Jonas 1 - Ma Zhiklè

Jonas a woya a ndè Tarsis

¹ Ma man Ndo nzi pèc pècèk a ngaɗa na Jonas, kra Amitthai:

² Slambaɗa! Do a kokwar Ninive, kokwar mbiaʼa, a ka njè ta mali ta, te man mali tengaʼa a ndikakaɗa a sam ga.

³ Jonas a nslambaɗa, a mhu na auda a sam di Ndo nzi pèc pècèk dra, a woya a ndè a kokwar Tarsis. A ndo a kokwar Japho, a nʼngots wurom te pa, aman a ndè Tarsis. A mpau Suli a ndo wurom, aman a ndè Tarsis a nda ndohi nhèdè wurom, dra a sam di Ndo nzi pèc pècèk.

⁴ A Ndo nzi pèc pècèk a ngu kozlar mbiaʼa a géɗ woyam mbiaʼa, a ndombozlor mbiaʼa a ngu a géɗ woyam mbiaʼa, a ta huro, wurom a tuzlom na.

⁵ Ndohi wurom ta gu zlau a ta kuɗau; staɗ staɗ a sam zhiklè na. A ta wusheda kolongwi a va iyam, aman wurom a njèlè azɓai. Jonas a zhè te verzi wurom, a mʼmanatʼhai, a nzhuna tsektsekaʼa.

⁶ Bi wurom a mshkè a sam na, a ngaɗa na: Ka nzhun ar ka genè kè? Slambaɗa, tsu ri a zhiklè ngaya! Wa ngiɗè ba nga da si Zhiklè te va ɗè, a nga gedèshè azɓai.

Ta kalda Jonas a va iyam

⁷ Te deɓaʼa ngiɗè a ngaɗa na ngiɗè, ngiɗè a ngaɗa na ngiɗè: Vo-washkè, ngo-gokoy jimèr, a nga shinèʼa, mali haha mali ngè, aman matakwan haha a mshkè a géɗ nga. Aman ta gu jimèr, jimèr a nkala na a gèɗ a Jonas.

⁸ Ta gaɗa na: Ngra nga, ka ge mizlinè mè, ka shkè te kokwar nangwa, gwoli ngaya wa?

⁹ Jonas a ngaɗa ta: I ndo Hébreu, i gi zlau Ndo nzi pèc pècèk, Zhiklè te zhiklè te géɗèʼa, man a ngu iyam mbiaʼa a herkeda.

¹⁰ A ndohi ta gu zlau a vata, a ta gaɗa na: Ka ga mè? Ta suna, a mhu na auda a sam di Ndo nzi pèc pècèk dra, te man nengaʼa a ngaɗa ta.

¹¹ A ta gaɗa na: Nga da ga ka kè, a iyam a nzi géɓitèʼa? Aman iyam a hubètè tskuɗuf-tskuɗufaʼa a ma ma.

¹² Jonas a ngaɗa ta: Va-gsyè, a kin kaldyè a va iyam, a iyam mbiaʼa a da nzi gébitèʼa. I suna, ndombozlor mwuɗitpa haha a ga kinè a géɗ ga.

¹³ Ndohi ta wurr wurom, ta woya ta ndikè a ma dzah woyam, ta slaha ta dè auda ɓai, aman woyam mbiaʼa a mendka ta a deɓa.

¹⁴ A ta tsu ri a Ndo nzi pèc pècèk, a ta gaɗa: Wa Zhiklè, ka zede nga ɓai! Aman nga da kalda ndo haha a iyam, ka fa nga mali a gèɗ a ka gaɗa: ta keɗa ndo ɓai! Aman ka ngu ara man ka woyaʼa.

¹⁵ A ta gso Jonas, a ta kalda a va iyam, a iyam mbiaʼa a njèkeda nhubètè;

¹⁶ a ndohi ta gu zlau Ndo nzi pèc pècèk a vata, a ta zla na skwi a Ndo nzi pèc pècèk a ta gaɗa na ma a hai.