Juges 3 - Ma Zhiklè

Zhiklè a jkeda Israel

¹ Na haha ndohi herkeda man Ndo nzi pèc pècèk a njèka ta a sam man ta nza a pa, a njkeda ta ndohi Israel a vna, ta tèlèba man ta sun var tèlè man ta gokoɗi a géɗ Canaan ɓai.

² Zhiklè a woya man ndohi Israel man ta sun var zlèzlèa ɓai, ta slebi var.

³ Ndohi herkeda haha: bihi Philistie 5, ndohi Canaan tèlèba, ndohi Sidon, Hévi man ta nza te za Liban, a hinè te za Baal-Hermon, ha ndè Hamath.

⁴ Ndo nzi pèc pècèk a woya a njkede ta ndohi Israel a nda ta, a da rkaʼa: ta da fi gèɗ a ma nkwèr Ndo nzi pèc pècèk man a njè ta babhi tengaʼa te ma Moise dè, dè ta gi azɓai dè?

⁵ Gar haha ndohi Israel ta nza te ndev ndohi Canaan, Heth, Amor, Phéréz, Hévi a Jébus.

⁶ Ta cè ngwoz a va, a ta jèjèr zhiklèhi tengaʼa.

⁷ Ndohi Israel ta ga skwi man ambaha Ndo nzi pèc pècèk ɓai: Zhiklè tengaʼa, Ndo nzi pèc pècèk, a mpca ta a gèɗ, a ta dzodzor Baal a mblomhai.

⁸ A Ndo nzi pèc pècèk a ngu ndav kumba a géɗ ndohi Israel, a mpre ta ma a ri Kushan-Risheathaim, bi Mésopotamie. A ndohi Israel ta gu ɓèlè a sam Kushan-Risheathaim, mvi 8.

Othniel a mbél Israel

⁹ Te deɓaʼa ndohi Israel ta kuɗi a sam Ndo nzi pèc pècèk, a Ndo nzi pèc pècèk a mva ta ndo mʼmbel ta man a mbelka ta auda: Othniel, kra Kenaz, mbegèɗ Caleb.

¹⁰ Mèzhèɓ Zhiklè a zhè a géɗ nengaʼa, a nhelka ta ndohi Israel auda te kita. A mdo a ngi var, a Ndo nzi pèc pècèk a mpa na Kushan-Risheathaim, bi Mésopotamie, a ri a nengaʼa, a nengaʼa a ngu a ngul Kushan-Risheathaim.

¹¹ A kokwar a nʼnza a gumai, mvi 40. Te deɓaʼa Othniel, kra Kenaz, a mʼmets na.

Ehud a mbél Israel

¹² A ndohi Israel ta hüno a ta gi skwi man ambaha Ndo nzi pèc pècèk bi zaʼa. A Ndo nzi pèc pècèk a mva na wuɗi a Eglon, bi Moab, a mfen ta ndohi Israel, a géɗ man ta ga skwi man ambaha Ndo nzi pèc pècèk ɓai.

¹³ A nengaʼa a nhumda va a nda ndohi Ammon a Amalek. Te deɓaʼa to do a ta gu var a ndohi Israel, a ta dum kokwar Gangar.

¹⁴ A ndohi Israel ta gu ɓèlè a sam Eglon, bi Moab, mvi 18.

¹⁵ Te deɓaʼa ndohi Israel ta kuɗi a sam Ndo nzi pèc pècèk, a Ndo nzi pèc pècèk a mva ta ndo mʼmbel ta: Ehud, kra Guéra, ndo Benjamin, ngul-ndo. A ndohi Israel ta zlündo nengaʼa, a nda na skwi mbalai a bi Eglon.

¹⁶ Ehud a mvüdo gwèsh man ntasla te tsagi cèw, ngurèa a tsi ri 1, a mʼmanda a godor te civèɗ ri mandi na, a hwaɗ maslaka.

¹⁷ A nda na skwi mbalai a Eglon, bi Moab. Eglon, ndo ngraʼa mbeɗatataʼa.

¹⁸ Aman a mva na skwi mbali ma, a nzlinde ta ndohi nzuɓ skwi mbalai a deɓa.

¹⁹ Aman géɗ va na, aman a ndikè a sam mblom Guilgal, a mʼmenkaɗ na a deɓa a sam bai, a ngaɗa: Ma man i woy a i gaɗa ka a metsar a zhè, bi ga. A nengaʼa a ngaɗa: Vo-do auda! A ndohi a tsagi nengaʼa to do auda tèlèba.

²⁰ Ehud a mshkè a sam na a kalak na, a ngaɗa: Ma man i woy a i menda ka, ma Zhiklè. A bi a nslambaɗa a sam nʼnzi na.

²¹ Ehud a ntarda ri gula a hwaɗ maslaka, a mpho gwèsh a godor, a nteza hwaɗaʼa a vna,

²² a gwèsh a ndo na a pa tèlèba ndiyèm, a mbeza a ndè na ma a pa. A mpho gwèsh auda tʼhwaɗ nengaʼa ɓai, a zi a mshkè auda.

²³ Te deɓaʼa Ehud a ndo auda a hwaɗ gala, a mpizlè ntamagi kalak, a mɓarda a pa.

²⁴ Aman a mshkè auda ma, golahi bai ta shkè, a ta ngots ntamagi kalak mɓara, a ta gaɗa: A pèn va te gai.

²⁵ Ta zhèrè lèklèk a ntamagi kalak, aman nengaʼa a wina bi genè. A ta woy skwi mwinè ntamagai, a ta wina gai. Bi tengaʼa nkalda tʼhai, mʼmetsa.

²⁶ Ehud, nengaʼa a mhu na, te va man ta zhèr a ntamagai. A mbeza auda a sam mblom, a mʼmbel na a Seira.

²⁷ Aman a shkè a pa, a tsi tolom te za Ephraim, a ndohi Israel ta shkèhi te za, a to do, nengaʼa a ma.

²⁸ A nengaʼa a ngaɗa ta: Va-dzadzarkayè, aman Ndo nzi pèc pècèk a mpa ta ndohi Moab, mayamhi kinè, a ri a kinè. A ta shkèhi, a ta dzodzora, a ta pizlèda géɗ woyam Jourdain a pa, ha ndè Moab, a ta va ta civèɗ a ndohi ta shkè auda ɓai, ko staɗ.

²⁹ Ta bazl ta ndohi Moab a pats nasa, a gi ndohi 10.000, tèlèba slagamhi ndohi var, ko staɗ mʼmbel na ɓai.

³⁰ A pats nasa ndohi Israel ta gu bi a géɗ ndohi Moab. A kokwar a nʼnza a gumai, mvi 80.

Shamgar a mbel Israel

³¹ Te deɓ nengaʼa, Shamgar, kra Anath, a mshkè. A mbazl ta ndohi Philistie, ndohi 600, a gaɗa mwèr zlè. Nengaʼa ba a mʼmbel ta ndohi Israel.