Josué 11 - Ma Zhiklè

Ta ngul Jabin, bi Hatsor

¹ Aman Jabin, bi Hatsor, a ntsena skwi haha, a nzlündo ndo a sam Jobab, bi Madon, a sam bi Shimron, a sam bi Aeshaph,

² a sam bihi te za, te civèɗ man a géɗèʼa, a sam bihi a vara, a tsagi Kinnéreth, a sam bihi a dal Dor, te civèɗ mvèng pats:

³ ndohi Canaan, te tsagi te tsagai; ndohi Amor, ndohi Heth; ndohi Phérez; ndohi Jébus te za; ndohi Hévi a der za Hermon, te kokwar Mitspa.

⁴ A ta shkè, tengaʼa a ndohi var tengaʼa tèlèba, ndohi rèdèdèa ara wyak te woyam, a plèshi a kiki var kumba kumba.

⁵ Bihi haha tèlèba ta ɓicko va a ta mana a sam staɗ a ma iyam Mérom, a ta da gi var a Israel.

⁶ A Ndo nzi pèc pècèk a ngaɗa na Josué: Ka gu zlau tengaʼa ɓai, aman angoslèm, a sam aranta, i da pe ta a ri a ndohi Israel, a ta bazl ta tèlèba. Ka da ngelama ta mar te sak plèshihai; ka da fa ta vogwa a kiki var tengaʼa.

⁷ Josué a ndohi var tèlèba a nda nengaʼa, ta ngezla ta a va, man ta hur ɓai, a ma iyam Mé-rom, a ta kala ta a va.

⁸ A Ndo nzi pèc pècèk a mpe ta a ri a ndohi Israel, a ta bazl ta, a ta hu a verzi tengaʼa, ha ndè a Sidon, kokwar mbiaʼa, ha ndè Misrephoth-Maim, ha ndè a dal Mitspa te civèɗ mvèng pats. Ta bazl ta tèlèba, njèka ko ndo staɗ ɓai.

⁹ Josué a nʼnga ta, ara man Ndo nzi pèc pècèk a gaɗa na: a nʼngelama ta mar a sak plèshihai, a nfa ta vogwa a kikihi var.

¹⁰ A pats nasa Josué a mshkè a deɓa, a nduma Hatsor, a nkeɗa bi nengaʼa a tsakwal. Hatsor te va nasa kokwar bi herkeda sa.

¹¹ A ta bazl ta ndohi te pa tèlèba a tsakwal, a ta gedas ta; skwi man a shèffè a te pa ɓai. Ta fa na vogwa a Hatsor.

¹² A Josué a nduma kokwarhi mbibihiaʼa a bihi haha tèlèba, a mbazl ta a tsakwal. A ngedas ta, ara man Moise, ɓèl Ndo nzi pèc pècèk, a njo.

¹³ Aman kokwarhi mbibihiaʼa tèlèba a gèɗ za, ndohi Israel ta fa ta vogwa ɓai. Sèi Hatsor, man Josué a nfa na vogwa.

¹⁴ A kolongwi kokwar, a skwi kuɗom, ndohi Israel ta heldama a skwi man ta duma. Aman ndohai, ta bazl ta a tsakwal, ta gedas ta tèlèba, ta jèka skwi a nshèffè te pa ɓai.

¹⁵ A ngu arsa, ara man Ndo nzi pèc pècèk a gaɗa na Moise, ɓèl nengaʼa, a Moise a ngaɗa na Josué. Skwi man Ndo nzi pèc pècèk a ngaɗa na Moise, man a nga ɓi ba, azɓai.

Josué a nduma kokwar tèlèba

¹⁶ Aranta Josué a nʼndeda herkeda a ma tèlèba: za, a Négeb tèlèba, kokwar Gosen tèlèba, a var, a hèshèkèɗ, a za Israel, a vara nengaʼa tèlèba.

¹⁷ A hinè te za Pelé man a ndè Seir, ha ndikè a Baal-Gad, a dal Liban, a der za Hermon, a ndzam ta bihi tengaʼa tèlèba, a ngu var a tengaʼa, a mbazl ta.

¹⁸ Mvi a zhè, Josué a ngi var a bihi haha tèlèba.

¹⁹ Kokwar man ta tsi gumi a Israel, azɓai, sèi ndohi Hévi man ta nza te Gabaon. A ta dum ta ma tèlèba a var.

²⁰ Ndo nzi pèc pècèk a hur a nsassaya ndav ta, a ta woy var a Israel, a ta gedas ta, a ta ngècè pombi azɓai, a ta zi ta, ara man Ndo nzi pèc pècèk a njè na ma a gèɗ a Moise.

²¹ A pats nasa Josué a mshkè, a nzede ta ndohi Anakim te za Hébron, Débir, Anab, te za Juda tèlèba, te za Israel tèlèba. Josué a ngedas ta, a kokwarhi tengaʼa tèlèba.

²² Njèka ndohi te verzi Anakim te kokwar ndohi Israel ɓai. Sèi njèkè kètè te Gaza, te Gath, te Asdod.

²³ Aranta Josué a nʼndeda herkeda tèlèba a ma, ara man Ndo nzi pèc pècèk a gaɗa na Moise; a Josué a mva na herkeda a skwi nʼndi gi a Israel, a nkezla ta, verzi ngiɗè a difi na, verzi ngiɗè a difi na. Te deɓaʼa kokwar a nʼnza a gumai, var asaɓai.