Joel 3 - Ma Zhiklè

¹ Te deɓaʼa a vi sa, te ndev nasa, i da helka ta ndohi Juda a ndohi Jérusalem a deɓa te ɓèlè,

² a i da ɓic ta ndohi herkeda tèlèba zaʼa, a i de ta a dal Josaphat. Te pa i da ga ta kita a géɗ ndohi Israel, ndohi ga, a géɗ man ta ksar ta a va ndohi herkeda, a ta kezla kokwar a va ta.

³ A géɗ man ta gu jimèr a géɗ ndohi ga, a ta hul wud ngurhi a ta pre ta ma a ta humbaɗ ta a fali dalahai. A ta pre ta dalahai a ma a zom.

Tyr, Sidon, kokwar Philistie

⁴ Kinè ba, kin woy te ri ga mè, Tyr a Sidon a kinè ndohi kokwar Philistie tèlèba? Kin woy a kin pelay gèɗ ɗè, ɗè kin woy a kin gay skwi ambaɓiaʼa ɗè? I da ngwoda kinè skwi man kin woy a kin giaʼa a gèɗ tsam-tsam.

⁵ Kin helamay verzhègenè a guro ga, a skwi mèshèlè ga,

⁶ a kin peda a gi bihi kinè. Wudahi Juda a Jérusalem kin pra ta a ndohi Grec, dra a sam kokwar bab ta.

⁷ Na haha i da bahka ta a deɓa a sam man kin pre ta a pa, a i ngwoda kinè skwi man kin gu a haha a gèɗ.

⁸ I da pa ta wudahi a dalahi kinè a ndohi Juda, a ndohi Juda ta da pre ta a ma a ndohi Sabée, ndohi dra, Ndo nzi pèc pècèk a ngoɗa.

⁹ Vo-boho ma haha te ndev ndohi herkeda, va-tila skwi var, va-baha ta ngul ndohai! Ndohi var tèlèba sèi da ɓicko va!

¹⁰ Va-viɗeda devar kinè a ma a tsakwal, a gwodza kinè a sulom! A ndo man wuɗi na azɓai, da goɗa: I ngul ndo!

¹¹ Va-slambaɗa, kinè ndohi herkeda te tsagiaʼa tèlèba va-ɓicko va! Ndo nzi pèc pècèk, ɓic ta ngul ndohi ngaya a pa!

Dai Josaphat

¹² Ndohi herkeda sèi ta slèmbèɗè a ta dè a da! Josaphat. Aman te pa i woy a i gi kita a ndohi herkeda tèlèba.

¹³ Va-hulko gwodza! Skwi nsla ma! Vo-washkè, skwi nʼndha te klok ma! Vo-kolo! Skwi a bèdè auda te shidèf. Mali tengaʼa a zhè mbiaʼa.

¹⁴ Ndohi rèdèdèʼa, ndohi rèdèdèʼa ta a dal kita, aman pats kita Ndo nzi pèc pècèk, ndul ndul.

¹⁵ Pats a kia ta nde ta a ruva, a bantihai ta hél sam asaɓai.

¹⁶ Ndo nzi pèc pècèk a bèhè a wuɗai te Sion. Te Jérusalem ta tsena daʼai nengaʼa. Gidfèk a herkeda ta gudzai. Aman Ndo nzi pèc pècèk, sam ndohi na nlèaʼa, gi ndakmaʼa a sam ndohi Israel.

Zhiklè te Sion

¹⁷ Kin da suna, i Ndo nzi pèc pècèk, Zhiklè kinè, man i zhè te Sion, za ga nkezlaʼa. Jérusalem, kokwar nkezlaʼa, ndo nte deɓa a da bizhè a pa azɓai.

¹⁸ A pats nasa a gi aman barassa a hakaɗi te za, a wa te ngègèɗhai. Iyam a hi te woyam Juda tèlèba. Nlèlè iyam a hakaɗauda te gi Ndo nzi pèc pècèk, a ruɓa dal Sittim.

¹⁹ Egypte a nʼnde na hèshèkèɗ, a Edom a sam man skwi a gi a pa azɓai, a géɗ mali man ta gu a sam ndohi Juda, man ta keɗa ndo man nʼnga mali ɓai te kokwar ta.

²⁰ Aman ndohi ta da nzi te kokwar Juda a mèdèp, a ta nzi te Jérusalem a ma ma te verzi wud wuda.

²¹ I da ga ta kita a gèɗ a ndohi man i ga ta kita di ɓai, i jèkè azbai. A Ndo nzi pèc pècèk a da nzi te Sion.