Jonas 3 - Ma Zhiklè

Ninive a kuɗi a géɗ mali na

¹ Ndo nzi pèc pècèk a ngaɗa na Jonas macecèwaʼa:

² Slambaɗa! Do a kokwar Ninive, kokwar mbiaʼa, a ka njè ta ma man i gaɗa ka!

³ Jonas a nslambaɗa, a mdo a kokwar Ninive, ara man Ndo nzi pèc pècèk a gaɗa na. Ninive kokwar mbiaʼa a sam di Bi Zhiklè, ko mʼmèn makar ka dè te ndeva genè.

⁴ Jonas a mdo te ndev kokwar dra ara mʼmèn staɗ, a njè ta ndohai: Njèkè mʼmèn 40, a kokwar Ninive a gédèsh na.

⁵ Ndohi Ninive ta co Bi Zhiklè a ndav, a ta jèkeda skwi nʼndai, a ta feda maslaka sam kuɗa a va, ko ndohi ngraʼa, ko wudahai.

⁶ Aman bi kokwar a ntsena ma haha, a nslambaɗa a njèkeda sam nʼnzi bai, a nsuɗa na dawar auda a va, a mfeda maslaka sam kuɗa a va, a nʼnzahi a va mèrwèc.

⁷ A mbaha ta ndohi kokwar tèlèba, a ngaɗa ta, aman ko ndohai, ko skwi kuɗom, ko zlè, ko tambak, da ndu skwi ɓai! Da lè ta a sam mandi ɓai, da sau iyam ɓai;

⁸ aman da feda maslaka sam kuɗa a va, da kuɗau a sam Bi Zhiklè a vata, staɗ staɗ tèlèba da menkaɗa deɓa te civèɗ mali na,

⁹ te mali man a lizhèma na rai. Nsun wa? Wa ngiɗè ba nga si Zhiklè te va, a jèkeda ngi ndav, a nga zi azɓai.

¹⁰ A Bi Zhiklè a nrka skwi man ta gau, aman ta menkaɗa deɓa te civèɗ mali ta, ta su Zhiklè te va, a njèkeda skwi mwuɗitpa man a woya a nzlinda ta, nʼnga ɓai.