Juges 12 - Ma Zhiklè

Var ndohi Ephraim a Jephthé

¹ Ndohi Ephraim ta ɓica va a var, a to do Zaphon. A ta gaɗa na Jephthé: Ko do a ka gu var a ndohi Ammon, a ka pe nga a verzi ngaya bi èhèmè? Nga da fa ka vogwa a gi man ka te pa!

² Aman Jephthé a ngaɗa ta: Nga tsomma kumba, nga a ndohi ga, a nda ndohi Ammon. Aman i baha kinè, kin shke a kin takahayè bai.

³ Aman i rka ndo ntaka-hayè azɓai, i mbeɗa nshèffè ga asaɓai, a i do a i gu var a ndohi Ammon, a Ndo nzi pèc pècèk a mpe ta a ri ga. Kos kin shke a kin woy a kin gi var a iyè èhèmè?

⁴ A Jephthé a mɓic ta ndohi Galaad tèlèba, a ngu var a Ephraim. A ndohi Galaad ta bazl ta ndohi Ephraim, tengaʼa man ta gaɗa: Kin wuc kinè a va ndohi Ephraim! Galaad, nte ndev Ephraim, nte ndev Manasse.

⁵ A ndohi Galaad ta co sam man ta tawaɗa woyam Jourdain te civèɗ i Ephraim. Te deɓaʼa pèc pècèk man ndo Ephraim a woya a nwuc na, a ngaɗa: Vay civèɗ a i dè auda! Ndohi Galaad ta gaɗa na: Ka ndo Ephraim dè? Aman a ngaɗa: Aʼai!

⁶ Ta gaɗa na: goɗ Shibboleth! Aman nengaʼa a ngoɗ Sibboleth, a slaha a ngèɗè ‘Sh’ ɓai, ta gso a ta keɗaʼa a ma woyam Jourdain. Te ndev nasa ndohi ta bazl ta 42.000 te Ephraim.

Ibtsan, Elon, Abdon, ndohi kita Israel

⁷ Jephthé a ngau kita te Israel, mvi 6. Te deɓaʼa Jephthé te Galaad a mʼmets na, a ta rda a Galaad, te kokwar nengaʼa.

⁸ Te deɓ nengaʼa, Ibtsan te Bethléhem a ngau kita te Israel.

⁹ Wudahi ngurhi nengaʼa 30, dalahi nengaʼa 30, a mpe ta a ngwoz a gi verzi ndohi ngiɗè, a mbelka ta ngwozi a wudahi nengaʼa te verzi ndohi ngiɗè.

¹⁰ Te deɓaʼa Ibtsan a mʼmets na, a ta rda a Bethléhem.

¹¹ Te deɓ nengaʼa Elon te Zabulon a ngau kita te Israel. Nengaʼa ndo kita Israel mvi 10.

¹² Elon te Zabulon a mʼmets na, a ta rda a Ajalon, te herkeda Zabulon.

¹³ Te deɓ nengaʼa Abdon, kra Hillel, ndo Pirathon, a ngau kita te Israel.

¹⁴ Wudahi nengaʼa 40, a wud wuda na 30. To do a deɓ kɗèh, kɗèhi 70. Nengaʼa ndo kita te Israel mvi 8.

¹⁵ Te deɓaʼa Abdon, kra Hillek, a mʼmets na, a ta rda a Pirathon, tʼherkeda Ephraim, te za Amalék.