Juges 10 - Ma Zhiklè

Thola a Jair

¹ Te deɓ Abimélec, Thola, kra Pua, kra Dodo, ndo Issacar, a nslambaɗa, a woya a ntakaha Israel. A nʼnza te Shamir, te za Ephraim.

² A ngu a ndo mbèzlè kita Israel mvi 23. Te deɓaʼa a mʼmets na, a ta rda a Shamir.

³ Te deɓ nengaʼa Jair te Galaad a mshkè. Nengaʼa a mbazla kita ndohi Israel mvi 22.

⁴ Wudahi nengaʼa 30, to do a deɓ kɗèh, kɗèhi 30, a nven ta a kokwar 30 man ta baha ta kokwar Jair, ha patsna. Ta te kokwar Galaad.

⁵ Te deɓaʼa Jair a mʼmets na, a ta rda a Kamon.

Ndohi Ammon ta ga na matakwan a Israel

⁶ Te deɓaʼa ndohi Israel ta za gu skwi man ambaha Ndo nzi pèc pècèk ɓi zaʼa. Ta dzodzor Baalhai a Astarté, zhiklèhi Syrie, zhiklèhi Sidon, zhiklèhi Moab, zhiklèhi Ammon, zhiklèhi Philistie, a ta jèkeda Ndo nzi pèc pècèk, ta dzadzara ɓai.

⁷ A Ndo nzi pèc pècèk a ngu ndav kumba a gèɗ Israel, a mpre ta ma a ri ndohi Philistie, a ri ndohi Ammon.

⁸ Ta ɓurte ta, ta ga ta matakwan a ndohi Israel a vi sa, te deɓaʼa mvi 18, ndohi Israel tèlèba man ta nza te wud woyam Jourdain, te kokwar ndohi Amor te Galaad.

⁹ A ndohi Ammon ta tawaɗa woyam Jourdain, aman ta da gi var a ndohi Juda, a ndohi Benjamin, a ndohi gi Ephraim. A ndohi Israel ta lèyè kumba.

¹⁰ A ndohi Israel ta kuɗi a sam Ndo nzi pèc pècèk, a ta gaɗa na: Nga gu malai a sam ngaya, a gèɗ man nga jèkeda Zhiklè nga, a nga dzodzor Baalhai.

¹¹ A Ndo nzi pèc pècèk a ngaɗa ta ndohi Israel: Ndohi Egypte, ndohi Amor, ndohi Ammon, ndohi Philistie,

¹² ndohi Sidon, ndohi Amalek a Maon ta ga kinè matakwan, a kin kuɗau a sam ga. A i preka kine auda te ri tengaʼa ka ɓi dè?

¹³ Aman kin jèkyè, a kin dzodzor zhiklèhi ngiɗè. Gar haha a ma ma i takaha kinè asaɓai.

¹⁴ Vo-do, a kin kuɗau a sam zhiklèhi man kin ngotso a ri kinè. Tengaʼa da mbel kinè a pats matakwan kinè!

¹⁵ A ndohi Israel ta gaɗa na Ndo nzi pèc pècèk: Nga gu malai. Ga nga ara man ka woyaʼa. Aman kam kam, a patsna mbel nga di genè!

¹⁶ A ta wusheda zhiklèhi ngiɗè aussa a sam ta, a ta dzodzor Ndo nzi pèc pècèk, a ta si Ndo nzi pèc pècèk te va, a gèɗ matakwan tengaʼa.

¹⁷ A ndohi Ammon ta ɓica va a var te Galaad. A ndohi Israel ta ɓica va a var te Mitspa.

¹⁸ Ndohai a bihi sojè Galaad ta goɗ a va ta: Ndo ndè zlèr var a ndohi Ammon wa? Nengaʼa a da gi bi a gèɗ Galaad tèlèba!