Josué 8 - Ma Zhiklè

Ta duma Ai

¹ Ndo nzi pèc pècèk a ngaɗa na Jo-sué: Ka gu zlau ɓai, ka gudzu ɓai! Baha ta ndohi var tèlèba a verzi ngaya, slambaɗa, a kin do a kin gu var a kokwar Ai. Na haha, i va ka bi Ai a ndohi nengaʼa, kokwar nengaʼa, a herkeda nengaʼa, a ri a ka!

² Ka da gi a Ai a bi nengaʼa, lèmèlèmè ara man ka gu a Jéricho a bi nengaʼa. Aman skwi tengaʼa, skwi kuɗom ta, va-hulo a kin kezla a va kinè! Pau nzliagai a tsagi kokwar, te civèɗ nkèl pats, a ta dzadzar ta te deɓa.

³ Josué a nslambaɗa a nda ndohi var tèlèba, aman ta dè a kokwar Ai. A Josué a mparka ta ndohi var, slagamhi 30.000, a nzlinde ta a vaɗ.

⁴ A njè ta ma a gèɗ, a ngaɗa: Va-gu maya! Va-pau nzliagai te civèɗ nkèl pats, a kin nza dra a sam kokwar ɓai, va-tila va!

⁵ Iyè a ndohi tèlèba man ta zhè a sam ga, nga woya nga dè zuraʼa a kokwar. Te deɓaʼa man ta da zli gèɗ a nga, lèmèlèmè ara matsa, nga da hi nga.

⁶ A tengaʼa ta da haka nga a verzai, ha nga bidka ta auda te kokwar dra. Ta da gaɗa: Nga dzam ta lèmèlèmè ara matsa. Nga hi nga,

⁷ a kinè ndohi nzliagai kin slambaɗkaɗa a kin duma kokwar, te man Ndo nzi pèc pècèk, Zhiklè kinè, a va kinè kokwar a rai.

⁸ Aman kin duma kokwar ma, va-fa na vogwa, va-gu ara man Ndo nzi pèc pècèk a goɗa. Na haha, iyè man i njè kinè ma haha a gèɗ.

⁹ Ar haha Josué a nzlinde ta, a ta pau nzliagai, a ta nza te ndev Béthel a Ai, a ta ɓica va a tsagi kokwar Ai, te civèɗ nkèl pats. Aman Josué a mʼmana a sam ndohi na a vaɗ sa.

¹⁰ A prèk te gai, Josué a nslambaɗa, a mparka ta ndohai, a mdo a nda ndohi Israel nhalaʼa, a ma ndohai, a kokwar Ai.

¹¹ Ndohi var tèlèba man to do a vna, to do a ma, a ta shkè a ma kokwar, a ta mana a tsagi kokwar te civèɗ man a géɗèʼa, nkulgodok te ndev tengaʼa a Ai.

¹² Josué a nhul ndohi 5.000, a mpe ta a nzliagai, te ndev Béthel a Ai, a tsagi kokwar te civèɗ nkèl pats.

¹³ A ta ɗah ta ndohai, ndohi var tèlèba man ta zhè a sam kokwar te civèɗ man a géɗèʼa; ndohi nzliagai te civèɗ nkèl pats. A vaɗ sa, Josué a mdo a ndev nkulgodok.

¹⁴ Aman bi Ai a nrkaʼa, ndohi kokwar ta slambaɗa tsam tsam a prèk te gai, aman ta dè a ta da gi var a ndohi Israel. Bai a ndohi var nengaʼa tèlèba to do a sam man ta sulomkaɗahi nshülömè, a dal Arabah, a sun a ngaɗa ta pau nzliagi a tsagi kokwar te civèɗ nkèl pats ɓai.

¹⁵ A ta dzam ta Josué a ndohi Israel tèlèba, a ta hu ta a civèɗ ndè hèshèkèɗ.

¹⁶ A ta ɓic ta ndohi te kokwar tèlèba, aman ta hi a verzi tengaʼa. A ta hu a verzi Josué, man a bidka ta auda te kokwar, dra.

¹⁷ Ko ndo staɗ ta jèka ta kokwar Ai a Béthel ɓai. Tèlèba ta hu a verzi ndohi Israel. A ta jèkeda ntamag kokwar mwinèa a pa, a ta hu a verzi Israel.

¹⁸ A Ndo nzi pèc pècèk a ngaɗa na Josué: Geda tsakwal nte ri ngaya aman kokwar Ai. I woy a i va ka a ri a ka. A Je sué a ngeda tsakwal nte ri na aman a kokwar Ai.

¹⁹ A nasa nasa, man a ngeda rai ndohi ta hakaɗauda te nzliagai, a sam man ta ngheda va a pa, ta hu a kokwar, ta dumaʼa. Tsam tsam ta fa na vogwa kokwar.

²⁰ Aman ndohi Ai ta pu di deɓa, ta rka vodzok a düzhè te kokwar ta A ta ngatsa civèɗ man ta hi ta ɓai. A ndohi Israel man ta hu ta a civèɗ ndè hèshekèɗ, ta ngwodko ta va a gèɗ a ndohi Ai man ta hu a verzi ta.

²¹ Josué a ndohi Israel tèlèba ta rkaʼa, ndohi nzliagai man dzadzar ta te deɓa ta duma kokwar m vodzok a düzhè te kokwar, ta ngwoda va a gèɗ, a ta bazl ta ndohi Ai.

²² A tengahi ngiɗè te kokwar ta shkè, a ndohi Israel ta derzl ta ndohi Ai a pa, ta shkè tsagi cèw. A ta bazl ta, ko staɗ ta jèka ɓai, ko staɗ azɓai man a hu na, man a mbel na.

²³ Bi Ai, ta gseda rai, a ta daʼa a sam Josué.

²⁴ Aman ndohi Israel ta ndev ta ndohi Ai a dal var tèlèba klèng ma, tʼhèshèkèɗ, a sam man ta hu a verzi tengaʼa, a ta bazl ta ndohi tèlèba a tsakwal ma, ndohi Israel tèlèba ta men ta a deɓa a kokwar Ai, a ta bazla njèkèɗia te kokwar a tsakwal.

²⁵ Ndohi man ta bazl ta a pats nasa, ngurhi a ngwozihai, ta gi 12.000, ndohi kokwar Ai tèlèba.

²⁶ Josué a mʼmanda ri a hi a tsakwal te pa ɓai, ha ta gedassa ndohi Ai tèlèba.

²⁷ Sèi skwi kuɗom a kolongwi kokwar, ndohi Israel ta hulo, ara man Ndo nzi pèc pècèk a gaɗa na Josué.

²⁸ Te deɓaʼa Josué a nfa na vogwa a kokwar Ai, a ndumdaussa a mèdèp, a nʼnde na a sam dikai, ha patsna.

²⁹ Bi Ai, ta kelawda a wof, ha dakwad. Aman pats nkala ma, Josué a ngaɗa, aman ta ckoɗi nckondo a hi te wof, a ta kaldaussa a dal kokwar, a ta tsama, na kwa a deɓa a vata, ha patsna a zhè.

Sam mvi skwi a Zhìklè a géɗ za Ebal

³⁰ Te deɓaʼa Josué a nrom sam mvi skwi a Ndo nzi pèc pècèk, Zhiklè Israel, a géɗ za Ebal,

³¹ ara man Moise, ɓèl Ndo nzi pèc pècèk, a njè ta a gèɗ a ndohi Israel, ara man ta Windo te ɗèlèwèr ma kita Moise: sam mvi skwi a Zhiklè a kwa, mwal ɓai, man ta pasla ka ɓai. A ta ndara na skwi a Ndo nzi pèc pècèk a pa, a ta zlaha na skwi te nshid gèɗ.

³² Te pa a mco ma kita man Moise a mwindo a sam ndohi Israel, a mwindeda a kwa lèmèlèmè arsa.

³³ A ndohi Israel tèlèba, a ndohi nhalaʼa, a malamhi nengaʼa, a ndohi kita nengaʼa, ta zlatsa, te tsagi cèw, a sam koti nderzlè-ma, zuraʼa a ma ndohi mvi skwi a Zhiklè, ndohi Lévi, man ta zuɓ koti nderzlè-ma Ndo nzi pèc pècèk; ko mbrokihai, ko ndohi kokwaraʼa. Rèta ngiɗè te civèɗ za Garizim, rèta ngiɗè te civèɗ za Ebal, ara man Moise, ɓèl Ndo nzi pèc pècèk a njè ta a gèɗ zlèzlèa, a ta pshè ta ma ndohi Israel.

³⁴ Te deɓaʼa a njongo ma kita Zhiklè tèlèba-ma mpshè ma, a ma mphömdè ndo – ara man mwindeda ɗèlèwèr ma kita.

³⁵ Te va ma man Moise a njè ta a gèɗ, ko staɗ azɓai, man Josué a njènga ta ndohi Israel mɓicaʼa ɓai. A njènga ta ndohi Israel tèlèba, a ngwozihi ba a wudahi a mbrokihi ba man to do a verzi tengaʼa.