Josué 9 - Ma Zhiklè

Maya vaya ndohi Gabaon

¹ Aman bihi tèlèba man ta nza te wud woyam Jourdain, te za, tʼhèshèkèɗ, a ma iyam mbiaʼa tèlèba, ha ndè Liban: Heth, Amor, Canaan, Phérez, Hévi a Jébus, ta tsena skwi haha,

² ta mba ma ta staɗ, aman a ta gi var a Josué a ndohi Israel.

³ Ndohi kokwar Gabaon ba ta tsena skwi man Josué a ngu te kokwar Jéricho a Ai.

⁴ Tengaʼa ta gu maya vaya. To do a ta peda skwi a gozhèm; ta manda bho mʼmovaʼa a deɓ kɗèh, a gozhèm hutèɗ man barassa te pa, man nkuratsaʼa a ta tseda pa.

⁵ Ta peda kotokoroh mʼmovaʼa man ta ɗaheda pa a sak. Ta feda maslaka nhalaʼa a va; movar tengaʼa te gozhèm ngworaʼa, nhus na ma.

⁶ A to do a sam Josué, a Guilgal, a sam man ta mana a pa, a ta gaɗa ta ndohi Israel: Nga shkè te kokwar dra; ngo-durzlokoy ma a nda kinè!

⁷ A ndohi Israel ta gaɗa ta ndohi Hévi: Gar kin ndohi man a haha, nga slaha nga dérzlè va a nda kinè dè?

⁸ A ta gaɗa na Josué: Nga ɓèlèlihi ngaya. Josué a ngaɗa: kinè wa, kin shkè tema?

⁹ A ta gaɗa na: Nga shhkè te kokwar dra, nga ɓèlèlihi ngaya, a nga shkè a nzlembaɗ Ndo nzi pèc pècèk, Zhiklè ngaya. Nga tsena labar ma nengaʼa a skwi tèlèba man a ngu te kokwar Egypte,

¹⁰ skwi tèlèba man a nʼnga ta bihi ndohi Amor cèw, Sihon, bi Hesbon, a Og, bi Basan, man ta nza te wud woyam Jourdain, te Ashtaroth.

¹¹ Gar haha ndohi nga nhalaʼa a ndohi te kokwar nga tèlèba ta gaɗa nga: Va-peda skwi a gozhèm, vo-do a civèɗ, a kin da zli gèɗ a nda ta. Kin da gaɗa ta: Nga ɓèlèlihi kinè, ngo-durzlokoy ma a nda kinè.

¹² Movar haha nga pokoɗa gozhèm nga, shuka dai, a nga slambaɗka te ngwai a nga shkè a sam kinè. Na haha ngwor na ma, nhus na ma.

¹³ Hutèd barassa man nga ɓalda pa, mɓuaʼa dai, anai nkuratsa ma. Maslaka nga, a kotokoroh nga, na haha a nʼnde na a civèɗ.

¹⁴ A ndohi Israel ta tor skwi nʼndi tengaʼa, a ta fu gèɗ a ma tengaʼa, a ta dzhaɗa Ndo nzi pèc pècèk ɓai.

¹⁵ A Josué a ntsu gumi a tengaʼa, a nderzla ma a nda tengaʼa, aman a da jèka ta nshèffè. A ndohi mbibihiaʼa te va mpi ndohai ta gaɗa ta a mʼmbèɗè.

¹⁶ Te deɓ mʼmèn makar, man ta derzla ma a nda tengaʼa ma, ta tsenaʼa, ta ndohi man a tsagi ta.

¹⁷ A ndohi Israel ta slambaɗa, a to do, a ta ndikè a kokwar tengaʼa, te mʼmèn mamakaraʼa. Kokwar tengaʼa mbiaʼa: Gabaon, Kephira, Beéroth, a Kirjath-Jearim.

¹⁸ Ndohi Israel ta bazl ta ɓai, te man ndohi tengaʼa mbibihiaʼa ta gaɗa ta a mʼmbèɗè a sam Ndo nzi pèc pècèk, Zhiklè Israel. Aman mpi ndohi tèlèba ta ga ta ma a va ndohi mbibihiaʼa.

¹⁹ A ndohi mbibihiaʼa ta gaɗa ta mpi ndohai: Nga mbaɗa ta a sam Ndo nzi pèc pècèk, Zhiklè Israel; anai nga slaha nga lama ta ɓai.

²⁰ Aman sèi nga da gi maya tsaɗ: Nga jèka ta nshèffè, ara man nga mbaɗa ta. Zhiklè da gu ndav a géɗ nga ɓai.

²¹ A ndohi mbibihiaʼa ta gaɗa ta: anai sèi ta nzi a nshèffè; aman sèi ta gi a ndohi nʼngél shègwa, a ndohi mɓèl iyam a sam ndohi Israel tèlèba. A gu ara man ndohi mbibihiaʼa ta gaɗa.

²² Josué a mbaha ta, a ngaɗa ta: Kin ngwode nga èhèmè, a kin gaɗa nga: Nga shkè dra a vata, ndèkèm kinè ndul ndul a nga.

²³ Anai kin phomdaʼa, kin gi ɓèl nga, staɗ staɗ tèlèba a mèdèp; kin da ngél shègwa, kin da ɓèl iyam te gi Zhiklè ga.

²⁴ A ta mbeɗa na ma a Josué: ɓèlèlihi ngaya ta tsenaʼa, ara man Ndo nzi pèc pècèk, Zhiklè ngaya, a njè na ma a gèɗ a Moise, ɓèl na: i da va kinè kokwar tèlèba; a ndohi kokwar tèlèba ta da bazl ta a ma kinè, ar na. A nga gi zlau nshèffè nga a sam kinè, a nga gokoɗ ar haha.

²⁵ Anai nga te ri ngaya ma: skwi man ka woy a ka ga nga, gau mènè!

²⁶ A nengaʼa a ngau a sam ta arsa: a mʼmbel ta te ri ndohi Israel, ta bazl ta ɓai.

²⁷ Aman a pats nasa Josué a nge ta a ndohi nʼngél shègwa a ndohi mɓèl iyam a sam mpi ndohi Israel, a sam mvi skwi a Ndo nzi pèc pècèk, a sam man Zhiklè a nʼngra ta, a ta rèm gi Zhiklè a pa. Ha patsna arsa.