Josué 23 - Ma Zhiklè

Josué a ngatsa ta maya a mpi ndohai

¹ Te deɓ nʼnzi a zhè, man Ndo nzi pèc pècèk a mva ta nshèk va a ndohi Israel, te ri mayamhi tengaʼa tèlèba a tsagi ta, Josué nhala hurnjüfnjüfa ma,

² Josué a mbaha ta ndohi Israel tèlèba, a ndohi nhalaʼa, a bihai, a ndohi kita, a bihi sojè, a ngaɗa ta: Anai i hala hurnjüfnjüfa ma.

³ Kinè, kin rka skwi tè-lèba man Ndo nzi pèc pècèk, Zhiklè kinè, a gau a sam ndohi herkeda haha a géɗ kinè. Ndo nzi pèc pècèk, Zhiklè kinè, a ngu var te di man a kinè.

⁴ Na haha, i va kinè njèkèɗi ndohi herkeda haha a jimèr, verzi ndohi ngiɗè, verzi ndohi ngiɗè, skwi nʼndi gi tengaʼa, man i ngotskoɗi te va ndohi herkeda tèlèba man i gedas ta, a hinè te woyam Jourdain, ha ndè a sam iyam mbiaʼa te civèɗ nkèl pats.

⁵ Ndo nzi pèc pècèk, Zhiklè kinè, a ri na a da dzam ta auda a ma kinè, a da ksar ta a ma kinè, kin da duma kokwar ta, ara man Ndo nzi pèc pècèk, Zhiklè kinè, a mpasla kinè rai.

⁶ Aman va-gu slagama, va-dzodzor skwi tèlèba, va-gu tèlèba ara man mwindèa te ɗèlèwèr ma kita Moise, kin beza zlawa ka ɓai.

⁷ Kin dzakaɓa va a njèkèɗi ndohi herkeda haha ɓai! Kin slefu nzlembaɗ zhiklèhi tengaʼa bai, kin mbaɗa a nzlembaɗ tengaʼa ɓai! Kin dzodzor tengaʼa ɓai, kin tsu ri a tengaʼa ɓai!

⁸ Aman va-gso va a Ndo nzi pèc pècèk, Zhiklè kinè, genè, ara man kin gau, ha patsna.

⁹ Ndo nzi pèc pècèk a ndzam ta ndohi herkeda mbiaʼa, man wuɗi ta a zhè, auda a ma kinè. Ko ndo staɗ a nsala va a sam kinè ɓai, ha patsna.

¹⁰ Ndo staɗ te ndev kinè a ndzam ta ndohi tengaʼa gozhèm, te man Ndo nzi pèc pècèk, Zhiklè kinè, a gi var te di man a kinè a ri na, ara man a mpasla kinè rai.

¹¹ Gar haha va-gu maya a géɗ va kinè, va-woy Ndo nzi pèc pècèk, Zhiklè kinè, aman kin mbel nshèffè kinè.

¹² Aman kin jèkeda Ndo nzi pèc pècèk, a kin gshè va a njèkèɗi ndohi herkeda haha, njèkèɗia te va tengaʼa man ta zhè a sam kinè, a kin cè ngwoz a va, a kin humda va a nda ta,

¹³ va-suna, Ndo nzi pèc pècèk, Zhiklè kinè, a di a dzam ta ndohi herkeda haha auda a ma kinè asaɓai; ta da gi a gadda a ɓalai kinè, ta tezama kinè zlazlar, ta cèma kinè dai ara vatak, ha kin gedèshè tʼherkeda mbelaʼa haha, man Ndo nzi pèc pècèk, Zhiklè kinè, a mva kinè.

¹⁴ Na haha anai i da metsi ga, ara ndohi herkeda tèlèba. Gar haha va-huro a géɗ kinè, te nshèffè kinè: te ma man amba tèlèba man Ndo nzi pèc pècèk, Zhiklè kinè, a mpasla kinè rai, ko staɗ a nkalahi ɓai. Skwi man a mshkè a sam kinè ɓi ba, azɓai. Ko ma staɗ azɓai, man a nʼnga ɓai.

¹⁵ Lèmèlèmè ara man ma Ndo nzi pèc pècèk, Zhiklè kinè, mbelaʼa, man a mpasla kinè rai, nʼngaʼa; lèmèlèmè ma ambaɓiaʼa ba a da gi arsa a sam kine, ha pats man Ndo nzi pèc pècèk, Zhiklè, a gedas kinè tʼherkeda mbelaʼa man a mva kinè.

¹⁶ Aman kin da tawaɗaha nderzlè-ma Ndo nzi pèc pècèk, Zhiklè kinè, man a mvakinè, a kin da jè-jèr zhiklèhi ngiɗè, a kin da tsi ri a tengaʼa, Ndo nzi pèc pècèk a da gi ndav kumba a géɗ kinè, a da gedas kinè tsam tsam tʼherkeda mbelaʼa man a mva kinè.