ophrah, a sam gwoli Abiézer.

Gédéon a mbeɗa sam mvi skwi a Baal

²⁵ A Gad sa, Ndo nzi pèc pècèk a ngaɗa na Gédéon: Co mari bab ngaya, a mari ngiɗè, fènègèd. Ka da mbeɗa sam mvi skwi a Baal man a bab ngaya a hai, a ka ngelda mblom a tsagi nengaʼa a hai.

²⁶ Te deɓaʼa rom sam mvi skwi a Ndo nzi pèc pècèk, Zhiklè ngaya, a géɗ za haha, ka düzlo a kwa, a ka co mari macecèwaʼa, a ka ndara na a Ndo nzi pèc pècèk, a shè-gwa mblom man ka ngelaʼa.

²⁷ Gédéon a mhul ndohi 10 te va golahi nengaʼa, a ngu ara man Ndo nzi pèc pècèk a gaɗa na. Aman a ngu a di ndo a pats ɓai, a gi zlau gwoli na a ndohi te kokwar. A ngu a Gad.

²⁸ Aman ndohi kokwar ta slambaɗa a prèk, ta ngots sam mvi skwi a Baal mʼmbeɗa tʼhai, a mblom nʼngela tʼhai a tsagi nengaʼa. A sam mvi skwi a Zhiklè mɓuaʼa, mari ngiɗè man ta ndara na Zhiklè.

²⁹ A ta goɗ a va ta: Ngu wa? A ta jhèdè arsa, a ta jénjérèʼa, a ta tsenaʼa: Gé-déon, kra Joas, a ngau.

³⁰ A ndohi kokwar ta gaɗa na Joas: Ckoɗi kra ngaya a nga keɗaʼa! Te man a mbeɗda sam Baal a hai, a nʼngela mblom a tsagiaʼa.

³¹ Aman Joas a ngaɗa ta ndohi man ta zlatsa a pa: Kin nza na a deɓa a Baal dè? Kin woy a kin takaha dè? Ndo man a gi srak a géɗ nengaʼa, sèi nga keɗaʼa, ga sam ciɗè. Aman nengaʼa Zhiklè, da nzala va na a ri na, a géɗ man ta mbeɗda sam mvi skwi a nengaʼa a hai.

³² A pats nasa ta baha na Gédéon Jerubbaal, ara man ta gaɗa: Baal da ga na skwi ambaɓiaʼa, a géɗ man a mbeɗda sam mvi skwi a nengaʼa a hai.

Gédéon a bkwi tambak man gwots a pa

³³ Madian tèlèba, Amalek a ndohi te civèɗ mvèng pats, ta humda va a ta tawaɗa woyam Jourdain, a ta mana a dal Jizréel.

³⁴ Mèzhèɓ Ndo nzi pèc pècèk a zhè a géɗ Gédéon, a ntsu tolom, a ndohi Abiézer ta ɓicko va a verzi nengaʼa.

³⁵ A nengaʼa a nzlinde ta ndohi sak a kokwar Manassé tèlèba, a tengaʼa ba ta shkè a ta dzodzora. A nzlinde ta ndohi sak a sam Aser, Zabulon, a Nephthali, a tengaʼa ba ta shkè a va tengaʼa.

³⁶ Te deɓaʼa Gédéon a ngaɗa na Bi Zhiklè: Aman ka woya a i mbel ta ndohi Israel, ara man ka pasla nga rai,

³⁷ na haha i feda bkwi tambak a gwots a pa a hedak. Aman minmèn a gi a géɗ gwots man a bkwai, te tsagiaʼa ngworaʼa, i da suna, i mbel ta ndohi Israel ara man ka pasla nga rai.

³⁸ A ngu ar haha. Te mangoslèmaʼa a prèk a nslambaɗa, a nɗots gwots bkwai, a iyam minmèn a mshkè auda te va gwots, a gi kokwi staɗ.

³⁹ Te deɓaʼa Gédéon a ngaɗa na Bi Zhiklè: Ka gu ndav ɓai, man i za gèdè zaʼa: i woy a i jkeda a gwots bkwi zaʼa. Sèi te ndev gwots da gwora, tsagiaʼa minmèn da ga a pa!

⁴⁰ A Bi Zhiklè a ngu arsa a Gad sa. Te ndev gwots ngwora, minmèn ngaʼa tʼhai a tsagiaʼa tèlèba.