Josué 2 - Ma Zhiklè

Ndohi nzeɓi kokwar Jéricho

¹ Josué, kra Nun, a nzlinde ta ndohi Israel cèw te Sittim a metsar, aman ta dè a ta da zeɓi kokwar, a ngaɗa: Vo-do, va-da ngul dai a kokwar Jéricho! A to do a ta shkè a gi Rahab, fali ngwoz, a ta mana a pa.

² Ndohi ngiʼdè ta ngreda na bi Jéricho: Na haha, a patsna a vaɗ haha, ndohi Israel ta shkè a haha, a ta zeɓi kokwar.

³ A bi Jéricho a nzlündo ndo a sam Rahab, a ngaɗa na: Hulkoɗi ndohi man ta te gi ngaya sa, man ta shkè a ta zeɓi kokwar!

⁴ A ngwoz a nhel ta ndohi ncèwa sa, a nʼnghede ta, a ngaɗa: A vava, ndohi ta shkè a sam ga; aman i sun sam man ta shkè a pa ɓai.

⁵ Te deɓaʼa, tidè man ta pi-zlè ntamagi kokwar ma, sam nkezawa ma, ndohi to do ta. I sun sam man to do a pa ɓai. Va-hu a verzi tengaʼa tsam tsam, kin da ngats ta!

⁶ Aman nengaʼa a nʼnghede ta, a mpizl ta a hwaɗ pandar a géɗ gala na.

⁷ A ndohi ta hu a verzi tengaʼa a civèɗ man a ndè a ma woyam Jourdain, ha ta ndikè a sam ntewèɗè woyam. Ndohi mpizlè ntamagi kokwar ta pizla ta ma ndohi nha a verzi ta auda.

⁸ Aman ndohi nzeɓi kokwar matsa ta manahi di ɓai. A ngwoz a nteva a sam ta, a ngaɗa ta:

⁹ I suna, Ndo nzi pèc pècèk a va kinè kokwar haha. Aman kin pa nga zlau a gèɗ, a ndav ndohi kokwar haha tè-lèba a mbedè a géɗ kinè.

¹⁰ Nga tsenaʼa, ara man Ndo nzi pèc pècèk a ngwora woyam mbiaʼa a ma kinè, a pats man kin shkè auda te kokwar Egypte; a nga tsena skwi man kin ga ta Sihon a Og, bihi ndohi Amor, te wud woyam Jourdain, man kin bazl ta.

¹¹ Aman nga tsena ma haha, ndav nga a mʼmbeɗ na, a kin pra nga zlau a va. Aman Ndo nzi pèc pècèk, Zhiklè kinè, nengaʼa Zhiklè te zhiklè te géɗèʼa, a Zhiklè a géɗ herkeda ba.

¹² Anai va-mbadayè, a sam di Ndo nzi pèc pècèk: lèmèlèmè ara man kin syè te va, iyè a ndohi gi bab ga nga da se kinè te va. Va-ngrayè, aman i da shinè te pa,

¹³ a kin da jèka ta nshèffè a bab ga a mam ga a kramamhi ga a demamhi ga a ndohi gi ta, a kin mbelka nga auda te mʼmetsai.

¹⁴ A ndohi sa ta gaɗa na: Aman kin da ga nga ri a gèɗ ɓai, ko nshèffè nga, nga vi a géɗ kinè. Aman Ndo nzi pèc pècèk a da va nga kokwar, ka da se nga te va, a nga gi skwi nzuraʼa a sam ngaya.

¹⁵ A nengaʼa a nzavka ta auda a teɓa a nvakavar, te man gi nengaʼa nzleɓa te va zlazlar kokwar, gi nengaʼa a ma zlazlar kokwar.

¹⁶ A ngaɗa ta: Va-hu kinè a za, a ndohi man ta dzar kinè ta da ngats kinè ɓai! Va-nghede va kinè a pa mʼmèn makar, ha ndohi ndzar kinè ta shkè ta a deɓa a ngwi ma. Te deɓaʼa vo-do a civèɗ kinè!

¹⁷ Ndohi sa ta gaɗa na: Nga da gi ara mʼmbèɗ nga man nga mbaɗa ka haha:

¹⁸ A pats man nga da shkè a kokwar haha, teɓa haha, mʼminèʼa a zaʼai nduzoa, ka ngerzlda a nvakavar man ka bezde nga auda a pa. A ka ɓicka ta bab ngaya a mam ngaya a kramamhi ngaya a ndohi gi bab ngaya tèlèba a gi ngaya.

¹⁹ Ndo man a dè auda te gi ngaya, a ndè a civèɗ, a metsi na; mali na, mali nga ka ɓai. A ndo man a nza te gi ngaya a ta da keɗaʼa, mali nga.

²⁰ Man ka da ngreda ta ndohi ngiɗè, nga mendoko mʼmbèɗè nga auda ma.

²¹ A nengaʼa a ngaɗa: Da gau ara man kin goɗa! A mpre ta, a to do ta. A nengaʼa a ngerzlda teɓa nduzoa a nvakavar.

²² Tengaʼa to do ta, to do za, a ta nza te pa mʼmèn makar, ha ndohi ndzar ta ta menkaɗ ta a deɓa. Ndohi ndzar ta ta has ta a civèɗ tèlèba, a ta ngats ta ɓai.

²³ Te deɓaʼa ndohi cèw sa to do hi te za, a to do a deɓa a wud woyam a sam Josué, kra Nun, a ta njè na skwi tèlèba man a ga ta.

²⁴ Ta gaɗa: Ndo nzi pèc pècèk a mva nga kokwar tèlèba a ri a nga; ndohi kokwar ta gi zlau nga.