Juges 4 - Ma Zhiklè

Débora a Barak

¹ Aman Ehud a mʼmets na ma, ndohi Israel ta za ga skwi man ambaha Ndo nzi pèc pècèk ɓai.

² A Ndo nzi pèc pècèk a mpre ta ma a ri a Jabin, bi Canaan, man a gu bi te Hatsor. Sisera, bi sojè nengaʼa. Gi nengaʼa te Harosheth-Goim.

³ A ndohi Israel ta kuɗi a sam Ndo nzi pèc pècèk, te man kiki var Jabin 900, a nʼnga ta matakwan kumba a ndohi Israel, a gi mvi 20.

⁴ Te ndev nasa, Débora, ngwoz nhadka ma, ngwoz Lappidoth, a bèzl kita te Israel.

⁵ Sam nʼnzi kita nengaʼa te verzi wof gangar Débora, te ndev Rama a Béthel, te za Ephraim. Ndohi Israel, man ta da gi kita, ta tivè a sam na.

⁶ A nengaʼa a nzlündo ndo, da baha na Barak, kra Abinoam, te Kédesh-Nephthali, a ngaɗa na: Ndo nzi pèc pècèk, Zhiklè Israel, a njè ka ma a gèɗ: Do a géɗ za Thabor. Helda ndo a verzi ngaya 10.000 te va ndohi Nephthali a ndohi Zabulon.

⁷ I da bidè Sisera, bi ndohi var Jabin, a kiki var nengaʼa, a ndohi var nengaʼa, a sam woyam Kison, a i da pa ka a ri a ka.

⁸ Barak a ngaɗa: Aman ka shkè, a nga dè cèw a ka, i dè. Aman ka da dè azɓai, i ba i dè azɓai.

⁹ A Débora a ngaɗa: Ngo-do cèw a ka mènè! Aman ngula ka asakaɓai; aman Ndo nzi pèc pècèk a da va na Sisera a ri a ngwoz. A Débora a nslambaɗa, a ndo Kédesh a nda Barak.

¹⁰ Barak a mbaha ta ndohi Zabulon a Nephthali a kokwar Kédesh. Ndohi 10.000 ta dzodzor te deɓa ndul ndul; Débora ba to do a nda ta.

Jael a nkeɗa Sisera

¹¹ Héber, ndo Kén, ta kezla gèɗ a ndohi Kén, wud Hobab, mèsh Moise, a ngu gi nengaʼa a verzi wof tsna Tsanaim, a tsagi Kédesh.

¹² Ta ngra na Sisera: Barak, kra Abinoam, a nshkè a géɗ za Thabor.

¹³ A Sisera a mɓic ta kiki var nengaʼa tèlèba, kiki var 900, a ndohi man ta zhè a sam na tèlèba, te Harosheth-Goim, ha ndè a woyam Kison.

¹⁴ Débora a ngaɗa na Barak: Slambaɗa, a pats mpatsna Ndo nzi pèc pècèk a mva ka Sisera a ri a ka. A vava Ndo nzi pèc pècèk kala a ma ngaya ma. A Barak a mshkèhi te za Thabor, a ndohi 10.000 ta dzodzora.

¹⁵ A Ndo nzi pèc pècèk a ndzakaɓama ta gèɗ a ndohi Sisera, a kiki var ba, a ndohi var tèlèba, a ma Barak, a ma tsakwal nengaʼa. Sisera a nʼnzevkaɗahi te kikai, a mhu na a sak.

¹⁶ A Barak a mhu a verzi kikihai a ndohi var, ha ndè a Harosheth-Goim. A mbazl ta ndohi var Sisera tèlèba a tsakwal. Ko staɗ njèka ɓai.

¹⁷ Aman Sisera a mhu na a sak a gi Jael, ngwoz Héber, ndo Kén, te man Jabin, bi Hatsor, a Héber, ndo Kén, ta tsu gumai.

¹⁸ Jael a mshkè auda te gai a sam Sisera, a ngaɗa na: Washkè, bi ga, wash-kè a gi ga! Ka gu zlau bai! A nengaʼa a mdo a gi a sam na, a ngwoz a mva na borkwa a gèɗ.

¹⁹ Bi a ngaɗa na: Gakay iyam kètè, iyam a dzayè! A nengaʼa a mɓedza na wa mɓutsoa te kokwai. Te deɓaʼa a mva na borkwa a gèɗ zaʼa.

²⁰ Bi a ngaɗa: Zlatsa a ntamagai! Aman ndo ngiɗè a shkè a ndzhaɗ ka: Ndo ngiɗè a mshkè a haha ɗè? Ka da gaɗa na: Aʼai!

²¹ Aman Jael, ngwoz Héber, a mpho cègwèɗ mpataʼa a ma gai, a skwi ndizlèʼa, a mshkè a gi zhèhèɗ zhèhèɗ, a ndizla na cègwèɗ matsa a perzlembaɗ, a ntsu gèɗ auda, a ndizla na a va herkeda. A nengaʼa man a nzhuna, a géɗ ntulè man a keɗaʼa, a mʼmets na aranta.

²² Na haha, Barak a mshkè, a mhu a verzi Sisera. Jael a mshkè auda te gai, a ngaɗa na: Washke! I da ngra ka ndo man ka hèshèʼa! A nengaʼa a mdo a gai a sam na, a nʼngots Sisera tʼhai, mʼmetsa, cègwèd te perzlembaɗ nengaʼa.

²³ Aranta Bi-Zhiklè a mva ta Jabin, bi Canaan, a ri a ndohi Israel a pats sa.

²⁴ A ri ndohi Israel a nʼnza a géɗ Jabin, bi Canaan, a vata, ha ta gedassa Jabin, bi Canaan.