Josué 7 - Ma Zhiklè

Acan a gi metsar

¹ Aman ndohi Israel ta gu maharam skwi mphomdaʼa: Acan, kra Carmi, te verzi Zabdi, te verzi Zérach, gwoli Juda, a nco te va skwi mphomdaʼa kètè. A Ndo nzi pèc pècèk a ngu ndav a géɗ ndohi Israel.

² Josué a nzlinde ta ndohi te Jéricho, a ta dè Ai, a tsagi Beth-Aven, a tsagi Béthel, te civèɗ mvèng pats, a ngaɗa ta: Vo-do, va-zeɓa kokwar! A ndohi to do, aman ta zeɓi Ai.

³ Aman ta shkè a deɓa a sam Josué, ta gaɗa na: Ko ndohi var ta shkè tèlè ɓai, sèi 2.000 man ɓai 3.000, a ta duma Ai. Ka geda ta matakwan a ndohi tèlè ɓai! Ndohi Ai ta az a vata ɓai.

⁴ Te va ndohi Josué 3.000 to do, a ta hu ta auda a sam ndohi Ai.

⁵ Ndohi Ai ta bazl ta ndohi Josué a gi 36, a ta dzamka ta njèkèɗi ndohai auda a ntamagi kokwar, ha ndè a Shebarim. A ta bazl ta, man ta sulomahai a godok. A ndav ndohi Josué a mʼmbeɗ na, a ngwodama ta gèɗ.

⁶ A Josué a nkuratseda maslaka nengaʼa aussa, a nkalahi a herkeda a medi na, a sam koti nderzlè-ma Ndo nzi pèc pècèk, ha dakwad, a ndohi nhalaʼa te Israel a nda nengaʼa, a ta peda hutsoɗ a gèɗ.

⁷ A Josué a ngaɗa ta: Ai, ai, ai – Bi Zhiklè, Ndo nzi pèc pècèk, ka nde ta ndohi haha auda te woyam Jourdain, a ka pa nga a ri ndohi Amor a ta bazl nga èhèmè? Dara man agassa nga nza tʼwud woyam Jourdain!

⁸ Wa Bi Zhiklè, i da gaɗa ta ndohi Israel mè, man ta hu ta a mayamhi ta?

⁹ Ndohi Canaan a ndohi kokwar tèlèba ta da tsenaʼa, ta da tèuda nga a pa, a ta zeda nzlembaɗ nga tʼherkeda. A ka da gi nzlembaɗ ngaya mbiaʼa a mè?

¹⁰ Te deɓaʼa Ndo nzi pèc pècèk a ngaɗa na Josué: Slambaɗa! Ka feda gèɗ ngaya a hi èhèmè?

¹¹ Israel a ngu malai! Ta tawaɗaha nderzlè-ma nga, a ta co te va skwi mphomdaʼa. Ta gu metsar, ta ngheda, a ta peda a va kolongwi tengaʼa.

¹² A ndohi Israel ta slaha ta zlècè a sam mayamhi tengaʼa ɓai. Sèi ta hi ta a mayamhi ta, a gèɗ man ta phomda. Aman iyè, i nzi a sam kinè asaɓai, sèi man kin gedassa skwi mphomdaʼa te ndev kinè kla!

¹³ Slambaɗa dakwa! Tila ndav ndohai! Ka gaɗa ta: Va-tila ndav kinè, a géɗ mangoslèm. Ndo nzi pèc pècèk, Zhiklè Israel, a ngoɗa: Skwi mphomdaʼa a zhè te ndev kinè, ndohi Israel. Kin slaha kin zlècè a sam mayamhi kinè asaɓai, sèi man kin cko skwi mphomdaʼa auda te ndev kinè.

¹⁴ Angoslèm a prèk, verzi ndohi Israel staɗ staɗ tèlèba Sei ta shkè a ta zlècè a sam Ndo nzi pèc pècèk. Verzi ndohai man jimèr Zhiklè a nkala ta a gèɗ, ta shkè a ta zlècè – gwol ndohi ngiɗè, gwol ndohi ngiɗè. Gwol ndohai man jimèr Zhiklè a nkala ta a gèɗ, ta shkè a ta zlècè – ngiɗè a ndohi gi na, ngiɗè a ndohi gi na. Te deɓaʼa gi man jimèr Zhiklè a nkala na a gèɗ, a shkè a ta zlècè, ndo staɗ staɗ tèlèba, ngiɗè a géɗ na, ngiɗè a géɗ na.

¹⁵ A ndo man skwi mphomdaʼa te ri na, sèi ta feda a vogwa, a skwi man a ngotso tèlèba, a géɗ man a ntawaɗaha nderzlè-ma Ndo nzi pèc pècèk, a ngau skwi horai te Israel.

¹⁶ A Josué a nslambaɗa a prèk te gai, a mbaha ta ndohi Israel, verzi staɗ staɗ tèlèba, a jimèr a nkala a gèɗ verzi Juda.

¹⁷ Te deɓaʼa a mbaha ta ndohi te verzi Juda, a jimèr a nkala a gèɗ gwoli Zérach. Te deɓaʼa a mbaha ta gwoli Zérach, staɗ staɗ a géɗ na, a jimèr a nkala a gèɗ Zabdi.

¹⁸ Te deɓaʼa a mbaha ta ndohi gi nengaʼa, staɗ staɗ a gèɗ na, a jimèr Zhiklè a nkala a gèɗ Acan, kra Carmi, te verzi Zabdi, te verzi Zérach, gwoli Juda.

¹⁹ A Josué a ngaɗa na Acan: Kra ga, slubordo Ndo nzi pèc pècèk, Zhiklè Israel! Ngreda na mali ngaya! Gadayè skwi man ka gau, ka ngheda skwi a sam ga ɓai!

²⁰ Acan a mʼmbeɗa na a ma Josué: A vava, iyè i gu malai a sam Ndo nzi pèc pècèk, Zhiklè Israel. I gau kata kata kata.

²¹ Te va kolongwi man ta dumkoɗai, i rka dawar ndohi Shinear mbelaʼa, a Suli gurso 200, a gaɗa guro a gi rèta kilo; a ntétékè a nkedyè, a i co. Na haha dawar a zhè te gi ga, nraʼa te vèvèd, a Suli tʼhwaɗaʼa.

²² A Josué a nzlinde ta ndohi sak a gi nengaʼa tsam tsam, a ta ngots dawar, nraʼa te vèvèd, a Suli tʼhwaɗaʼa.

²³ A ta hul skwi te gi na, a ta hulkoɗi a sam Jo-sué, a sam ndohi Israel tèlèba, a ta wuzhaʼa a sam Ndo nzi pèc pècèk.

²⁴ A Josué a ngso Acan, kra Zérach, a Suli a dawar a guro, a wudahi a dalahi nengaʼa, zlèhi nengaʼa kɗèhi a skwi man a ngotso tèlèba. Ndohi Israel tèlèba ta zhè a sam na. A ta de ta a dal Acor.

²⁵ Josué a ngaɗa: Ka kalde nga a matakwan! Ndo nzi pèc pècèk ba a kalde ka a matakwan a patsna! Te deɓàʼa ndohi Israel ta kola a kwa. Ngiɗè ta keɗaʼa a kwa, a ngiɗè ta fa na vogwa.

²⁶ A ta tsama na kwa a deɓa a vata, kwa a zhè ha patsna. Te deɓaʼa Ndo nzi pèc pècèk a njèkeda ngi ndav. A géɗ nengaʼa ta baha na samaʼa ‘dal Acor’, ha patsna.