Jude 1 - Ma Zhiklè

Mbalai

¹ Jude, ɓèl Yèsu Kristi, kramam Jacques, a sam ndohi man Zhiklè a baha ta, man Zhiklè, Bab nga, a woy ta, a Yèsu Kristi a ɓer ta.

² Kin da su Zhiklè te va kumba! A gumi a mwoy-ndo a ndav da zhè kumba a sam kinè!

Kita a géɗ ndohi njèngè ncèkèlma

³ Kinè dalahimam ga! Nshèlèkuraʼa i huro ara man i windè lanè ma a géɗ skwi mʼmbel nga man nga a nda kinè, nga ngotso. Aman te deɓaʼa i gaɗa, sèi i bid kinè te ɗèlèwèr ga, aman kin gi var a kin nza na a deɓa a ncè-a-nɗav man Zhiklè a mva ta ndohi na, sak staɗ a mèdèp.

⁴ Ndohi faɗkata ta wuca kinè va, kita tengaʼa mwindèa nʼnzi a zhè aranta ma: tengaʼa ndohi man ta woy Zhiklè ɓai, ta ngwode pombi Zhiklè nga a ntétékè tengaʼa, a ta cèkèlma a géɗ Bi nga Yèsu Kristi, ndo ncè nga ma staɗgenè.

⁵ Kin sun tèlèba ma: a i woy a i hodko kinè ma a gèɗ: Bi Zhiklè man nshèlèkuraʼa a takaha ta ndohi Israel a ta shkè auda te kokwar Egypte, a mbazl ta pats ngiɗè te deɓaʼa, a géɗ man ta ca a ndav ɓai.

⁶ Va-hur golahi Zhiklè ba; aman ta ɓera maya man ta ngots te ri Zhiklè ɓai, a ta jèkeda sam nzi ta, Zhiklè a ndzaw ta te ruva a cèlèlèu a mèdèp, ha pats kita mbiaʼa.

⁷ Va-hur Sodome a Gomorrhe a kokwarhi man a tsagiaʼa, man ta gu mphömè lèmèlèmè ara golahi Zhiklè, a ta dzodzor ntétékè tsaɗ tsaɗ tʼhai. Ta fa ta kita a gèɗ te vogwa a mèdèp, a ndohi tèlèba ta slaha a ta hèrèʼa.

⁸ Lèmèlèmè tengaʼa man ta nza herzlawaʼa, man ta lizha va ta, ta woy Zhiklè a bi ta ɓai, a ta dérɗè skwi Zhiklè nʼnzalaʼa.

⁹ Michel, bigol Zhiklè, man ta bozl va a madzagai a géɗ nckondo Moise, a woya a mphomde madzagi ɓai, a ngaɗa: Bi Zhiklè da ga ka kita a gèɗ!

¹⁰ Aman ndohi haha ta ngwèshè a skwi man ta sun ɓai. Ar skwi man ta slaha a ta suna a zhè; aman ta ara skwi dakhai, man ta sun skwi ɓai, ta gedassa va ta a ri ta.

¹¹ Wobau a géɗ tengaʼa! Ta beza a civèɗ Cain, a ta gu mali ara Balaam a géɗ sulai, a ta bazl ta lèmèlèmè ara ndohi nrubi Coré.

¹² Tengaʼa skwi horai, man ta gi hori ngi golahwaɗ azɓai, man ta ɓicè va a sam skwi nʼndai, a ta war va ta genè. Tengaʼa ta ara vanai man iyam a te pa ɓai, man kozlar a patsedaussa; wofhi man ta yi azɓai, ko tiɗè sama ma, ta bazl ta, a zluzlor tʼuda;

¹³ ngid va iyam mbiaʼa, man a hubatka skwi hori tengaʼa man ta gau, auda; bantihai man ta wush ta hai, man sam nʼnzi ta te ruva ntéɗèɗikaʼa a mèdèp.

¹⁴ Enoch ba, ndo matsaraɗaʼa te verzi Adam, a nhodko ma a géɗ tengaʼa, a ngaɗa: I rka Bi Zhiklè a shkè a nda ndohi nkezlaʼa gozhèm gozhèm kumba,

¹⁵ aman a gi kita a géɗ ndohi tèlèba, a ngra ta mali a ndohi tèlèba man ta woy civèɗ Zhiklè ɓai, a ngra ta ndérɗè ma tèlèba man ndohi malihai, man ta woy civèɗ Zhiklè ɓai, ta durɗo Zhiklè a vna.

¹⁶ Tengahi ndohi man ko skwi mèmè ambaha ta ɓai, ta kuɗi a va, a ta jèjèr ntétékè tengaʼa. Ta gèɗ ma nfi va, a ta shi-bèndè ndo, aman ta ngècè skwai.

Ma nʼngatsa nga maya

¹⁷ Aman kinè, dalahimam ga, va-hur ma man ndohi sak Bi nga Yèsu Kristi ta gaɗa kinè halaʼa.

¹⁸ Aman ta gaɗa kinè, man ndul ndul ndikèma skwi tèlèba, ndohi ndérɗè ndo ta zhè, man ta jèjèr ntétékè te ndav tengaʼa, man ambaha Zhiklè ɓai.

¹⁹ Tengaʼa ta poko ta gèɗ auda a ta kezla ndohai. Ta hér skwi herkeda. Ta ngatsa Mèzhèɓ Zhiklè ɓai.

²⁰ Aman kinè, dalahimam ga, va-gra a ma ma te ncè-a-ndav nkezlaʼa a vava, va-tsu ri te Mèzhèɓ Zhiklè nkezlaʼa,

²¹ va-ɓür va kinè te mwoy-ndo Zhiklè, vo-zhoro aman Bi nga Yèsu Kristi a va kinè nshèffè a mèdèp, a géɗ man nga sia te va.

²² Ndohi man ta pi gèɗ cèw da se kinè te va;

²³ va-ngazlka ta auda te vogwa, va-mbel ta! Tengahi ngiɗè da se kinè te va, aman va-gu zlau; va-gu shèwa a ntétékè tengaʼa man a lizhè ndav ta.

Mpshè ma

²⁴ A nengaʼa, man a slaha a mɓer kinè, aman kin kèlèhi a mali azɓai, aman a zlatsede kinè a sam di na a nʼnjèl na, jè-lèlèʼa, a mwuffe,

²⁵ a Zhiklè staɗgenè man a mbel nga te Yèsu Kristi, Bi nga, nʼnjèlè nslébèrdè, wuɗai a wuɗi-bai, te nhinkaɗ na, antanta, a ndè a ma ma a mèdèp. Amen.