Josué 6 - Ma Zhiklè

Ta duma Jéricho

¹ Kokwar Jéricho mpizlèa, nʼngalaʼa a ma ndohi Israel, ndo a dè a pa azɓai, ndo a shkè auda te pa azɓai.

² A Ndo nzi pèc pècèk a ngaɗa na Josué: Na haha, kokwar Jéricho, a bi nengaʼa, a ndohi var, slagamhi nengaʼa tèlèba, i va ka a ri a ka.

³ Kin tèlèba, ndohi var, va-tèuda kokwar a pa sak staɗ, pats staɗ. Va-gu arsa mʼmèn mokwa.

⁴ Ndohi mvi skwi a Zhiklè tsaraɗ sèi ta cè tolom man a slhè, a ta dè a ma koti nderzlè-ma. A pats matsaraɗaʼa, va-tèuda kokwar a pa sak 7, a ndohi mvi skwi a Zhiklè ta tsi tolom.

⁵ Aman ta da tsi tolom nslhaʼa, a kin da tsena ntsi tolom, ndohi tèlèba sèi ta tsi lalau var mbiaʼa. Te deɓaʼa zlazlar kokwar a da mbeɗ na a nasanasa, a ndohi ta da tivè a pa, staɗ staɗ a dè a pa a sam man a nzlatsa a pa.

⁶ A Josué, kra Nun, a mbaha ta ndohi mvi skwi a Zhiklè, a ngaɗa ta: Va-zuɓ koti nderzlè-ma, a ndohi mvi skwi a Zhiklè tsaraɗ ta cè tolom tsaraɗ a ta dè a ma koti nderzlè-ma Ndo nzi pèc pècèk a vna te rai.

⁷ Te deɓaʼa a ngaɗa ta ndohai: Vo-do, va-tèuda kokwar a pa! Aman zolom ndohai do do a ma koti nderzlè-ma Ndo nzi pèc pècèk!

⁸ Aman Josué a ngaɗa ta ndohi arsa, ndohi mvi skwi a Zhiklè tsaraɗ, man tolom tsaraɗ te rai, a ma Ndo nzi pèc pècèk, to do a ta tsu tolom, a koti nderzlè-ma Ndo nzi pèc pècèk a ndzadzar ta te deɓa.

⁹ Zolom ndohi var to do a ma ndohi mvi skwi a Zhiklè man ta tsi tolom; njèkèdi ndohai, ta te deɓa; ta dzodzor koti nderzlè-ma. To do, ta tsi tolom a rai.

¹⁰ Josué a ngaɗa ta hi a ndohai: Kin da tsu lalau var ɓai, kin hazlawa ɓai, ko kèshkata kin mbeɗa a ma ɓai, ha pats man i da gaɗa kinè: Va-gu nguzli var! Te deɓaʼa kin da tsi lalau var.

¹¹ Koti nderzlè-ma Ndo nzi pèc pècèk a tèuda kokwar a pa sak staɗ. Te deɓaʼa ndohi ta shkè a deɓa a sam man ta mana a pa.

¹² Te mangoslèmaʼa a prèk, Josué a nslambaɗa, a ndohi mvi skwi a Zhiklè ta zuɓ koti nderzlè-ma Ndo nzi pèc pècèk.

¹³ Ndohi mvi skwi a Zhiklè man tolom nslhaʼa tsaraɗ te rai, to do a ma koti nderzlè-ma Ndo nzi pèc pècèk, a ta tsu tolom. Zolom ndohai to do a ma tengaʼa, njèkèdi ndohai, nte deɓa: ta dzodzor koti nderzlè-ma Ndo nzi pèc pècèk: to do, ta tsi tolom a rai.

¹⁴ A ta tèuda kokwar a pa, pats macecèwaʼa, sak staɗ. Te deɓaʼa ta shkè a deɓa a sam man ta mana a pa. A ta gu arsa mʼmèn 6.

¹⁵ Te mʼmèn matsaradaʼa ta slambaɗa a prèk te gai, a pats wushèr, ta tèuda kokwar a pa arsa sak tasaraɗ. A pats nasa ta tèuda a pa sak tsaraɗ.

¹⁶ Sak matsaradaʼa, ndohi mvi skwi a Zhiklè ta tsu tolom, a Josué a ngaɗa ta ndohai: Va-guzlu var! Ndo nzi pèc pècèk a va kinè kokwar!

¹⁷ Ndo nzi pèc pècèk a mphomde kokwar a skwi tèlèba te pa. Skwi ngiɗè a jèkè a nshèffè azɓai, sèi Rahab, fali ngwoz, a ndohi man ta zhè te gi nengaʼa tèlèba, a géɗ man a ngheda ndohi sak man nga zlinde ta.

¹⁸ Aman kinè, va-gu maya, kin da gu ntétékè skwi mphomdaʼa ɓai, kin co skwa a ri ɓai, man ɓai Ndo nzi pèc pècèk a da phomda sam man ndohi Israel ta ɓiceda va a pa, a ta da si matakwan.

¹⁹ Aman gurso a guro, kolongwi züdo a kolongwi verzhègenè, skwi nkezlaʼa a sam Ndo nzi pèc pècèk. Do do a va skwi mèshèlè Ndo nzi pèc pècèk.

²⁰ A ndohi ta hüno nguzli var, a ta tsu tolom. Aman ndohi mvi skwi a Zhiklè ta tsu tolom, ndohi ta tsu lalau var mbiaʼa, a zlazlar Jéricho a mʼmbeɗ na a nasanasa, a ndohi ta teva a kokwar, staɗ staɗ tèlèba zuraʼa a ma na a ta duma kokwar.

²¹ Ta gedassa skwi te kokwar tèlèba a tsakwal, nguraʼa, ngwoz, gola, babgai, marai, tambak, kdèh, tèlèba.

²² A Josué a ngaɗa ta ndohi cèw man ta zeɓau kokwar: Vo-do a gi fali ngwoz, va-helka ta ngwoz a ndohi gi nengaʼa auda te pa, ara man kin mbaɗa ta.

²³ A golahi nzebi kokwar to do, a ta hulkoɗi Rahab a bab na a mam na a kramamhi na a skwi tèlèba te pa auda. Ndohi te verzi tengaʼa ba ta hulko ta auda te pa, a ta pe ta a gi a tsagi sam man ndohi Israel ta nza a pa.

²⁴ Ta fa na vogwa a kokwar a skwi tèlèba te pa. Sèi gurso a guro, a kolongwi züdo a verzhègenè, ta daʼa a va skwi mèshèlè te gi Ndo nzi pèc pècèk.

²⁵ A Josué a njèka ta nshèffè a Rahab, fali ngwoz, a ndohi gi bab na, a skwi tèlèba te pa. A nengaʼa a nʼnza te Israel, ha patsna, a géɗ man a ngheda ndohi man Josué a nzlinde ta a nzeɓi kokwar Jéricho.

²⁶ A pats nasa Josué a ndzhaɗ ta ndohai, aman ta mbèɗè: Ndo man a da ɗèɗèyè kokwar Jé-richo a pa, Ndo nzi pèc pècèk da phomda! Aman a dèh kwa a verzi gai, tsuvom nengaʼa da mets na! Aman a da gézlèlè ntamagi a pa, ntabaw nengaʼa da mets na!

²⁷ Aranta Ndo nzi pèc pècèk a zhè a nda Josué, a labar ma Josué a zlèzlèmè te kokwar tèlèba.