Juges 1 - Ma Zhiklè

Juda a Siméon ta düm kokwar

¹ Te deɓ mʼmetsi Josué, ndohi Israel ta dzhoɗo a sam Ndo nzi pèc pècèk, a ta gaɗa: Ndè a ngi var a ndohi Canaan te va nga wa?

² A Ndo nzi pèc pècèk a ngaɗa: Juda do do! I va na kokwar haha a ri a nengaʼa ma.

³ Juda a ngaɗa na Siméon, kramam na: Washkè a verzi ga a kokwar man i ngotso a jimèr, a nda gi var a nda ndohi Canaan. Te deɓ nengaʼa i ba i dè a verzi ngaya a kokwar man ka ngotso a jimèr. A to do a Siméon.

⁴ A ndohi Juda to do a nda gi var, a Ndo nzi pèc pècèk a mpa ta ndohi Canaan a Phérez a ri a tengaʼa. Ta bazl ta ndohi 10.000 te Bézek.

⁵ Te Bézek ta zlü gèɗ a Adoni-Bézek, a ta gu var a vna zaʼa. Ta fa ta gèɗ a ndohi Canaan a Phéréz.

⁶ Adoni-Bézek a mhu na, a ta hu a verzi nengaʼa. Ta gso a ta ngelama na babgi-ri cèw a babgi-sak cèw.

⁷ Adoni-Bézek a ngaɗa: Bihi 70 man i ngelama ta babgi-rai a babgi-sak, ta ndau boborɗi skwi tʼhwaɗ table ga. Zhiklè a pela di man i gau. Ta da a kokwar Jérusalem, a mʼmets na te pa.

⁸ Ndohi Juda ta gu var a Jérusalem, ha ta dumaʼa, a ta bazl ta ndohi kokwar a tsakwal, a ta fa na vogwa a kokwar.

⁹ Te deɓaʼa ndohi Juda ta shkè a ta da gi var a ndohi Canaan man ta nza te za, te Negeb, a vara.

¹⁰ Ndohi Juda to do a ta gi var a ndohi Canaan man ta nza te Hébron (Hebron, ta baha na zlèzlèa Kirjath-Arba). Ta bazl ta ndohi te kokwar Shesai, Ahiman a Talmai.

¹¹ Ta jèkeda samaʼa, a to do a ta da gi var a ndohi Debir (Debir ta baha na zlèzlèa Kirjath-Sépher).

¹² Caleb a ngaɗa: Ndo man a da duma kokwar Kirjath-Sépher, i da va na Acsa, dem ga, a ngwoz.

¹³ A Othniel, kra Kenaz, mbegèɗ Caleb a ndumaʼa. A Caleb a mva na Acsa, dem nengaʼa, a ngwoz.

¹⁴ Aman a nshkè a gi bakai, Acsa a mpoko na gèɗ auda, da dzhoɗo gi dau ngiɗè a sam bab na. Acsa a nʼnzevahi a deɓ kɗèh, a Caleb a ngaɗa: Nʼnga ka mè?

¹⁵ A nengaʼa a ngaɗa: Vay skwi mbalai, ga i dè ga! Ka viyè a ngwoz a kokwar Negeb, vay sam man nlelè iyam ba a pa! A Caleb a mva na sam man nlèlè iyam a pa, te man a géɗèʼa, te man a godok ba.

¹⁶ Ndohi te verzi ndo Ken, mèsh Moise, ta shkè te kokwar Gangar a nda ndohi Juda, a to do hèshèkèɗ Arad, te civèɗ dukwaɗ, a ta nza a nda ndohi Amalek.

¹⁷ Juda a Siméon, kramam na, to do a ta bazl ta ndohi Canaan man ta nza te Tsephath. Ta gedassa tèlèba, a ta baha na kokwaraʼa Horma.

¹⁸ Te deɓaʼa Juda a nduma Gaza ba a sam man a tsagiaʼa, a Askalon ba a sam man a tsagiaʼa, a Ekron ba a sam man a tsagiaʼa.

¹⁹ Ndo nzi pèc pècèk a zhè a nda Juda, a ta ceda za a ma. Aman ndohi a vara, ta slaha ta dzam ta ɓai, te man ta ngots kiki var.

²⁰ Ta va na Hébron a Caleb, ara man Moise a ngoɗa, a nengaʼa a ndzam ta wudahi Anak makar te pa.

²¹ Ndohi Benjamin ta dzam ta ndohi Jébus te kokwar Jérusalem ɓai, a ndohi Jébus ta nza te Jérusalem a nda ndohi Benjamin, ha patsna.

Joseph a nduma Béthel

²² Ndohi Joseph, tengaʼa ba, to do a ta gu var a Béthel, a Ndo nzi pèc pècèk a zhè a nda tengaʼa.

²³ Ndohi Joseph ta zeɓi kokwar Béthel (nzlembaɗ kokwar te va nasa Luz).

²⁴ Ndohi nzebi kokwar ta rka ndo man a mshkè auda te kokwar, a ta gaɗa na: Ngra nga civèɗ a nga bizhè a pa a nga da düm kokwar, a nga da jèka ka nshèffè.

²⁵ A nengaʼa a nʼngra ta civèɗ man ta bizhè a pa, a ta duma kokwar, a ta bazl ta ndohi kokwar a tsakwal. Aman masli sa a ndohi gi nengaʼa tèlèba ta jèka ta.

²⁶ A nengaʼa a mdo a kokwar ndohi Heth, a nrom kokwar mbiaʼa a pa, a mbaha na Luz. Nasa nzlembaɗ nengaʼa ha patsna.

Manassé a Ephraim ta duma kokwar

²⁷ Manassé a nduma Beth-Shean, aman a ndzam ta ndohi nengaʼa a ndohi man a tsagai, Taanak a ndohi kokwar man a tsagiaʼa, Dor a ndohi kokwar man a tsagiaʼa, Jibleam a ndohi kokwar man a tsagiaʼa, Meguiddo a ndohi kokwar man a tsagiaʼa ɓai. Ndohi Canaan ta tilda verzi ta a pa.

²⁸ Aman ndohi Israel ta ngots wuɗai, ta pe ta ndohi Canaan a mizlinè ɓèlè; aman ta slaha ta dzam ta ɓai.

²⁹ Ndohi Ephraim ta dzam ta ndohi Canaan man ta nza te Guézer ɓai, a ndohi Canaan ta nza a va tengaʼa, te Guèzer.

Verzi ndohi ngiɗè ta duma kokwar

³⁰ Zabulon a ndzam ta ndohi te Kitron ɓai, a ndzam ta ndohi te Nahalol ɓai, a ndohi Canaan ta nza a va tengaʼa; aman ta gu mizlinè ɓèlè.

³¹ Aser a ndzam ta ndohi te Acco ɓai, a ndzam ta ndohi te Sidon ɓai, a ndzam ta te Achlal, te Aczib, te Helba, te Aphlik, te Rehob ɓai.

³² A ndohi Aser ta nza te ndev ndohi Canaan, ndohi kokwar sa daga zlèzlèa, a géɗ man ta dzam ta ɓai.

³³ Nephthali a ndzam ta ndohi Beth-Shémésh ɓai, a ndzam ta ndohi Beth-Anath ɓai, a ta nza te ndev ndohi Canaan, ndohi kokwar sa daga zlèzlèa. Aman ndohi Beth-Shémesh a ndohi Beth-Anath ta gu mizlinè ɓèlè a sam tengaʼa.

³⁴ Ndohi Amor ta dzam ta ndohi Dan a za, ta va ta civèɗ man a ta shkèhi a vara azɓai.

³⁵ Ndohi Amor ta sassaya di ta, aman a ta nzi te Har-Héres, te Ajalon, te Shaalbim. Aman ri ndohi Joseph a nʼnza ta a gèɗ kumba, a ta pe ta ndohi Amor a mizlinè ɓèlè.

³⁶ Sam ndohi Edom a hüno a sam za Akrabbim, ha ndè Séla, ha ndè a géɗèʼa.