Juges 11 - Ma Zhiklè

Jephthé a gi bi a géɗ Galaad

¹ Jephthé te Galaad, slagam ndo. Nengaʼa kra fali dam. Galaad a myu tʼhwaɗ nengaʼa.

² Wudahi man a myu tʼhwaɗ ngwoz gai ta zhè. A wudahi ngwoz gai ta gra a ta dzama Jephthé. Ta gaɗa na: Ka ngwoz kalak, ka ndi gi bab nga asaɓai!

³ A Jephthé a mhu na a sam kramamhi na, a nʼnza a kokwar Tob. A nderkèzhè ndohai ta ɓica va a sam Jephthé, a ta dzodzora.

⁴ Te mvi ngiɗè, ndohi Ammon ta gu var a Israel.

⁵ Aman ndohi Ammon ta gu var a Israel, ndohi nhalaʼa te Galaad to do a sam Jephthé te kokwar Tob.

⁶ Ta gaɗa na Jephthé: Washkè, de nga a var! A nga gi var a ndohi Ammon!

⁷ Aman Jephthé a ngaɗa ta ndohi nhalaʼa te Galaad: Kin dzamyè auda te gi bab ga a shè-wa ka ɓi dè? Ani man kinè te matakwan ma, kin shkè a sam ga èhèmè?

⁸ Ndohi nhalaʼa te Galaad ta gaɗa na Jephthé: Nga shkè a gèɗ nengaʼa manakwa! A ka feda nga ma a var a ka gi bi a gèɗ ndohi Galaad.

⁹ Te deɓaʼa Jephthé a ngaɗa ta ndohi nhalaʼa te Galaad: Aman kin bah-kayè a deɓa a ngi var a ndohi Ammon, a Ndo nzi pèc pècèk a da pe ta a ri ga, i da gi a bi kinè.

¹⁰ A ndohi nhalaʼa te Galaad ta gaɗa na Jephthé: Ndo nzi pèc pècèk da ga nga kita a gèɗ, aman nga da gi arsa azɓai.

¹¹ A Jephthé a mdo a verzi ndohi nhalaʼa te Galaad, a ndohi ta gau a bi a ndo ncè ta ma. A Jepthé a njè na skwi tèlèba a Ndo nzi pèc pècèk te Mitspa.

Jephthé a bi Ammon

¹² Jephthé a nzlinde ta ndohi sak a sam bi ndohi Ammon, a ngaɗa ta: Kin woy ma a iyè, èhèmè, aman kin shkè a sam ga, a kin gi var a kokwar ga!

¹³ A bi ndohi Ammon a nzlinde ta ndohi sak a sam Jephthé, a ngaɗa na: Aman ndohi Israel ta shkè auda te kokwar Egypte, ta cèmay kokwar ga, a hinè te Arnon, ha ndè Jabbok, ha ndè a ma woyam Jourdain. Anai vay skwi ga a deɓa te gumai!

¹⁴ A Jephthé a nzlinde ta ndohi sak ngiɗè zaʼa a sam bi ndohi Ammon,

¹⁵ a ngaɗa na: Jephthé a goɗ ar haha: Israel a ncèma kinè kokwar Moab ɓai, a mdo kokwar ndohi Ammon ɓai;

¹⁶ aman ta shkè auda te kokwar Egypte, ndohi Israel ta beza a ndev hèshèkèɗ, ha ta shkè a ma iyam mbiaʼa nduzoa, a ta ndikè Kadès.

¹⁷ A ndohi Israel ta zlinde ta ndohi sak tengaʼa a sam bi Edom, a ta gaɗa na: Nga woya mbizhè a ndev kokwar ngaya! Aman bi Edom a mva ta civèɗ ɓai. Ta zlündo a sam bi Moab ba, a nengaʼa ba a woya ɓai. A ndohi Israel ta nza te Kadès.

¹⁸ Te deɓaʼa ta ga civèɗ te ndev hèshèkèd, ta beza a tsagi kokwar Edom a Moab, a tsagi Moab te civèɗ mvèng pats, a ta nza tʼwud woyam Arnon, a ta tawaɗaha kuma kokwar ndohi Moab ɓai — kuma Moab a ma woyam Arnon.

¹⁹ Te deɓaʼa ndohi Israel ta zlinde ta ndohi sak a sam Sihon, bi ndohi Amor, bi te Hesbon, a ndohi Israel ta gaɗa na: Nga woya mbizhè a ndev kokwar ngaya, ha nga ndikè a sam man nga dè a pa.

²⁰ Aman Sihon a woya a mva ta civèɗ a ndohi Israel a ta bizhè a pa ɓai. A Sihon a mɓic ta ndohi nengaʼa, a ta ɗaha va te Jahats, a ta gu var a Israel.

²¹ A Ndo nzi pèc pècèk, Zhiklè Israel, a mpa ta Sihon a ndohi nengaʼa tèlèba a ri a ndohi Israel, a ta bazl ta. A ta duma kokwar ndohi Amor man ta nza te pa.

²² Ta duma kokwar Amor tèlèba, a hinè te Arnon, ha ndè Jabbok, a hinè tʼhèshèkèɗ, ha ndè a ma woyam Jourdain.

²³ Ar haha Ndo nzi pèc pècèk, Zhiklè Israel, a ndzar ta ndohi Amor auda a ma ndohi Israel, ndohi nengaʼa. A ka, ka woy a ka cè kokwar ta ani dè?

²⁴ Aman Kemosh zhiklè ngaya, a va ka kokwar, a ngaya ka bi dè? Aman Ndo nzi pèc pècèk, Zhiklè nga, a mva nga kokwar a nga, a nga nga ka ɓi ɗè?

²⁵ Ani mʼmbela ka, a géɗ Balak, kra Tsippor, bi Moab, dè? Nengaʼa a mvurslo ma a Israel dè, a ngu var a tengaʼa dè?

²⁶ Israel a nʼnza te Hesbon, a sam man a tsagiaʼa, te Aroer, a sam man a tsagiaʼa, a kokwar tèlèba a ma woyam Arnon, mvi 300. Kin dzar ta te ndev nasa ɓi èhèmè?

²⁷ Iyè, i gu mali a sam ngaya ɓai, aman ka ka gu skwi ambaɓiaʼa a sam ga, a géɗ man kin gi var a iyè. Ndo nzi pèc pècèk, man a gi kita, da bozl kita te ndev nga, ndohi Israel a ndohi Ammon, a patsna!

²⁸ Aman bi ndohi Ammon a mfa ta gèɗ a ma ndohi sak Jephthé ɓai.

Jephthé a gèɗ ma a hai

²⁹ Mèzhèɓ Ndo nzi pèc pècèk a zhè a géɗ Jephthé, a nengaʼa a mdo Galaad, a mdo Manassé, a mdo Mitspa, te Galaad. Te Mitspa te Galaad a mdo a sam ndohi Ammon.

³⁰ Jephthé a ngaɗa na ma a hi a Ndo nzi pèc pècèk: Aman ka paka ta ndohi Ammon a ri ga,

³¹ a i shkè ngwai te var ndohi Ammon, ko skwi mèmè man a shkè auda te gi ga a nga zli gèɗ a vna, a Ndo nzi pèc pècèk. I da ndara na Zhiklè.

³² A Jephthé a ndo a sam ndohi Ammon, aman a ngi var a tengaʼa; a Ndo nzi pèc pècèk a mpe ta a ri a nengaʼa.

³³ A mbazl ta, a hinè te kokwar Aroer, ha ndè a tsagi Minnith (kokwar 20), ha ndè Abel-Keramim, ta fen ta kumba. Aranta Zhiklè a mʼmanda ta gèɗ a hai a ndohi Ammon a sam ndohi Israel.

³⁴ Aman Jephthé a mshkè ngwai a kokwar Mitspa, a sam gi nengaʼa, dem nengaʼa a mshkè auda te gi nengaʼa, aman ta zli gèɗ, a dakocèr, a gècè. Dem nengaʼa staɗgenè. Ko nguraʼa ngiɗè azɓai, dem ngiɗè azɓai.

³⁵ Aman a nrkaʼa, a nkuratsa maslaka nengaʼa aussa, a ngaɗa: Woba dem ga, ka zlamay ndav! Ka fay nlèyè a gèɗ! Iye, i gaɗa na ma a hi a Ndo nzi pèc pècèk, man a fena wuɗi ga, ani i slaha a i mindè a deɓa asaɓai.

³⁶ A nengaʼa a ngaɗa na: Bab ga, ka gaɗda ma a hi a Ndo nzi pèc pècèk, a fena wuɗi ngaya. Aman gau ara man ka gaɗa na ma a hi a Ndo nzi pèc pècèk, a géɗ man a mpe ta mayamhi ngaya, ndohi Ammon, a ri a ka.

³⁷ Te deɓaʼa a ngaɗa na bab na: Skwi staɗ i jhèɗè a sam ngaya. Keɗayè gèɗèʼa ki cèw dai! I dè za a i lèyè a géɗ dali ga, nga a mandalahi ga.

³⁸ A nengaʼa a ngaɗa na: Do genè! A njèkeda ki cèw. A nengaʼa a mdo, a nda mandalahi na, a lèyè dali na te za.

³⁹ Te deɓ ki cèw a mshkè a deɓa a sam bab na, a nengaʼa a ngau, ara man a ngaɗa ma a hai. Dam a sun baki ɓai. A skwi haha a gi a skwi tsuf Israel:

⁴⁰ A mvi a mvai dalahi Israel ta dè a ta kuɗi dem Jephthé te Galaad, mʼmèn 4, a mvi a mvai.