Juges 16 - Ma Zhiklè

Samson te Gaza

¹ Pats ngiɗè, Samson a ndo Gaza, a mrka fali dam te pa, a mdo a sam na.

² A ta ngra ta ndohi Gaza: Samson a mshkè a haha! A ta tèuda kokwar a pa, a ta zhirɗèʼa a ntamagi kokwar lèk-lèk, ha dakwad. A vaɗ tèlèba ta nza a pa, ta gaɗa: Ngo-zhorokoy a prèk, a nga da keɗaʼa.

³ A Samson a nʼnza te gai, ha géɗ vaɗ, a nslambaɗa, a ngsa ntamagi kokwar, a mpeldaussa, a wof te tsagiaʼa tèlè, a gaɗa mɓèr ntamagai, a nzuɓda a géɗ za, zuraʼa a ma Hébron.

Samson a Delila

⁴ Te deɓaʼa a woy ngwoz ngiɗè te slrats Sorek, nzlembaɗ na Delila.

⁵ Bigolahi Philistie to do a sam na, a ta gaɗa na: Büdko na ma auda tʼhwaɗ, a ka suna, wuɗi nengaʼa mbiaʼa sa a shkè te mè? A nga slaha a nga fenaʼa. Nga da dzawaʼa, a nga gi ngula a géɗ nengaʼa. Staɗ staɗ tèlèba te va nga a da va ka Suli gozhèm gozhèm.

⁶ A Delila a ngaɗa na Samson: Kam kam ngrayè: wuɗi ngaya a shkè tema? Maya mè aman ta dzaw ka a ta fen ka?

⁷ Samson a ngaɗa na: Aman ta dza-wyè a teɓa mɓayaʼa 7, man ta gwora di ɓai, i nza ara ndo ambalai, wuɗi ga asaɓai.

⁸ A golahi Philistie ta hulko na teɓa mɓayaʼa 7 man ta gwora di ɓai. A ngwoz a ndzawaʼa a vna.

⁹ Ndohi ta zhirdèʼa te gai. A ngwoz a mbaha na: Samson, ndohi Philistie ta kala ka a va ma! A nengaʼa a nruhda teɓa aussa ara gogumai man vogwa a lawaraʼa. A ta sun sam man wuɗi nengaʼa a shkè te pa ɓai.

¹⁰ Delila a ngaɗa na Samson: Ka ngwodyè, a ka tsokol ma a sam ga. Ngrayè dakwa! Nga slaha nga dzaw ka a mè?

¹¹ A nengaʼa a ngaɗa na: Aman ta dzawyè a teɓa man ta nderɗa di ɓai, i nza ara ndo ambalai, wuɗi ga asaɓai.

¹² A Delila a nco teɓa mɓuaʼa, a ndzawa a vna. Te deɓaʼa a mbaha na: Samson, ndohi Philistie ta kala ka a va ma! A ndohi ta zhirɗèʼa te gai. A nengaʼa a ngesledaussa te rai ara gogumai.

¹³ Delila a ngaɗa na Samson: Ha patsna ka ngwodyè, ka tsokol ma a sam ga. Ngrayè dakwa, nga slaha nga dzaw ka a mè? A nengaʼa a ngaɗa na: Aman ka derzla na bojokwom gwots gèɗ ga 7 a va gogumai, a ka tsi teɓa maslaka a vna, a ka dizldahi a va wof gorombi maslaka, i nza ara ndo ambalai, wuɗi ga asaɓai.

¹⁴ A nengaʼa a zhèr man a nzhuna, a nderzla na bojokwom gwots gèɗ nengaʼa 7 a va gogumai, a ndizldahi a va wof gormbi maslaka. A mbaha na: Samson, ndohi Philistie ta kala ka a va ma! A nengaʼa a mpidèkwe na a nzhunè, a mputseda gormbi maslaka aussa tèlèba.

¹⁵ A ngwoz a ngaɗa na: Ka gaɗa i woy ka, i woy ka, aman skwi te ndav ngaya ka ngray azɓi èhèmè? Na haha sak makar ma ka ngwodyè. Ani ba ka ngray di ɓai: Wuɗi ngaya a shkè tema?

¹⁶ A nengaʼa a ndzaraha a ma nengaʼa pèc pècèk, a ngézhèʼa, a ngezla na a gèɗ,

¹⁷ a nʼngra na skwi te ndav na tèlèba. A ngaɗa na: Ta fa pidök a gèɗ ga di ɓai, a géɗ man iyè a Zhiklè daga man i tʼhwaɗ mam ga. Aman ta da shèy gèɗ, wuɗi ga a ndev na, i nza ara ndo ambalai, wuɗi ga asaɓai.

¹⁸ Aman Delila a mrka, a nʼngra na skwi te ndav na tèlè, a mbaha ta bigolahi ndohi Philistie, a ngaɗa ta: vo-washke ma, a nʼngray skwi te ndav tele ma! A bigolahi Philistie ta shkè a sam na, a ta hulko na Suli a rai.

¹⁹ A nengaʼa a mva na gèɗ a gsa aman a nzhun na a pa, a mbaha ndo a nshèma na bojokwom gwots gèɗ na 7 auda. A wuɗi a nshkè na auda, wuɗi na asaɓai.

²⁰ Te deɓaʼa a mbaha na: Samson, ndohi Philistie ta kala ka a va ma! A nengaʼa a mpidèkwe na te nzhunè, a hur i da gi ara mpèc pècèk, i da ngesleda skwi ndzawyè aussa. A sun a ngaɗa Ndo nzi pèc pècèk a njèkay ma, a sun ɓai.

²¹ A ndohi Philistie ta gso, a ta hulko na di auda, a ta da a kokwar Gaza, a ta dzawaʼa a teɓa züdo cèw, a nkizlè dau te dangai.

Mʼmetsi Samson

²² Aman gwots gèɗ nengaʼa a ngrekaɗ na a pa, to deɓ man ta she na auda ma.

²³ A bigolahi Philistie ta gi ngolala mvi skwi mbiaʼa a zhiklè Dagon, zhiklè tengaʼa. Ta gaɗa: Zhiklè nga a mva nga Samson, ndo mayam nga, a ri a nga.

²⁴ Ndohi kokwar ta rkaʼa, a ta shid gèɗ a zhiklè tengaʼa, a ta gaɗa: Zhiklè nga a mva nga ndo mayam nga a ri a nga, nengaʼa man a gedassa kokwar nga, a mbazla nga ndohi nga kumba,

²⁵ Aman ndav ta a gi langlangaʼa, ta gaɗa: Va-baha na Samson, a nga mbèhwali a vna! A ta baha na Samson te gi dangai, da mbaha ta walai. A ta Zlatseda te ndev sak gi cèw.

²⁶ Samson a ngaɗa na kra mfeda na ma: Pray ri ga, a i taraha sak gi cèw, aman gi a nza a gèɗèʼa haha dai, a i gshè va a vna.

²⁷ Gi zhiklè nʼndha a ngurhi a ngwozihai. Bigolahi Philistie tèlèba ta zhè, a ngurhi a ngwozi 3.000 te gala man ta pi di a mbèhwali Samson.

²⁸ A Samson a ntsu ri a Ndo nzi pèc pècèk, a ngaɗa: Bai. Ndo nzi pèc pècèk, heryè, vay wuɗi a va staɗ zaʼa, Zhiklè ga, a i pela di ga cèw a sam ndohi Philistie.

²⁹ Te deɓaʼa Samson a ngso va a sak gi te ndev gai, man gi a nza a géɗèʼa, ngiɗè te ri mandai, ngiɗè te ri gula, a mɓor va a vna.

³⁰ Samson a ngaɗa: I da metsau a va ndohi Philistie! A ngu deɓ a hai, a mpasledaussa a wuɗai, a gi Dagon a mbeɗkaɗ na a gèɗ ndohi tèlèba man ta te pa. A ndohi man a mbazl ta te mʼmetsi nengaʼa, a fena ndohi man a mbazl ta te va man a zhè a nshèffè dai.

³¹ A kramamhi nengaʼa, a ndohi gi bab nengaʼa ta shkè a ta co a ta zuɓ nckondo a ta rda a ndev Tsorea a Eshthaol, a gi dzavi Manoach, bab na. Samson a ngau kita te Israel, mvi 20.