Josué 10 - Ma Zhiklè

Ta gi var te Gabaon

¹ Aman Adoni-Tsédek, bi Jérusalem, a ntsenaʼa, Josué a ndumkoɗi kokwar Ai a ma, a ngedasedaussa tèlèba ma, a ngu a sam kokwar Ai, a sam bi na, lèmèlèmè ara man a gu a sam kokwar Jéricho a bi na, ndohi Gabaon ta tsu gumi a Israel a ta nze ta a va tengaʼa,

² a gi zlau a vata. Gabaon kokwar mbiaʼa, kokwar-bai man a fena Ai, ngurhi nengaʼa tèlèba slagamhai.

³ Adoni-Tsédek, bi Jérusalem, a nzlündo ndo a sam Hoham, bi Hébron; a sam Piream, bi Jarmuth, a sam Japhia, bi Lakis, a sam Debir, bi Eglon:

⁴ Vo-washkè a sam ga, va-takahayè a nga da dumokoy Gabaon, a gèɗ man ta tsu gumi a Josué a ndohi Israel!

⁵ A ta ɓicko va ar bihi Amor 5, a to do: bi Jérusalem, bi Hébron, bi Jarmuth, bi Lakis, bi Eglon, a nda ndohi var tengaʼa tèlèba, a ta nza na ma a kokwar Gabaon, a ta gu var a kokwar.

⁶ A ndohi Gabaon ta zlündo ndo a sam Josué, a sam man ta mana a pa te Guilgal. A ta gaɗa na: Ka kwola ɓèlèlihi ngaya ɓai! Vo-washkè a kin takaha nga tsam tsam a kin mbel nga! Aman bihi Amor tèlèba, ndohi nte za, ta ɓicko nga va a gèɗ.

⁷ Te deɓaʼa Josué a njèkeda Guilgal, nengaʼa a ndohi var nengaʼa tèlèba, a slagamhi nengaʼa tèlèba.

⁸ A Ndo nzi pèc pècèk a ngaɗa na Josué: Ka gu zlau tengaʼa ɓai! I va ta a ri a ka. Ko ndo staɗ a slaha a nsala va a sam ngaya ɓai.

⁹ A Josué a nkala ta a va, man ta hur ɓai. Ta jèkeda Guilgal, a to do, a vaɗ lèk lèk.

¹⁰ A Ndo nzi pèc pècèk a venda ta gèɗ, aman ta rka Israel a ma tengaʼa. A ta bazl ta kumba te Gabaon. Ta hu a verzi tengaʼa a civèɗ ndè a der za Beth-Horon, a ta dzam ta a kokwar Azéka a Makkéda.

¹¹ Aman ta hu ta a ndohi Israel, a der za Beth-Horon, Ndo nzi pèc pècèk a wushedoko ta vandzal ara kwa a gèɗ, ha ndè a kokwar Azéka, a mbazl ta. Mba ndohi man vandzal a mbazl ta, a géɗ man ndohi Israel ta bazl ta a tsakwal.

Pats a zlatsahi

¹² A pats nasa, man Ndo nzi pèc pècèk a mpe ta ndohi Amor a ri a ndohi Israel, Jo-sué a ngaɗa na Ndo nzi pèc pècèk, a sam di ndohi Israel tèlèba, aranta: Pats da zlats na hi a gèɗ Gabaon, a kia da zlats na hi a dal Ajalon!

¹³ A pats a nzlatsahi, a kia a nzlatsahi, ha Israel a nʼndev ta mayamhi nengaʼa tèlèba. Mwinda te ɗèlèwèr ndohi slagamhi arsa ka ɓi ɗè? Pats a nzlatsahi te giɗfèk, a dè azɓai, a kèlèhi azɓai, ha mangoslèmaʼa.

¹⁴ Ndo nzi pèc pècèk a mʼmbeɗa na ma a ntsi ri ndo ara man a gu a pats nasa asaɓai, ko zlèzlèa, ko a ndè a ma ma. Aman Ndo nzi pèc pècèk a ngu var te di man a Israel.

¹⁵ A Josué a ndohi Israel tèlèba ta shkè a deɓa a Guilgal, a sam man ta mana a pa.

Josué a dè a ma ma a Canaan

¹⁶ Bihi 5 matsa ta hu ta, a ta nghede va te gi za Makkéda.

¹⁷ A ta menda na Josué: Bihi 5 ta nghede va te gi za Makkéda.

¹⁸ Josué a ngaɗa: Va-gudumbala na kwahi mbibihiaʼa a ma gi za, va-peda ndohi a pa, aman da ɓüro.

¹⁹ Aman kinè, kin zlatsahi ɓai, va-hu a verzi mayamhi kinè, va-bazl ta njèkèɗi ndohi nte deɓa, da ndikè a deɓa a kokwar ta asaɓai! Aman Ndo nzi pèc pècèk a mpe ta a ri a kinè.

²⁰ Aman Josué a ndohi Israel ta bazl ta klèng ma, njèkè ko staɗ ɓai, a ndohi man ta ngots civèɗ a ta mbel ta, ta hu ta a kokwarhi nʼngalaʼa,

²¹ ndohi tèlèba ta menkaɗ ta a deɓa a sam Josué, a Makkéda. A ndohi tèlèba ta gi zlau Israel, a ta pizlè ma ta.

²² Te deɓaʼa Josué a ngaɗa: Va-winè ma gi za, va-helka ta bihi 5 auda te pa!

²³ A ta gu arsa, a ta hulko bihi 5 auda te gi za a sam na; bi Jérusalem, bi Hébron, bi Jarmuth, bi Lakis, bi Eglon.

²⁴ Aman ta hulko bihi 5 auda a sam Josué ma, Josué a mbaha ta ndohi Israel tèlèba, a ngaɗa ta bihi ndohi var man to do a vna: Vo-washkè, va-mbatsa ta a daʼai bihi haha! A ta shkè a ta mbatsa ta a daʼai bihi haha.

²⁵ A Josué a ngaɗa ta: Kin gu zlau ɓai, kin gudzu ɓai! Va-gu slagama, va-nze taraʼa! Aman Ndo pèc pècèk a da ga ta mayamhi kinè tèlèba man ta gi var a kinè lèmèlèmè arsa.

²⁶ Te deɓaʼa Josué a ngu a mbazl ta, a nkelaw ta a wof zlam, a ktsal ta a pa, ha dakwad.

²⁷ Te deɓaʼa man pats nkala ma, Josué a ngoɗa aman ta helka ta hi te wof, a ta wushede ta a gi za, man ta ngheda va ta a pa. A ta gudumbela na kwa mbiaʼa a ma gi za. A ta zhè te pa ha patsna.

²⁸ A pats nasa, Josué a nduma kokwar Makkéda, a mbazl ta ndohai a bi ta tèlèba a tsakwal. A ngedassa ndohai a skwi man a shèffè te pa tèlèba, a njèka ndo a pa ɓai. A nʼnga na bi Makkéda lèmèlèmè ara man a ga na bi Jéricho.

²⁹ Te deɓaʼa Josué a ndohi Israel tèlèba a nda nengaʼa, ta slambaɗa te Makkéda, a to do Libna, a ta gu var a Libna.

³⁰ A Ndo nzi pèc pècèk a mpe ta, a bi tengaʼa ba, a ri a ndohi Israel, a ta bazl ta a tsakwal, ndohi tèlèba man ta zhè te pa, a njèka ndo a pa ɓai. A nʼnga na bi Libna lèmèlèmè ara man a ga na bi Jéricho.

³¹ Te deɓaʼa Josué a ndohi Israel tèlèba a nda nengaʼa, ta slambaɗa te Libna, a to do Lakis, a ta ɓicko va a tsagi nengaʼa, a ta gu var a nengaʼa.

³² A Ndo nzi pèc pècèk a mva ta kokwar Lakis a ri a ndohi Israel, a ta dumaʼa, te mʼmèn makulaʼa. A ta bazl ta a tsakwal, ndohi tèlèba man ta zhè a pa, a njèka ndo a pa ɓai, lèmèlèmè ara man a gu te Libna.

³³ A Horam, bi Guézer, a mshkè, aman a ntakaha ta ndohi Lakis. Aman Josué a nkeɗaʼa, a mbazl ta ndohi nengaʼa, a njèka ndo a pa ɓai.

³⁴ Te deɓaʼa Josué a ndohi Israel tèlèba a nda nengaʼa, ta slambaɗa te Lakis, a to do Eglon. A ta ɓicko va a tsagi nengaʼa, a ta gu var a nengaʼa.

³⁵ A ta dumaʼa a pats nasa, a ta bazl ta a tsakwal. A ngedas ta ndohi tèlèba te pa, lèmèlèmè ara man a gu te Lakis.

³⁶ A Josué a nslambaɗa, a ndohi Israel tèlèba a nda nengaʼa, te Eglon, a mdo Hé-bron, a ta gu var a nengaʼa.

³⁷ A ta dumaʼa, a ta bazl ta a tsakwal, a bi nengaʼa ba, kokwarhi mbibihiaʼa tèlèba, a ndohi tèlèba te pa. A njèka ndo a pa ɓai, lèmèlèmè ara man a gu te Eglon. A ngedas ta ndohi a skwi man a shèffè te pa tèlèba.

³⁸ Te deɓaʼa Josué a ndohi Israel a nda nengaʼa to do Débir, a ta gu var a nengaʼa.

³⁹ A ta dumaʼa, a bi nengaʼa ba a kokwarhi mbibihiaʼa ba. Ta bazl ta a tsakwal, ta gedas ta ndohi tèlèba te pa. A njèka ndo a pa ɓai. A ngu a Débir a bi nengaʼa lèmèlèmè ara man a gu te Hébron, lèmèlèmè ara man a gu te Libna a bi nengaʼa.

⁴⁰ Aranta Josué a nduma kokwar tèlèba: za, Négeb, der za, nkulgodok, a bihi tengaʼa tèlèba. A njèka ndo a pa ɓai, ko staɗ, a ngedassa skwi man a shèffè tèlèba, ara man Ndo nzi pèc pècèk, Zhiklè Israel, a nje na ma a gèɗ.

⁴¹ Josué a ndum ta, a hinè te Kadès-Barnéa, ha ndè Gaza, a kokwar Gosen ba tèlèba ha ndè Gabaon.

⁴² A Josué a nheldama, a nda bihi tengaʼa ba, a nda kokwar tengaʼa ba, te man Ndo nzi pèc pècèk, Zhiklè Israel, a ngu var te di man a Israel.

⁴³ Te deɓaʼa Josué a ndohi Israel tèlèba ta menkaɗ ta a deɓa a Guilgal, a sam man ta mana a pa.