Joel 2 - Ma Zhiklè

Vo-ngwoda ndav!

¹ Va-tsu tolom te Sion, va-guzlau a géɗ za ga nkezlaʼa! Ndohi te kokwar tèlèba, va-gudzau! Aman pats kita Ndo nzi pèc pècèk a zhè, a zhè ndul ndul ma.

² Pats man ruva, di a rkè azɓai, pats vanai, pats ndodok. Gèɗ za mʼmadza tüdükaʼa, a ndo; ndohi ta ndev ɓai, wuɗi ta a zhè, daga zlèzlèʼa ngar na haha azɓai, a ndè a ma ma ba a gi ar haha azɓai, ha verzi wud wuda ngiɗè.

³ A ma tengaʼa vogwa a hèrè a pa. Te verzi tengaʼa, vogwa a gskaɗa pa. A ma tengaʼa sam mbelaʼa ara gi lak Eden; te deɓ tengaʼa tazli hèshèkèɗ. Ndo ngiɗè ko staɗ njèka ɓai.

⁴ Aman ka pi dai, ka rka ara plèsh, aman ta hi ara ndohi man a deɓ plèsh.

⁵ Nhèzlèwè kiki var man a hi tsuvodoh tsuvodohaʼa a géɗ za, a gi ngolalam ngolalamaʼa ara vogwa man a ndi kuza a nhèzlèwè dèdèdèʼa. Ara ndohi man wuɗi ta zhè, ta ɗaha a ma var.

⁶ Ndohi ta wush ta hi a ma tengaʼa te ri zlau, a nʼngwode ta kuftorhaʼa.

⁷ Ta hi ara ngul ndohai, ta tivè a géɗ zlazlar ara ndohi var, staɗ staɗ tèlèba a dè zuraʼa a ma nengaʼa, ta bizhè zlawa azɓai.

⁸ Ta derzla va azɓai, staɗ staɗ tèlèba ta hi a civèɗ ta, ta bizhè a ndev tsakwal, aman a tez ta azɓai.

⁹ Ta kala na va a kokwar, ta tivè a géɗ zlazlar, ta hi a gai, ta bizhè a nvakavar ara ndo metsar.

¹⁰ Herkeda a gudzai a ma tengaʼa, giɗfèk a gidè va, pats a kia ta nde ta a ruva, bantihai ta hel sam azɓai.

¹¹ Ndo nzi pèc pècèk a mboho a ma ndohi var nengaʼa. Ndohi var nengaʼa kumba, a skwi man nengaʼa a ngaɗa ta, ta gia a wuɗai. Pats kita Ndo nzi pèc pècèk, pats mbiaʼa, mwuɗitpa a vata. Nslaha a nzlècè a pa wa?

¹² Aman ko antanta ba, Ndo nzi pèc pècèk a gaɗa: Va-ngwodko ndav kinè tèlèba a sam ga, va-jèkeda skwi nʼndai, va-kudau, va-gu wobau, kin kuratsa maslaka kinè ɓai, aman va-kuɗu te ndav kinè!

¹³ Va-menkada deɓa a sam Ndo nzi pèc pècèk, Zhiklè kinè. Nengaʼa, pombi na zhè, ndo a sia te va, a gi ndav tsam-tsam azɓai, ndav na amba, a jèkeda kita man a woya a giaʼa.

¹⁴ Nsun wa? Wa ngiɗè ba a hèrè te deɓaʼa, a jekeda ngi ndzoan, a pshè kinè ma a movar a skwi nsai man a Ndo nzi pèc pècèk, Zhiklè kinè.

¹⁵ Va-tsu tolom te Sion! Vo-boho aman ta jèkeda skwi nʼndai, va-ɓic ta mpi ndohai!

¹⁶ Va-ɓic ta ndohai, va-ga mɓicè-va ndohai a nkezlaʼa a sam Ndo nzi pèc pècèk, va-pe ta ndohi nhalaʼa a géɗ ta, va-ɓic ta gdahi a wudahi man a wa; ntsima a shkè auda te gi na, medemi a shkè auda te vèn.

¹⁷ Ndohi mvi skwi a Zhiklè sèi ta kuɗi te ndev mozodo, a sam mvi skwi a Zhiklè. Ndohi mizlinè Ndo nzi pèc pècèk ta gaɗa: Ndo nzi pèc pècèk, ka ga ta matakwan a ndohi ngaya holholaʼa ɓai, ka gedas ta ndohi nʼndi gi ngaya ɓai, man ɓai ndohi herkeda ta ngwossaha ta. Ndohi herkeda da goɗa: kos Zhiklè tengaʼa tema, èhèmè?

Israel ntila

¹⁸ Ndo nzi pèc pècèk a ngu srak a géɗ kokwar na, a ndohi nengaʼa ta sia te va.

¹⁹ Ndo nzi pèc pècèk a mʼmbeɗka ta ma a ngaɗa ta ndohi na: Na haha i da va kinè dau a zom a mbar, a kin ngézhè a vna. A ndohi herkeda ta da ngwossaha kinè te deɓaʼa azɓai a mèdèp.

²⁰ Mayam kinè te civèɗ kozlar iyam i dzamda auda dra a sam kinè, a i zukda a kokwar man iyam a te pa ɓai, man skwi a gi a pa azɓai; ndohi nshèlèkuraʼa a ma iyam mbiaʼa, te civèɗ mvèng pats, ndohi man ta dzadzar ta te deɓa a ma iyam mbiaʼa te civèɗ nkèl pats. A zhkè dukedukeʼa, mblè a zhkè, a géɗ man nengaʼa a gre gèɗ na.

²¹ Herkeda, ka gu zlau ɓai! Wuffa, gu langlangaʼa, aman Ndo nzi pèc pècèk a gi skwi mbiaʼa.

²² Kin skwi dakhai, kin gu zlau ɓai, aman sam mandai a dai zaʼa, wof a yi skwi na, wof kslor a wof te gi lak ta pi wuda kumba zaʼa.

²³ Kinè wudahi Sion, va-wuffa, va-gu langlangaʼa a géɗ Ndo nzi pèc pècèk, Zhiklè kinè, aman nengaʼa a va kinè skwi nʼndai a kin mbel kinè; a nzlinda kinè iyam, a iyam nzlekai a iyam ntil skwai ara zlèzlèa.

²⁴ Wov a da ndhè zaʼa, a dau, a barassa a bèdè auda te duzlak, a mbar te gatsak.

²⁵ I woy a i menda kinè skwi a deɓa man mèjèn a meturɗi a wuɗa a nvovrom ta ndau, man i pu a ndohi var ga kumba man i zlinda kinè.

²⁶ Kin ngézhè va a skwi nʼndai, a kin da slébèrdè nzlembaɗ Ndo nzi pèc pècèk, Zhiklè kinè, man a ngu nrkedi a sam kinè.

²⁷ A kin da suna, i zhè te ndev ndohi Israel, iyè Ndo nzi pèc pècèk, Zhiklè kinè, nengaʼa staɗgenè. A ndohi ga ta da ngècè hori a di azɓai a mèdèp.

²⁸ Te deɓaʼa a da gi aman i bèdè Mè-zhèɓ ga a géɗ ndohi tèlèba, a wudahi kinè a dalahi kinè sèi ta hodko ma Zhiklè; ndohi kinè nhalaʼa ta ngècè nshunè, a golahi kinè sèi ta rka skwi man a ma.

²⁹ A pats nasa i woy a i bèdè Mèzhèɓ ga a géɗ ɓèlèlihi ba, ko nguraʼa ko ngwoz.

³⁰ I woya man i ngredè nrkedi te zhiklè te géɗèʼa, a i ngredè skwi tʼhai tʼherkeda, Pombaz a vogwa a vodzok.

³¹ Pats a da ngwèdè va na a ruva, a kia a da ngwèdè va na a Pombaz; te deɓaʼa pats kita Ndo nzi pèc pècèk a shkè, pats mbiaʼa, mwuɗitpa.

³² Te deɓaʼa ko wawa man a tsi rai a nzlembaɗ Ndo nzi pèc pècèk, a mbéi na; aman skwi mʼmbél ndo a da zhè a géɗ za Sion, a da zhè te Jérusalem, ara man Ndo nzi pèc pècèk a mpasla ta rai, a zhè a sam ndohi man ta wuckaɗ ta, man Ndo nzi pèc pècèk a mbaha ta.