Josué 5 - Ma Zhiklè

Israel te Guilgal

¹ Aman bihi Amor tʼwud woyam Jourdain, te civèɗ nkèl pats tèlèba, a bihi Canaan a ma iyam mbiaʼa, ta tsenaʼa, ara man Ndo nzi pèc pècèk a ngwora iyam woyam Jourdain a ma ndohi Israel, ha ta tawaɗa woyam Jourdain ma, ndav tengaʼa a mʼmbeɗ na. Zlau a ndza ta a sam ndohi Israel.

² A pats nasa Ndo nzi pèc pècèk a ngaɗa na Josué: Bazla krengaz, a ka ndeda a gwèsh, a ka ngela ta ngwon sak macecèwaʼa a ndohi Israel.

³ A Josué a mbazla krengaz, a nʼndeda a gwèsh, a nʼngela ta ngwon a ndohi Israel a der za Araloth.

⁴ Josué a nʼngela ta ngwon a géɗ skwi haha: Ngurhi tèlèba man ta jèkeda Egypte, slagamhi tèlèba, ta bazl ta tʼhèshèkèɗ, te deɓ man ta shkè auda te kokwar Egypte ma.

⁵ Ndohi tèlèba, man ta shkè auda, ngwon ta nʼngela ma; aman tengaʼa man ta yau tʼhèshèkèɗ, man ta beza a pa, te deɓ mshkè ta auda te Egypte, ngwon ta nʼngel ɓai.

⁶ Mvi 40 man ndohi Israel ta sawala tʼhèshèkèɗ, ha ndohi tèlè ta bazl ta – ndohi var man ta jèkeda kokwar Egypte – a géɗ man ta fu gèɗ a ma Ndo nzi pèc pècèk ɓai. Tengaʼa man Ndo nzi pèc pècèk a ngaɗa ta a mʼmbèɗè, ta da rka kokwar asaɓai, man wa a vongwom a hi te pa man a mpasla ta ri a hai a bababhi ta a mʼmbèɗè, a woya a nva ta.

⁷ Aman Ndo nzi pèc pècèk a nʼnzede ta wudahi tengaʼa a sam nʼnzi bab ta. Tengaʼa, man Josué a ngela ta ngwon, te man ta ngela ta ngwon a civèɗ di ɓai.

⁸ Aman a ndohi tèlèba ngwon nʼngela ma, ta nza a sam man ta ɓic ta a pa, ha mblè a pkwe na.

⁹ Te deɓaʼa Ndo nzi pèc pècèk a ngaɗa na Josué: A patsna i cko kinè hori ndohi Egypte auda a dai. A ta baha na samaʼa Guilgal, ha patsna.

¹⁰ A ndohi Israel ta ɓica va a ta mana a Guilgal, a ta gau ngolala Pâque, te mʼmèn 14 a ki sa, a dakwad, tʼhèshèkèɗ Jéricho.

¹¹ Te mangoslèmaʼa ta ndau skwi nʼndi kokwar sa, movar man skwi nshégèrè a te di ɓai, a dau mpinèʼa.

¹² Te mangoslèmaʼa, manne a nʼngel na ma, a shkè asaɓai. Aman ta ndau skwi nʼndi kokwar sa. A ndohi Israel ta ngatsa manne asaɓai; a vi sa tèlèba ta ndau skwi nʼngaʼa te kokwar Canaan.

Bi ndohi var Ndo nzi pèc pècèk

¹³ Aman Josué ndul ndul a ndikè a kokwar Jéricho, a nceda gèɗ a zhiklè, a nʼngul dai, a nrka ndo staɗ man a nzlatsa zuraʼa a ma nengaʼa, tsakwal te rai, mphoa tʼuda. Josué a mdo a sam na, a ngaɗa: Ka gwoli man a nga ɗè, ka ndo mayam nga dè?

¹⁴ A nengaʼa a ngaɗa: Aʼai, i bi ndohi var Ndo nzi pèc pècèk. I shkè antantanta genè. A Josué a nkalahi a deɓ sak nengaʼa, a ntsu riaʼa, a ngaɗa: Bi Zhiklè ga a gaɗa na ɓèl na mamè?

¹⁵ A bi ndohi var Ndo nzi pèc pècèk a ngaɗa na Josué: Suɗko kotokoroh auda te sak ngaya; sam man ka zlècè a pa, sam nkezlaʼa. A Josué a gu arsa.