Josué 13 - Ma Zhiklè

Kokwar man ta duma di bai

¹ Aman Josué nhala ma, mvi nengaʼa kumba ma, Ndo nzi pèc pècèk a ngaɗa na: Ka hala ma, mvi ngaya kumba ma. Aman ka duma kokwar tèlè di bai; njèkèɗi ndumɓiaʼa a zhè kumba dai.

² Na haha kokwar ndumɓiaʼa: kokwar Philistie tèlèba, herkeda Gueshur tèlèba,

³ a hinè te Shichor, zuraʼa a ma kokwar Egypte, ha ndè a kokwar Ekron, te civèɗ man a géɗèʼa, man ta ngra na a va kokwar Canaan, man bihi Philistie 5; bi Gaza, bi Asdod, bi Askalon, bi Gath a bi Ekron ta gi bi te pa; a ndohi Avvi;

⁴ te man a dakwaɗ, herkeda Canaan tèlèba, a Meara, man a ndohi Sidon, ha ndè Ap-hèk, ha ndè a kuma kokwar Amor;

⁵ kokwar Guibli, a Liban tèlèba, te civèɗ mvèng pats, a hinè te Baal-Gad, a der za Hermon, ha ndè a civèɗ Hamath;

⁶ ndohi za tèlèba, a hinè te Liban, ha ndè Misrephoth-Maim, ndohi Sidon tèlèba. Iyè, i da dzam ta aussa a ma ndohi Israel. Ka, kezla ta kokwar tengaʼa a ndohi Israel a ji-mèr a skwi nʼndi gai, ara man i njè ka ma a gèɗ.

⁷ Antanta, kezla kokwar haha a skwi nʼndi gai a ndohi te verzi ndohi Israel 9, a verzi Manassé rètaʼa.

⁸ Rèta ngiɗè, a ndohi Ruben a ndohi Gad, da ngots a skwi nʼndi gi tengaʼa, man Moise a va ta, te wud woyam Jourdain, te civèɗ mvèng pats. Ta ngotso ara man Moise, ɓèl Ndo nzi pèc pècèk, a va ta.

⁹ A hinè te Aroer, a ma dzurv iyam Arnon, a nda kokwar mbiaʼa te ndevaʼa, a dal Médéba tèlèba, ha ndè Dibon;

¹⁰ kokwarhi Sihon, bi ndohi Amor, man a ngu bi te Hesbon, tèlèba, ha ndè a kuma ndohi Ammon,

¹¹ a Galaad, a nda kokwar Gueshur a Maacath, za Hermon a Basan tèlèba, ha ndè a Salca;

¹² kokwar bi Og, te Basan, man a ngu bi te Ashtaroth, a ngu bi te Edrei, nengaʼa man te va njèkèdi ndohi Rephaim. Moise a ndum ta, a ndzam ta.

¹³ Aman ndohi Israel ta dzam ta ndohi Gueshur a Maacath ɓai. Ndohi Gueshur a ndohi Maacath ta nza te ndev ndohi Israel, ha patsna.

¹⁴ Sèi ndohi te verzi Lèvi ta ngatsa skwi nʼndi gi ɓai. Skwi man ta va na Ndo nzi pèc pècèk te vogwa, nasa skwi nʼndi gi tengaʼa, man a ngaɗa ta arsa.

¹⁵ A Moise a nkezla ta a ndohi te verzi Ruben, a gwoli zana nta, a gwoli zana nta,

¹⁶ a ta ngots kokwar ta: a hinè te Aroer, a ma ndzurv iyam Arnon, a nda kokwar mbiaʼa te ndevaʼa, a dal Médeba tèlèba,

¹⁷ Hesbon a kokwarhi nengaʼa a vara tèlèba, Dibon, Bamoth-Baal, Beth-Baal-Meon,

¹⁸ Jahats, Kedémoth, Méphaath,

¹⁹ Kirjathaim, Sibma, Tséreth-Hashachar a géɗ za,

²⁰ Beth-Peor, tsagi Pisga, Beth-Jeshimoth,

²¹ kokwarhi a vara tèlèba, a kokwar-bi Sihon, bi ndohi Amor, man a ngu bi te Hesbon, nengaʼa man Moise a gu ngulaʼa, a wud bihi te Madian: Evi, Rékem, Tsur, Hur a Réba, wud bihi Sihon man ta nza te kokwar.

²² Balaam, kra Beor, ndo gèɗ ba, te va ndohi man ndohi Israel ta bazl ta a tsakwal.

²³ Kuma kokwar ndohi Ruben a ma woyam Jourdain. Nasa skwi nʼndi gi ndohi Ruben, a gwoli tengaʼa, ngiɗè a difi na, ngiɗè a difi na. Kokwarhi mbiaʼa a kokwarhi nkèshèa.

Te civèɗ mveng pats

²⁴ Moise a nkezla ta ndohi Gad, ndohi te verzi Gad, a ndohi gi tengaʼa.

²⁵ Kokwar man a tengaʼa: Jaezer, kokwarhi mbiaʼa te Galaad, a kokwar ndohi Ammon rètaʼa, ha ndè Aroer, zuraʼa a ma Rabba,

²⁶ a hinè te Hesbon, ha ndè Ramath-Mitspé a Bethonim, a hinè te Mahanaim, ha ndè a herkeda Debir,

²⁷ te zlozlor Beth-Haram a Beth-Nimra, Succoth a Tsaphon, njèkèɗi kokwar-bi Sihon, bi Hesbon. Kuma a ma woyam Jourdain, te civèɗ mvèng pats.

²⁸ Nasa skwi nʼndi gi ndohi Gad, a ndohi gi ta; kokwarhi mbiaʼa a kokwarhi nkèshèa.

²⁹ A Moise a nkezla ta a ndohi te verzi Manassé rètaʼa, a wudahi Manassé, a ndohi gi ta,

³⁰ kokwar man a tengaʼa: a hinè te Mahanaim, Basan tèlèba, kokwar-bi Og tèlèba, bi Basan, a gihi Jair te Basan tèlèba: kokwarhi 60.

³¹ Galaad rètaʼa, Ashtaroth a Edrei, kokwarhi man a bi Og te Basan, ndohi Makir, kra Manassé, ta ngotso; ndohi te verzi Makir rètaʼa, a ndohi gi ta.

³² Nasa skwi man Moise a nkezla ta a skwi nʼndi gai, a pats man a zhè a dal Moab, te wud woyam Jourdain, zuraʼa a Jéricho, te civèɗ mvèng pats.

³³ Moise a mva ta skwi nʼndi gi a ndohi te verzi Lévi bai. Ndo nzi pèc pècèk, Zhiklè Israel, nengaʼa skwi nʼndi gi tengaʼa, ara man a gaɗa ta.