Josué 24 - Ma Zhiklè

Josué a jèka ta ndohi na

¹ Josué a mɓic ta ndohi te verzi Israel tèlèba a kokwar Sichem, a mbaha ta ndohi nhalaʼa te Israel, bihi Israel, ndohi kita, bihi sojè, a ta zlatsa a sam di Bi Zhiklè.

² Josué a ngaɗa ta ndohi tèlèba: Ndo nzi pèc pècèk, Zhiklè Israel, a goɗo ar haha: Zlèzlèa bababhi kinè, Tèrach, bab Abraham a bab Nachor, ta nza te wud woyam, a ta dzodzor zhiklèhi ngiɗè tsaɗ.

³ Te deɓaʼa i co Abraham, bab kinè, te wud woyam, a i zlinda, aman a shèwèlè te kokwar Canaan tèlèba. I ga na verzi na a vata, a i va na Isaac.

⁴ Te deɓaʼa i va na Jacob a Esau, – a Isaac. A i va na za Seir a Esau, a skwi na. Aman Jacob a wudahi nengaʼa to do a kokwar Egypte.

⁵ Te deɓaʼa i zlinda Moise a Aaron, a i ga ta matakwan a ndohi Egypte, a nrkedi man i gu a sam tengaʼa. Te deɓ nengaʼa i helka kinè auda.

⁶ Ar haha i helka ta bababhi kinè auda te Egypte, a kin shkè a ma iyam mbiaʼa. Ndohi Egypte ta hakaɗa verzi bababhi kinè a kikihi a ndohi plèsh, ha ta ndikè a ma iyam mbiaʼa nduzoa.

⁷ Aman ndohi Israel ta kuɗau a sam Ndo nzi pèc pècèk, a nengaʼa a ngeda ndodok ara ruva a ndev kinè a ndohi Egypte, a mbüɗko ta iyam mbiaʼa a gèɗ a ndohi Egypte, a nzede ta a pa. Gar haha skwi man i gau te Egypte, kin rkaʼa a di kinè. Te deɓaʼa kin nzau tʼhèshèkèɗ kumba.

⁸ A i de kinè a kokwar ndohi Amor, man ta nza tʼwud woyam Jourdain. A ta gu var a nda kinè, a i pe ta a ri a kinè, a kin co kokwar tengaʼa, a i zede ta a ma kinè.

⁹ Te deɓaʼa Balak, kra Tsippor, bi Moab, a nslambaɗa, a ngu var a Israel. A mbaha tia Balaam, kra Beor, aman a phomde kinè.

¹⁰ Aman i fu gèɗ a ma Balaam ɓai, a i gu aman a pshè kinè ma. Aranta i preka kinè auda te ri Balak.

¹¹ Te deɓaʼa kin tawaɗa woyam Jourdain, a kin ndika a kokwar Jéricho. A bihi Jéricho: Amor, Phérez, Canaan, Heth, Guirgasi, Hévi a Jébus ta gu var a nda kinè, a i pe ta a ri a kinè.

¹² I zlinda mangavar zlè a ma kinè, man ta dzam ta bihi Amor cèw. Kin gu a tsakwal kinè ka ɓai, a lèkèɗ kinè ka ɓai.

¹³ A i va kinè kokwar man matakwan a nʼnga kinè a géɗèʼa ɓai; kokwarhi mbibihiaʼa man kinè a nrom ka ɓai, a kin nzi a pa; kin ndi skwi te gi dau, te gi lak, man kin saha ɓai.

¹⁴ Anai, va-gu zlau Ndo nzi pèc pècèk, va-dzodzora zuraʼa, nlèɓèslèa, va-kwola zhiklèhi bababhi kinè ngiɗè man ta dzadzar ta tʼwud woyam Jourdain, te kokwar Egypte, ba. Va-dzodzor Ndo nzi pèc pècèk!

¹⁵ Aman njèjèr Ndo nzi pèc pècèk a da ambaha kinè ɓai, va-hur a patsna: Kin woy a kin jèjèr zhiklèhi man bababhi kinè ta dzadzar ta tʼwud woyam Jourdain ɗè, ɗè kin jèjèr zhiklèhi ndohi Amor man kinè te kokwar tengaʼa antanta dè? Aman nga a ndohi gi ga, nga jèjèr Ndo nzi pèc pècèk!

¹⁶ A ndohi ta mbeɗa na a ma: Aʼai, azɓai! Nga woy a nga jèjèr Ndo nzi pèc pècèk; nga jèkeda zhiklè ngiɗè!

¹⁷ Ndo nzi pèc pècèk, nengaʼa Zhiklè nga! Nengaʼa man a helka nga auda te kokwar Egypte, te gi ɓèlè. Nengaʼa man a gu nrkedi mbia haha a sam di nga, a ɓer nga a civèɗ man nga beza te ndev ndohi haha tèlèba.

¹⁸ Ndo nzi pèc pècèk a ndzam ta ndohi tèlèba a ma nga, ko ndohi Amor man ta nza te kokwar. Nga ba nga woy a nga jèjèr Ndo nzi pèc pècèk, te man nengaʼa Zhiklè nga.

¹⁹ A Josué a ngaɗa ta ndohai: Kin slaha a kin jèjèr Ndo nzi pèc pècèk azɓai, te man nengaʼa Zhiklè nkezlaʼa, nengaʼa Zhiklè srak, a da pra kinè mphömè kinè a mali kinè azɓai.

²⁰ Aman kin da jèkeda Ndo nzi pèc pècèk, a kin da jèjèr zhiklè ngiɗè tsaɗ, a nda ngwoda gèɗ na, a da ga kinè skwi ambaɓiaʼa, a da ndev kinè a ma, ko man zlèzlèa a nʼnga kinè skwi man amba.

²¹ A ndohi ta gaɗa na Josué: Aʼai! Nga woy a nga jèjèr Ndo nzi pèc pècèk!

²² A Josué a ngaɗa ta ndohai: Kinè ndohi malwuɗihai a va kinè, ara man kin co a patsna, kin da jèjèr Ndo nzi pèc pècèk. A ta gaɗa: Nga ndohi malwuɗihai!

²³ Josué a ngaɗa: Anai va-wusheda zhiklèhi ngiɗè man ta zhè a sam kinè aussa, va-ngwoda na ndav kinè a Ndo nzi pèc pècèk, Zhiklè Israel!

²⁴ A ndohi ta gaɗa na Josuè: Ndo nzi pèc pècèk, nengaʼa Zhiklè nga, man nga jèjèrèʼa, a nga fi gèɗ a ma nengaʼa.

²⁵ A pats nasa Josué a nderzla ma a ndohai, a mva ta ma nkwère a ma nde ta te Sichem.

²⁶ Te deɓaʼa Josué a mwindeda ma haha a ɗèlèwèr ma kita Bi Zhiklè, a mco kwa mbiaʼa, a nzlatseda a verzi wof tsna man a zhè a sam man Ndo nzi pèc pècèk a nkezlaʼa.

²⁷ Josué a ngaɗa ta ndohi tèlèba: Na haha, kwa haha a gi a skwi malwuɗai a sam kinè; ma Ndo nzi pèc pècèk tèlèba man a gaɗa nga, a goɗ a samaʼa; gar haha a da gi a skwi malwudai a sam kinè, a kin da ngwoda Zhiklè kinè ɓai.

²⁸ Te deɓaʼa Josué a mpre ta ndohai, staɗ staɗ tèlèba a to do ta a gi ta.

Josué a mʼmets na

²⁹ Te deɓ nengaʼa Josué, kra Nun, ɓèl Ndo nzi pèc pècèk, a mʼmets na, mvi nengaʼa 110.

³⁰ Ta rda a Thimnath-Sérach, te za Ephraim, a tsagi za Gaash, te civèɗ man a géɗèʼa, a sam man ta va na a skwi nʼndi gi na.

³¹ Te va man Josué a zhè a nshèffè dai, ndohi Israel ta dzodzor Ndo nzi pèc pècèk; te deɓ man a mʼmets na ma, ndohi nhalaʼa to do a ma ma a vna. Tengaʼa ta sun skwi tèlèba man Ndo nzi pèc pècèk a nʼnga ta ndohi Israel.

Mʼmetsi Eléazar

³² Vatasl nckondo Joseph, man ndohi Israel ta hulkoɗauda te kokwar Egypte, ta rda a Sichem, te dak man Jacob a nsum te ri ndohi Hamor, bab Sichem, a dala 100. A ta va na nengaʼa a skwi nʼndi gi a wudahi Joseph.

³³ Te deɓaʼa, Eléazar, kra Aaron, a mʼmets na, a ta rda a za Phinées, kra na, man ta va na te za Ephraim.