Juges 5 - Ma Zhiklè

Dimèsh sabai nda Débora a Barak

¹ A pats nasa, Débora a Barak, kra Abinoam, ta slu dimèsh aranta:

² Aman Israel a nʼngots slagamhai a ta dè var, aman ndohi ta gso ndav ta a vna, va-shüd gèɗ a Ndo nzi pèc pècèk a géɗèʼa!

³ Kinè bihai, va-tsenaʼa! Kinè mbibihiaʼa, va-fu zlembaɗ! Iyè man i woy a i tsi ganzavar a Ndo nzi pèc pècèk, Zhiklè Israel, a i sli dimèsh a deɓaʼa.

⁴ Ndo nzi pèc pècèk, aman ka slambaɗka te Seir, aman ko do a dal var Edom, herkeda a ngudzau, giɗfèk a ncho iyam a hai, a iyam a ndzurvka te va vanai.

⁵ Za a mwurzl na a sam Ndo nzi pèc pècèk, a sam Ndo nzi pèc pècèk, Zhiklè Israel.

⁶ Te va man Shamgar, kra Anath, a zhè, te va man Jael a zhè, ndohi ta beza a civèɗ zura ɓai, ndohi nshèwèlè ta beza a hèshè-kèd.

⁷ Ndohi ncè ta ma te Israel, wuɗi ta azɓai, ha pats man i slambaɗa, iyè, Débo-ra, ha pats man i slambaɗa, ara mam Israel.

⁸ Ta dzodzor zhi klèhi ngiɗè mɓuaʼa: ndohi var Zhiklè ta nza; a sam ndohi Israel 40.000 ko gambar a tsakwal a te ri ta ɓai.

⁹ Ndav ga a wuffè a géɗ slagamhi Israel, a géɗ ndohi man ta gsa ndav ta a vna. Vashüd gèɗ a Ndo nzi pèc pècèk!

¹⁰ Kinè man kin dè a deɓ kɗèh nslekaɗaʼa, man kin nza a daɗari skwi deɓ kɗeh; a kinè ndohi nda a sak, va-huro!

¹¹ A sam nsi iyam skwihai, ta njè skwi man amba man Ndo nzi pèc pècèk a giaʼa, a skwi pombi nengaʼa man a ga ta ndohi Israel. Ndohi Ndo nzi pèc pècèk to do a ta ɓica va a ntamagi kokwar.

¹² Débora, ciɗa di ngaya, cida di ngaya, cida di ngaya, cida di ngaya a ka slu dimèsh! Barak, slambaɗa, ka kra Abiram, par ta tengaʼa man ka gs ta!

¹³ Njè-kèdi ndohi Israel da gu a ngul ndohi var! Ndo nzi pèc pècèk a ngiyè a ngulaʼa a dal var!

¹⁴ Ndohi Amalek ta shkè te Ephraim, Benjamin te va ndohi var ngaya, a verzi ngaya. Bihi ndohi var ta shkèhi te Makir; a tengaʼa man gaɗa bi te rai ta shkè te Zabulon.

¹⁵ Bihi Issacar to do a Débora. Ndohi Issacar ta dzodzor Barak. Te nkulgodok ta dzadzarka ta te deɓa; a ma woyam Ruben ta zlatsahi a ta hér gèɗ.

¹⁶ Ka nza te mpataka te ndevaʼa ambalai, a ka fi zlembaɗ a shingelèk man ta vèɗè a sam mwèr skwi èhèmè? A ma woyam Ruben ta zlatsahi a ta hér gèɗ.

¹⁷ Galaad a nʼnza na shèffaʼa te wud woyam Jourdain. Dan a sawala a géɗ iyam èhèmè? Aser a nʼnza a ma iyam mbiaʼa, a ngu mizline a ma genè.

¹⁸ Zabulon, ndohi man ta lèyè nshèffè ta azɓai, ndohi Nephthali te za lèmèlèmè arsa.

¹⁹ Aman bihi ta shkè, tengaʼa ta ɗaha va a ngi var, a bihi Canaan ta gu var a tengaʼa, te Thaanac, a ma woyam Meguiddo. Ko skwi kèshkata ta ngotso a skwi ndum ta ɓai.

²⁰ Bantihai te géɗèʼa ta takaha nga a var, a sam nʼnzi ta ta gu var a Sisera.

²¹ Woyam Kison a nhel ta ma, woyam a nhaka ta gèɗ, woyam Kison! Ndav ga, gu slagama, do do a ma ma!

²² Sak plèshihai ta gu kuraslaslaslaʼa, a ndohi plèsh ta hu piu-piuaʼa!

²³ Va-phomde Méroz, gol Ndo nzi pèc pècèk a gaɗa. Va-phomde ta ndohi kokwar nengaʼa, a géɗ man ta shkè a ta takaha Ndo nzi pèc pècèk hai, ta takaha Ndo nzi pèc pècèk a verzi slagamhi ndohi var ɓai.

²⁴ Vo-slubordo Jael te va ngwozihai, ngwoz Héber, ndo Ken. Te va mamgihi tèlèba, vo-slubordo nengaʼa!

²⁵ Bi a ndzhodo iyam, a mɓedza na wa, mbar wa te kokwi nslahaʼa.

²⁶ A mpho cègwèɗ mpataʼa a ri gula, a nco skwi ndizlè skwi a ri mandi na, a ndizlè na a gèɗ a Sisera, a ntsau, a nzlinèa perzlembaɗ, a gèɗ mbatsaʼa.

²⁷ A nkalahai a sam sak na, kossofor, mʼmana tʼhai, a nkalahi a sam sak na braɓaʼa; a sam man a kalahi kossofor, mʼmetsa.

²⁸ Mam Sisera a mpu di a nzurɗo a nvakavar, a gi wobau a ma züdo kulinjèrnjèraʼa: Kiki var nengaʼa a goko ndudoh èhèmè? Sak plèshi nengaʼa a tsenkoɗi azɓi èhèmè?

²⁹ Dalahi bai man maya ta zhè ta gaɗa na, a nengaʼa ba a ngoɗ te ndav na:

³⁰ Ta dum skwi te deɓa di genakwa! A ta kezli skwai. Ndohi var staɗ staɗ tèlèba a ɓèl te ri staɗ, a ɓèl cèw – Sisera a maslaka mvècea te ri staɗ, man cèw — a skwi man ta dumkoɗai, maslaka mvècèa man gadabu a pa; maslaka staɗ, cèw, a ngi a salabi ngwoz na.—

³¹ Ndo nzi pèc pècèk, mayamhi ngaya tèlèba da ze ta aranta; aman tengaʼa man ta woy ka, sèi ta gi ara pats man a vangkaɗauda a wuɗai! Te deɓaʼa kokwar a nʼnza a gumai, mvi 40.