Joel 1 - Ma Zhiklè

¹ Ma man Ndo nzi pèc pècèk a gaɗa na Joel, kra Pethuel.

Skwi ngedèshè skwi mbiaʼa

² Kinè ndohi nhalaʼa, va-tsena ma haha! Kinè ndohi kokwar tèlèba, va-fu zlembaɗ! Skwi man a gi a sam kinè a haha, ngu a sam kinè pats ngiɗè ma ɗè, ɗè a sam babhi kinè ngu ar haha ɗè?

³ Va-njè ta wudahi kinè, a wudahi kinè da njè ta wud ta, a wud ta a ndohi te verzi ta, a ndè a ma ma te verzi wud wuda.

⁴ Skwi man mèjèn a njèkeda, meturɗihi ta ndau; skwi man meturɗihi ta jèkeda, wuda a ndau; skwi man wuda a njèkeda, nvovrom a nʼndedama.

⁵ Va-pidèkwa, kinè ndohi zom! Va-kudau! Va-gu wobau, kinè ndohi zom tèlèba, a géɗ man zom klèng ma.

⁶ Ndohi herkeda ngiɗè ta shkè a ta kala na va a kokwar ga, wuɗi ta zhè, ta ndev ɓai. Zlèʼèn tengaʼa ara zlèʼèn marizhèlè. Ndulgom tengaʼa ara man a mam marizhèlè.

⁷ Ta gedassay gi wof barassa ga, ta berzlay wof kslor ga, ta patay deɓaʼa aussa. Ri wof nengaʼa nʼngurzl na ma.

Kuɗa a sam Zhiklè

⁸ Gau wobau ara dem man a kuɗi baki gol na, a maslaka sam kuɗa a va.

⁹ Te gi Zhiklè ta va na movar a skwi nsi a Zhiklè azɓai, ta jèkeda. Ndohi mvi skwi a Ndo nzi pèc pècèk, man ta gi mizlinè Ndo nzi pèc pècèk, ta kuɗai.

¹⁰ Gi dau a nʼnde na a gi zlambi ma. Herkeda a mwuc na ma, dau ngedas na ma, zom a nshe na, mbar a nhusl na.

¹¹ Kinè ndohi mpizhè, va-kudau! Ndohi mɓer gi lak, va-loyo dau a marori, aman ta ɓicè skwi te gi dau asaɓai.

¹² Gi lak ngwora, wof kslor mɓut na ma, wof ngurdyök, wof gangar, wof hawan, wof te dak tèlèba, ta gwor ta. Mwuffe a nʼngwoda na a nlèyè, ndohi a géɗ herkeda ta ngècè mwuffe asaɓai.

¹³ Va-feda maslaka sam kuɗa a va, kinè ndohi mvi skwi a Zhiklè! Kinè ndohi mizlinè sam mvi skwi a Zhiklè, va-kudau; kinè ndohi mizlinè Zhiklè ga, va-gudzau, ko vaɗ kin suɗda maslaka sam kuɗa a hi ɓai! Aman movar a skwi nsai a shkè a gi Zhiklè kinè azɓai.

¹⁴ Vo-boho, a ndohi ta jèkeda skwi nʼndai a ta tsi rai. Va-baha ta mpi ndohi Zhiklè! Va-ɓic ta ndohi nhalaʼa a ndohi herkeda tèlèba a sam gi Ndo nzi pèc pècèk, Zhiklè kinè, va-kudau a sam Ndo nzi pèc pècèk!

¹⁵ Wobau a pats nasa! Pats Ndo nzi pèc pècèk a zhè ndul ndul. A shkè ara skwi ngedassa skwai te ri Bi Zhiklè wuɗai.

¹⁶ Skwi nʼndai nde na auda a sam di nga, a mwuffe a dimèsh kala auda te gi Zhiklè nga.

¹⁷ Tser skwai a nhusl na te vèvèd. Te wov, modo a peɗiaʼa. Huzhèɓ mʼmbeɗ na, a géɗ man dau azɓai.

¹⁸ Skwi kudom ta gwor ta, mi a keɗ ta zlèhai, a géɗ man ta ngatsa sam mandi ɓai. Ko rèwè tambakihi ba ta bèzl ta.

¹⁹ Ndo nzi pèc pècèk, i kuɗi a sam ngaya! Vogwa a nʼndeda dak tʼhèshèkèɗ a ma, vogwa a nʼnde ta wofhi a ma te dak.

²⁰ Ko skwi dak ta kuɗi a sam ngaya; aman iyam te woyam a ngwor na ma, vogwa a nʼndeda dak tʼhèshèkèɗ a ma.