Josué 3 - Ma Zhiklè

Ta tèwèɗè woyam Jourdain

¹ Josué a nslambaɗa a prèk te gai, a ta jèkeda Sittim, a ta shkè a ma woyam Jourdain, nengaʼa a ndohi Israel tèlèba. Ta mana a pa, ga ta tèwèdè woyam.

² Te deɓ mʼmèn makar, bihi sojè ta beza a ndev ngwi ta,

³ a ta njè ta ma a gèɗ a ndohai: Aman kin da rka ta ndohi mvi skwi a Zhiklè te verzi man a Lévi, ta zhüɓ koti nderzlè-ma Ndo nzi pèc pècèk, Zhiklè kinè, va-slambaɗa a sam man kin nza a pa, a kin dzodzora.

⁴ Kin derzla na va a va ɓai, aman va-jèka na dalbara a ma, a tsi ri 2.000; a da ngra kinè civèɗ, te man kin beza a civèɗ haha di ɓai.

⁵ A Josué a ngaɗa ta ndohai: A woy ndav kinè nkezlaʼa, a gèɗ man angoslèm Ndo nzi pèc pècèk a da gi nrkedi te ndev kinè.

⁶ A Jo-sué a ngaɗa ta ndohi mvi skwi a Zhiklè: Va-zuɓ koti nderzlè-ma, vo-do a ma ndohai! A ta zuɓ koti nderzlè-ma, a to do a ma ndohai.

⁷ Ndo nzi pèc pècèk a ngaɗa na Josué: A patsna i hiné a i nzal ka a sam di ndohi Israel tèlèba, a ta da suna, i zhè a nda ka, lèmèlèmè ara man i zhe a nda Moise te va nasa.

⁸ Ka njè ta ma a gèɗ a ndohi mvi skwi a Zhiklè man ta zhüɓ koti nderzlè-ma, a ka gaɗa ta: Aman kin da ndikè a ma woyam Jourdain, kin dè a kin zlatsa a va iyam!

⁹ A Josué a ngaɗa ta ndohi Israel: Va-herdakay va, va-tsena ma Ndo nzi pèc pècèk, Zhiklè kinè!

¹⁰ A Josué a ngaɗa: Te skwi haha kin da suna, Zhiklè a nshèffè a zhè te ndev kinè, a da dzam ta ndohi Canaan, Heth, Hévi, Phérez, Guirgasi, Amor a Jébus a ma kinè.

¹¹ Na haha koti nderzlè-ma Zhiklè nga, Zhiklè a géɗ herkeda tèlèba, a dè tèwèdè woyam Jourdain a ma kinè.

¹² Gar haha, va-woy te va ndohi Israel, ndohi 12, staɗ staɗ te verzi ndohi Israel 12.

¹³ Aman sak ndohi mvi skwi a Zhiklè man ta zuɓ koti nderzlè-ma Ndo nzi pèc pècèk, Zhiklè a géɗ herkeda tèlèba, ta mbècè a iyam Jourdain, iyam Jourdain a da ngel na, a woyam man a hakaɗi te géɗèʼa, a zlècèhi ara zlazlar.

¹⁴ A ndohi ta jèkeda gihi ta, aman ta da tèwèdè woyam Jourdain. A ndohi mvi skwi a Zhiklè to do a ma ndohai a ta zuɓ koti nderzlè-ma.

¹⁵ Aman ndohi nzuɓ koti nderzlè-ma ta ndika a ma woyam Jourdain – (te kokwar sa, man ndohi ta ɓicè skwi nslaʼa, woyam nʼndha, a hi auda a dzah) – a sak ndohi mvi skwi a Zhiklè man ta zuɓ kotai, ta mbatsa a va iyam,

¹⁶ woyam man a shkè te géɗèʼa a nzlatsahai, a nrama va na ara zlazlar, dra man a ndè a kokwar Adam, kokwar a tsagi Tsarthan. Iyam man a hi a woyam Arabah, woyam boma, a nʼngel na. A ndohi ta beza a sam ngworaʼa, zuraʼa a Jéricho.

¹⁷ Ndohi mvi skwi a Zhiklè man ta zuɓ koti nderzlè-ma, ta zlatsa a sam woyam ngworaʼa, a ndohi Israel tèlèba ta beza auda, iyam az a sak ta ɓai, ha tèlèba ta tawaɗa woyam Jourdain.