Josué 1 - Ma Zhiklè

Josué, tsuvom ndohai

¹ Aman Moise, ɓèl Ndo nzi pèc pècèk, a mʼmets na ma, Ndo nzi pèc pècèk a ngaɗa na Josué, kra Nun, ndo ntakaha Moise:

² Moise, ɓèl ga, a mʼmets na ma. Anai slambaɗa, do a wud woyam Jourdain haha, kine a ndohi haha tèlèba, a kokwar man i woy a i va ta ndohi Israel!

³ Sam tèlèba man sak kinè a mbècè a pa, i va kinè, ara man i pasla na ri a Moise.

⁴ A hinè tʼhèshèkèɗ, a ndè za Liban, a ma ma, ha woyam Euphrate, kokwar ndohi Heth tèlèba, a ndè a ma woyam mbiaʼa te civèɗ nkèl pats, nasa kuma herkeda kinè.

⁵ Ko ndo staɗ da Sala ka va a gèɗ ɓai, a pats nshèffè ngaya tèlèba. Lèmèlèmè ara man i zhè a nda Moise te va nasa, i woya man i zhè a nda ka. I pra ka ma a gèɗ azɓai, i jèke ka a pa azɓai.

⁶ Gsa ndav ngaya a ka nze taraʼa a ma ma; ka da kezli kokwar a ndohi haha a skwi nʼndi gai man i woy a i va ta, ara man i mbaɗa ta babhi tengaʼa.

⁷ Aman gsa ndav ngaya genè a ka nze taraʼa. Dzodzor ma kita man Moise, ɓèl ga, a mva ka, pèc pècèk! Ka beza zlawa ɓai, aman skwi tèlèba man ka giaʼa a ngi amba.

⁸ Goɗ ma nte ɗèlèwèr kita ga haha pèc pècèk, a ka hérèʼa, a pats a vaɗ, aman ka gu skwi tèlèba ara man ta windeda pa. Te deɓaʼa ka ndikè a civèɗ ngaya amba, a skwi man ka giaʼa, a da gi amba.

⁹ I gaɗa ka ɓi ɗè: Gsa ndav ngaya a ka nze taraʼa! Ka gu zlau bai, ka gudzu ɓai, aman Ndo nzi pèc pècèk, Zhiklè ngaya, a zhè a nda ka a sam tèlèba man ka dè a pa.

¹⁰ Te deɓaʼa Josué a njè ta ma a gèɗ a bihi sojè:

¹¹ Va-beza a ndev ngwihai, va-gaɗa ta ndohai: Va-woy skwi nʼndi a rai! A da gi mʼmèn makar, ga kin dè a wud woyam Jourdain, a kin da cè kokwar man Ndo nzi pèc pècèk, Zhiklè kinè, a va kinè.

¹² Josué a ngaɗa ta ndohi Ruben a Gad a Manassé rètaʼa:

¹³ Va-hur ma man Moise, ɓèl Ndo nzi pèc pècèk, a njè kinè a gèɗ: Ndo nzi pèc pècèk, Zhiklè kinè, a va kinè nshèk va, a va kinè kokwar haha.

¹⁴ Ngwozi kinè, wudahi kinè a skwi kuɗom kinè da nza te kokwar man Moise a mva kinè a ma woyam Jourdain. Aman kinè ndohi var, vo-do a ma kramamhi kinè, a skwi var a va, a kin takaha ta,

¹⁵ ha pats man Ndo nzi pèc pècèk a va ta nshèk va a kramamhi kinè lèmèlèmè ara man a kinè, a tengaʼa ba ta dum kokwar man Ndo nzi pèc pècèk, Zhiklè kinè, a va ta. Te deɓaʼa kin da menkaɗ kinè a deɓa a kokwar man a kinè, man Moise, ɓèl Ndo nzi pèc pècèk, a mva kinè a ma woyam Jourdain, te civèɗ mvèng pats.

¹⁶ A ta mbeɗa na a ma Josué: Skwi tèlèba man ka njè nga, nga woy a nga giaʼa. Ko ahngwa ahngwa man ka zlinde nga a pa, nga dè.

¹⁷ Lèmèlèmè ara man nga fu gèɗ a Moise, nga da fi gèɗ a ma ngaya. Aman sèi Ndo nzi pèc pècèk, Zhiklè ngaya, da zhè a nda ka, ara man a zhè a Moise te va nasa.

¹⁸ Ko wawa man a Sala va a sam ma nkwèr ngaya, a fi gèɗ a ma ngaya a skwi tèlèba man ka njè nga a gèɗ azɓai, da mets na! Gsa ndav ngaya, a ka nze taraʼa!