Josué 14 - Ma Zhiklè

Ta kezli Canaan a jimèr

¹ Nasa sam man ndohi Israel ta ngotso a skwi nʼndi gai te kokwar Canaan, man Eléazar, ndo mvi skwi a Zhiklè, a Josué, kra Nun, a tsuvomhi te verzi ndohi Israel ta va ta.

² Ta ngots skwi nʼndi gai a jimèr, ara man Ndo nzi pèc pècèk a njè ta te ma Moise, a verzi Israel 9, a verzi ngiɗè rètaʼa.

³ Moise a nkezla ta skwi nʼndi gi a verzi Israel cèw a verzi ngiɗè rètaʼa te wud woyam Jourdain, te civèɗ mvèng pats; aman a ndohi Lévi a nkezla ta skwi nʼndi gi te va tengaʼa ɓai.

⁴ Wudahi Joseph cèw: Manassé a Ephraim; a géɗ nengaʼa ta va ta herkeda a ndohi Lévi ɓai, sèi kokwar man ta nzi a pa, a sam mwèr rèwè a sam mpi kolongwi tengaʼa a pa.

⁵ Ndohi Israel ta gu aranta, ara man Ndo nzi pèc pècèk a njè na a gèɗ a Moise, a ta kezli kokwar.

Josué a va na Hebron a Caleb

⁶ Ndohi Juda ta herda na va a Josué, te Guilgal; a Caleb, kra Jephunné, ndo Keniz, a ngaɗa na: Ka sun skwi man Ndo nzi pèc pècèk a njè na Moise, ndo Zhiklè, a gèɗ ga, a gèɗ ngaya, te Kadès-Barnéa.

⁷ Iyè, mvi ga 40, man Moise, ɓèl Ndo nzi pèc pècèk, a nzlindyè te Kadès-Barnéa, a nzebi kokwar; a i do a i menda na ara man i rkaʼa.

⁸ Kramamhi ga man ta shkè a verzi ga, ta mbeɗama ta ndav a ndohai; aman iyè i dzodzor Ndo nzi pèc pècèk, Zhiklè ga, a i gsa va a vna genè.

⁹ A pats nasa, Moise a mʼmbaɗa: Herkeda man ka mbatsa sak a pa, a ngaya a mèdèp, skwi nʼndi ngi ngaya, a wudahi te verzi ngaya, a gèɗ man ka dzodzor Ndo nzi pèc pècèk, Zhiklè ga, a ka gso va a vna genè.

¹⁰ Anai Ndo nzi pèc pècèk a mɓeray nshèffè, ara mana gaɗda ma a hai, mvi 45 te deɓ man Ndo nzi pèc pècèk a ngaɗa na ma haha a Moise, man ndohi Israel ta dè a ta beza a ndev hèshèkèɗ. Antanta mvi ga 85.

¹¹ A patsna ba, wuɗi ga a zhè lèmèlèmè ara man a pats man Moise a zlindyè; wuɗi ga a zhè a i gi var ara nzlèzlèa, a i dè a i shkè a deɓa.

¹² Anai, vay za haha, man Ndo nzi pèc pècèk a goɗ a géɗ nengaʼa a patsaki sa, a géɗ man ka tsenaʼa, a pats sa, ndohi Anakim ta zhè a pa, a kokwarhi mbibihiaʼa, a zlazlar heɗawaʼa. Wa ngiɗè ba Ndo nzi pèc pècèk a takahayè, a i da dzam ta, ara man a goɗa.

¹³ A Josué a mpshè na ma, a mva na Hébron a skwi nʼndi gi Caleb, kra Je-phunné.

¹⁴ A géɗ nengaʼa Hébron a nʼnda a skwi nʼndi gi Caleb, kra Jephun-né, ndo Keniz, ha patsna, a gèɗ man a ndzodzor Ndo nzi pèc pècèk, Zhiklè Israel, a ngso va a vna genè.

¹⁵ Nzlembaɗ Hébron zlèzlèa Kirjath-Arba. Arba sa, nengaʼa ngul ndo te va ndohi Anakim tèlèba. Te deɓaʼa kokwar a nʼnza a gumai, var asaɓai.