Josué 4 - Ma Zhiklè

Kwa 12 man ta Zlatseda

¹ Aman ndohi tèlèba ta tawaɗa Jourdain ma, Ndo nzi pèc pècèk a ngaɗa na Josué:

² Va-hul ndohi 12 te va ndohai, staɗ staɗ te verzi ndohi Israel 12.

³ Va-njè ta ma a gèɗ, a kin gaɗa ta: A sam Jourdain haha, man sak ndohi mvi skwi a Zhiklè ta zlatsa a pa, va-por kwa 12, a kin helda rai a kin pedahai a sam man kin dè mènè a pa a patsna.

⁴ A Josué a mbaha ta ndohi 12, man a mpar ta te va ndohi Israel, staɗ staɗ te va verzi ndohi Israel 12,

⁵ a ngaɗa ta: Vo-do a ma koti nderzlè-ma Ndo nzi pèc pècèk, Zhiklè kinè, te ndev woyam. Staɗ staɗ kin co kwa a gèɗ, 12 ara verzi ndohi Israel.

⁶ A gi a skwi man ndohi Israel ta shinè te pa. Aman pats ngiɗè wudahi ta da dzhaɗ kinè: Kwa haha a sam kinè te di mè?

⁷ Kin da gaɗa ta: A géɗ man iyam Jourdain a ngel na a ma koti nderzlè-ma Ndo nzi pèc pècèk, man ta beza a ndev woyam Jourdain. Iyam Jourdain a nʼngel na; a kwa haha da gu a skwi man ndohi Israel ta hérè te pa a mèdèp.

⁸ Ndohi Israel ta gau ara man Josué a gaɗa ta. Ta porko kwa 12 te Jourdain, ara man Ndo nzi pèc pècèk a gaɗa na Jo-sué, staɗ staɗ a géɗ verzi ndohi Israel 12, a ta helda rai a sam man ta dè mènè a pa. A pa, ta pedahai.

⁹ Kwa 12, Josué a nɗizl ta a woyam Jourdain, a sam man sak ndohi mvi skwi a Zhiklè man ta zuɓ koti nderzlè-ma ta zlatsa a pa. A ta nza a pa ha patsna.

¹⁰ Ndohi mvi skwi a Zhiklè man ta zuɓ koti nderzlè-ma ta zlatsa te Jourdain, ha ta rufa mizlinè skwi tèlèba man Ndo nzi pèc pècèk a gaɗa na Josué, aman a njè ta a gèɗ a ndohai, lèmèlèmè ara man Moise a njè na Josué. Te deɓaʼa ndohi ta vosso va ta auda.

¹¹ Aman ndohi tèlèba ta tawaɗa woyam ma, koti nderzlè-ma Ndo nzi pèc pècèk a ndohi mvi skwi a Zhiklè to do a ma ndohai.

¹² Ndohi Ruben, ndohi Gad, a ndohi Manassé rètaʼa, to do a ma, a skwi var a va, ga ndohi Israel ta shkè, ara man Moise a gaɗa ta.

¹³ Ndohi var ta gi 40.000, man to do var a ma Ndo nzi pèc pècèk, a dal Jéricho.

¹⁴ A pats nasa, Ndo nzi pèc pècèk a nʼnzala Josué a sam di ndohi Israel tèlèba, a ta gi zlau nengaʼa a pats nshèffè nengaʼa tèlèba, ara man ta gu zlau Moise.

¹⁵ Te deɓaʼa Ndo nzi pèc pècèk a ngaɗa na Josué:

¹⁶ Njè ta ma a gèɗ a ndohi mvi skwi a Zhiklè, man ta zuɓ koti nderzlè-ma, a ta shkè auda te woyam Jourdain!

¹⁷ A Josué a njè ta ma a gèɗ a ndohi mvi skwi a Zhiklè, a ngaɗa ta: Vo-washkè auda te woyam Jourdain!

¹⁸ Aman ndohi mvi skwi a Zhiklè, man ta zuɓ koti nderzlè-ma Ndo nzi pèc pècèk, ta shkè auda te woyam Jourdain, a ta mbatseda sak a herkeda, tʼwuda ngiɗè, iyam te woyam Jourdain a mʼmen na a pa ara pèc pècèk, a hi auda a dzah a sam tèlèba, ara matsa.

¹⁹ Nasa ki nshèlèkuraʼa, mʼmèn 10, man ndohi ta shkè auda te woyam Jourdain, a ma kokwar Jéricho, te civèɗ mvèng pats, a ta mana a Guilgal.

²⁰ Kwa 12 man ta porko te Jourdain, Josué a ndizlda a Guilgal.

²¹ Te deɓaʼa a ngaɗa ta ndohi Israel: Aman pats ngiɗè wudahi kinè ta da dzhaɗ kinè: Kwa haha te di mè?

²² Sèi kin da ngra ta, a kin gaɗa ta: Ndohi Israel ta beza a woyam Jourdain, iyam az a sak ta ɓai,

²³ te man Ndo nzi pèc pècèk, Zhiklè kinè, a ngwora woyam Jourdain a ma kinè, ha kin shkè auda te woyam ma, ara man Ndo nzi pèc pècèk, Zhiklè kinè, a gau te woyam nduzoa, man a ngwora a ma nga, ha nga shkè auda te woyam ma.

²⁴ A ndohi a gèɗ herkeda tèlèba da suna, wuɗi ri Ndo nzi pèc pècèk a zhè, a kin gi zlau Ndo nzi pèc pècèk, Zhiklè kinè, a mèdèp.