Josué 20 - Ma Zhiklè

Kokwar matarai 6

¹ Ndo nzi pèc pècèk a ngaɗa na Josué:

² Gaɗa ta ndohi Israel aranta: Va-woy kokwar matarai, man i gaɗa kinè te ma Moise,

³ a ndo man a nkeɗa ndo, a shèwa ka ɓai, nʼnga na a rai, a slaha a nhi a pa, a mʼmbel na te ri skwi man a da pela na gèɗ.

⁴ Ndo nkeɗe ndo a da hi a pa, a kokwar sa, a zlècè a ntamagi kokwar, a da ngra ta ma nengaʼa a ndohi nhalaʼa, ga ta cè a kokwar ta, a ta da ngra na sam nʼnzi man a da nzi a pa a sam ta.

⁵ Aman ndo man a da pela na gèɗ a ndzodzorkoɗai, ta voko na ndo nkeɗa ndo a ri azɓai, a gèɗ man a ga na a rai ngai, a keɗa a shèwa ka ɓai.

⁶ A da nzi te kokwar sa, ha pats man a da zlècè a sam mpi ndohai, aman ta da ngela na kita, ha bi ndohi mvi skwi a Zhiklè man a zhè a pats nasa, a mʼmets na. Te deɓ nengaʼa ndo nkeɗe ndo do do a deɓa a ngwai a kokwar na, a gi na, a kokwar man a hu te pa.

⁷ A ta vau Kédesh, te Galilée, te za Nephthali; a Sichem, te za Ephraim; a Kirkath-Arba (nengaʼa Hébron) te za Juda, a kokwar nkezlaʼa sa.

⁸ Te wud woyam Jourdain, a tsagi Jéricho, te civèɗ mvèng pats, ta vau Betser tʼhèshèkèɗ, a dal ndohi te verzi Ruben; a Ramoth, te Galaad, a sam ndohi te verzi Gad; a Golan, te Basan, a sam ndohi Manassé.

⁹ Nasa kokwar matarai ndohi Israel tèlèba, a ndohi mbrokihai man ta nza a sam ta, aman ko wawa man ndo a nga na a rai a slaha a nhi a pa, a da metsi azɓai a ri ndo man a woya a nda pela na gèɗ, ga ta Zlatseda a sam mpi ndohai.