Josué 17 - Ma Zhiklè

Man ndohi Manassé rétaʼa ta ngotso

¹ Ndohi te verzi Manassé ta ngots difi ta a jimèr. Manassé, tsuvom Joseph. Makir, tsuvom Manassé, bab Galaad, a nʼngots Galaad a Basan, te man nengaʼa ndo var.

² Te deɓaʼa wudahi Manassé ngiɗè, ngiɗè a ndohi gi na, ngiɗè a ndohi gi na: ndohi Abiézer, ndohi Hélek, ndohi Asriel, ndohi Sichem, ndohi Hépher, ndohi Shemida; nasa wudahi Manassé, tsuvom Joseph, wud ngurhai a ndohi gi ta.

³ Aman Tselophcad, kra Hépher, kra Galaad, kra Makir, kra Manassé, a nya kra nguraʼa ɓai, a yi dalahi genè. Nzlembaɗ dalahi nengaʼa ta a haha: Machla, Noa, Hogla, Milca a Thirtsa.

⁴ A ta herda na va a Eléazar, ndo mvi skwi a Zhiklè, a sam di Josué, kra Nun, a sam di wud bihai, aman ta gaɗa: Ndo nzi pèc pècèk a ngaɗa na Moise, aman a nkezla nga skwi nʼndi gai a va kramamhi nga! A ta va ta, ara man Ndo nzi pèc pècèk a ngoɗa skwi nʼndi gai a va kramamhi ta, wud bab ta.

⁵ Ar haha Manasse a nʼngots skwi kula, a Galaad a Basan te wud woyam Jourdain a vaʼa,

⁶ te man dalahi Tselophcad ta ngots skwi nʼndi gai a va wudahi nengaʼa, a wudahi ngiɗè ta ngots kokwar Galaad.

⁷ Kuma Manasse, a hüno te Aser, a ndè Micmethath, a tsagi Sichem, a ndè Jamin, a sam ndohi En-Tappuach.

⁸ Herkeda Tappuach a wudahi Manassé; aman Tappuach a ma kuma Manassé, a ndohi Ephraim.

⁹ Te deɓaʼa kuma a dè a ndzurv iyam te Kana, te civèɗ man a du-kwaɗ. Kokwarhi mbiaʼa haha ta zhè te Ephraim, te ndev kokwarhi Manassé. Kuma Manassé te civèɗ man a géɗèʼa, a sam ndzurv iyam, a ndè a iyam mbiaʼa.

¹⁰ Te man a dakwaɗ, a Ephraim; te man a géɗèʼa, a Manassé; iyam mbiaʼa a mpau kuma. Te man a géɗèʼa, a lama na Aser, te tsagai, Issacar.

¹¹ Te Issacar, te Aser, Manassé a nʼngots Beth-Shean a kokwarhi nengaʼa nkèshèa, Jibleam, a kokwarhi nengaʼa nkèshèa, ndohi Dor a kokwarhi tengaʼa nkèshèa, ndohi En-Dor a kokwarhi tengaʼa nkèshèa, ndohi Thaanac a kokwarhi tengaʼa nkèshèa, a ndohi Meguiddo a kokwarhi tengaʼa nkèshèa, sam makar.

¹² Aman ndohi Manassé ta slaha ta duma kokwarhi haha ɓai, a ndohi Canaan ta tilda gerzi ta a pa.

¹³ Te deɓaʼa, man ndohi Israel ta ngots wuɗai, ta pe ta ndohi Canaan a mizlinè ɓèlè. Aman ta slaha ta dzam ta ɓai.

¹⁴ Ndohi Joseph ta shkè a sam Josué, aman ta gaɗa na: Ka va nga sam man ji-mèr a kala na a gèɗ, staɗgenè, èhèmè? Nga ndohi kumba. Ndo nzi pèc pècèk a mpshè nga ma ha patsna.

¹⁵ Josué a ngaɗa ta: Aman kin kumba, aman za Ephraim a slra kinè ɓai, vo-do a sam man wof a nhaya a pa, va-ɗotso wofaʼa te kokwar ndohi Phérez a Rephaim.

¹⁶ A ndohi Joseph ta gaɗa: Za a da slra nga ɓai; ndohi Canaan tèlèba ta zhè te kokwar a vara; Beth-Shean a kokwarhi a sam tengaʼa a dal Jizréel, a ta ngots kiki var.

¹⁷ Te deɓaʼa Josué a ngaɗa ta ndohi Joseph, Ephraim a Manassé: Ndohi kinè kumba, wuɗi kinè a zhè a vata. Kin da ngècè sam stadgenè ka ɓai.

¹⁸ Aman sam dak te man a za a ngaya, man wof nhaya a pa. Ɗotso wof—ncèkè ngaya. A ka da dzam ta ndohi Canaan, ko man kiki var ta a zhè, ko man wuɗi ta a zhè.