Juges 18 - Ma Zhiklè

Ndohi Dan ta zeɓi Lais

¹ Te ndev nasa bi Israel az di ɓai; a ndohi Dan ta hèsh sam man ta nzi a pa. Ta ngots sam kokwar tengaʼa te ndev ndohi te verzi Israel, man jimèr a nkala na a gèɗ, a skwi nʼndi gi tengaʼa di ɓai.

² Ndohi Dan ta zlündo gwoli tengaʼa 5, ndohi var te Tsorea a Eshthaol, aman ta jénjérèʼa, a ta dè a ta zeɓi kokwar. Ta gaɗa ta: vo-do, va-zeɓu kokwar! A ta ndikè a sam za Ephraim, te man a gi Mica, a ta nza te pa a vaɗ.

³ Ta zhè ndul ndul a sam gi Mica, a ta sun gol massa, ndo Lévi, te daʼai, a ta beza a pa. Ta gaɗa na: Ncka ka haha wa? Ka gi a haha mè?

⁴ Nengaʼa a ngaɗa ta: Mica a ngay kata kata, a mvay sulai a i gi a ndo mvi skwi a Zhiklè nengaʼa.

⁵ Ta gaɗa na: Dzhoɗo a sam Bi Zhiklè, a nga suna, civèɗ man nga bizhè a pa a da gi amba amba.

⁶ A ndo mvi skwi a Zhiklè a ngaɗa ta: vo-do a gumai! Ndo nzi pèc pècèk a pi di a civèɗ man kin bizhè a pa.

⁷ A ndohi 5 to do a ta shkè a kokwar Lais. Ta rka, ndohi kokwar te pa ta tèkwèn skwi azɓai, ara ndohi Sidon, ta nza a gumai, ta ga ma ɓai, ta ndohi mèshèlè, ta nza dra a ndohi Sidon, ta nza te pa a géɗ ta.

⁸ A ta shkè a deɓa a sam kramamhi ta a kokwar Tsorea a Eshthaol, a kramamhi tengaʼa ta gaɗa ta: Kin cka ma mè?

⁹ Ta gaɗa: Ngo-dokoya! Nga ngelda di a kokwar ma, kokwar amba a vata ba. Kin nzi a haha ɓlussaʼa ambali èhèmè? Kin gu wudar ɓai, vo-washkè, ngo-dumokoy kokwar!

¹⁰ Aman kin da ndikè a pa, kin ngècè ndohi man ta gi ma azɓai. Dal kokwar mbiaʼa, Bi Zhiklè a mva kinè a ri a kinè, sam man ta tèkwèn skwi a géɗ herkeda te pa azɓai.

Ndohi Dan ta ce Zhiklè Mica a Metsar

¹¹ Ndohi Dan 600 te Tsorea a Eshthaol to do, a tsakwal te rai.

¹² A ta ɗaha va te Kirjath-Jearim, te Juda. A géɗ nengaʼa ta baha na samaʼa Machané-Dan, ha patsna. Na zhè a tsagi Kirjath-Jearim, te civèɗ nkèl pats.

¹³ Te pa, to do a za Ephraim, a ta ndikè a sam man gi Mica a pa.

¹⁴ Ndohi 5 man to do a ta zeɓi kokwar Lais ta hüno a ta gaɗa ta kramamhi tengaʼa: Kin sun ɗè, te gi ngata staɗ, Ephod a Théraphim a skwi mbèh skwai a vrai mviɗa a zhè. Vo-dzhoɗo te pa skwi man kin da giaʼa!

¹⁵ A ta beza a pa, a to do a gai, a sam gola te verzi Lévi, a gi Mica, a ta ga na mbalai.

¹⁶ Ndohi 600, a skwi var te rai, ta zlatsa tʼuda a ntamagai (ndohi Dan).

¹⁷ Ndohi 5 man to do a ta zeɓi kokwar to do a pa, a ta hul skwi mbèh skwai, a Ephod, a Théraphim a skwi vrai mvi dèʼa, a ndo mvi skwi a Zhiklè a nzlatsa a ntamagi a nda ndohi 600, man skwi var te ri ta.

¹⁸ Aman to do a gi Mica a ta hul skwi mbèh skwai a Ephod a Théraphim a skwi vrai mviɗaʼa, ndo mvi skwi a Zhiklè a ngaɗa ta: Kin gi a haha mè?

¹⁹ Ta gaɗa na: Nza tètè, jèkeda ma ngaya sa! Washkè a verzi nga, a ka gi a bab nga, a ndo mvi skwi a Zhiklè. Mʼmbela a sam ngaya mè? Ka gi a ndo mvi skwi a Zhiklè a géɗ ndo staɗ ɗè, ɗè ka gi a géɗ ndohi te verzi staɗ tèlèba, a gwoli Israel ɗè, mʼmbela nangwa?

²⁰ Ambaha ndo mvi skwi a Zhiklè, a mhul Ephod a Théraphim a skwi mviɗaʼa, a ndaʼa a ndev ndohi nhayaʼa.

²¹ A ta men ta a deɓa a to do ta, wudahi nkèshèa a skwi kuɗom a ma, a ta zuɓ kolongwihi mbelmbela a ma.

²² Mshkè ta auda a sam gi Mica ma, ndohi te gi a tsagi gi Mica ta tsu lalau, a ta hu a verzi ndohi Dan.

²³ Ta ngats ta ndohi Dan. A ndohi Dan ta ngwodko gèɗ a deɓa, a ta gaɗa na Mica: Ka tsi lalau a ka ɓic ta ndohi ngaya èhèmè?

²⁴ Nengaʼa a ngaɗa: Zhiklè ga man i gau, kin helamayè, a nda ndo mvi skwi a Zhiklè ba, a kin de kinè a vna. Njèkèɗ a sam ga za mè? Kin gaɗayè: Ka woy mè, kin gaɗayè èhèmè?

²⁵ Ndohi Dan ta gaɗa na: Nga woya a nga cinè ma ngaya ɓi klèk ba, man ɓai ndohi man gèɗ ta ndzakaɓa, ta da ngats ka; a ta da zede nshèffè ngaya, a nshèffè ndohi gi ngaya ba.

²⁶ A ndohi Dan to do a ma ma a civèɗ, a Mica a suna, wuɗi ta a zhè, ta fena nengaʼa, a mʼmen na a deɓa a ngwi na.

Ta gedassa Lais

²⁷ Tengaʼa ta hul skwi man Mica a ngau, a ndo mvi skwi a Zhiklè man a nza a sam na, a ta shkè a kokwar Lais, man ndohi ta nza te pa a gumai, a ta ga ma ɓai. Ta bazl ta a tsakwal a ta fa na vogwa a kokwar.

²⁸ Ndo a mshkè a ntakaha ta ɓai, te man Sidon dra, ta nza te pa a géɗ ta. Na zhè te dak, a civèɗ ndè Beth-Rehob. A ta ɗaɗayda kokwar a pa zaʼa, a ta nza te pa.

²⁹ A ta baha na kokwar a nzlembaɗ Dan, nzlembaɗ Dan ara bab ta, man Israel a myau. Zlèzlèa nzlembaɗ kokwar sa Lais.

³⁰ A ndohi Dan ta Zlatseda skwi mbèh skwi a sam tengaʼa. Jonathan, kra Guershom, kra Manassé, a wudahi nengaʼa, ta gu mizlinè mvi skwi a Zhiklè a sam ndohi te verzi Dan, ha pats man ta dzam ta auda te kokwar, a ta hel ta a ɓèlè a kokwar ngiɗè dra.

³¹ A ta Zlatseda skwi mbèh skwai man Mica a ngau sa. Na zhè, a nʼnza a pa, lèmèlèmè ara gi Bi Zhiklè nkezlaʼa te Silo.