Job 9 - Ma Zhiklè

Job a mbeɗa na ma a Bildad

¹ Job a hünoa ngaɗa:

² A vava i suna aranta: A sam di Zhiklè ndo nzuraʼa a zhi ɗè?

³ Aman a woya a nvirslè a nda nengaʼa, ko a gèɗè ma a gi 1.000, ndo a slaha a mbeɗa na a pa ɓai, ko staɗ.

⁴ Zhiklè, maya na zhè, wuɗi na zhè kumba. Nda Sala na va a gèɗ, a skwa a ga na te deɓaʼa azɓi, wa?

⁵ A pul zahai, a pe ta a sam ngiɗè, ta senaha bai; a mbeɗda zahi a hi a ndav.

⁶ Aman a gidè herkeda, sak nengaʼa a gudzai.

⁷ A gaɗa na pats: Ka vang ɓai! A pats a vèngè azɓai. A zeda bantihai,

⁸ a wuzhè giɗfèk, nengaʼa staɗgenè, a ndè a géɗèʼa, a géɗ woyam mbiaʼa.

⁹ Nengaʼa a ngu ngazl-zlè, a lèkèɗ, a ntèkocèk, a mavar dukwaɗ.

¹⁰ A gi skwi mbiaʼa, verzi nengaʼa a shinè azɓai, a gi nrkedi a ndiv ɓai.

¹¹ Aman a bizhè auda a sam ga, i rka ɓai; aman a dè, i sun ɓai.

¹² Aman a helda skwi a ma, nslaha a nʼnza na a civèɗ wa? Ngaɗa na: Ka gi mè, wa?

¹³ Bi Zhiklè a mʼmanda ndav nengaʼa a hi ɓai, a ckoɗauda; ndohi ntakaha nfi va ta kalahi a deɓ sak nengaʼa.

¹⁴ A iyè, i slaha i mbeɗa na a ma dè, i ngècè ma man i gada na dè?

¹⁵ Ko man i goɗ a nzuraʼa, i slaha man i mbeɗa na a ma ɓai, sèi i tsi rai a sam ndo kita ga.

¹⁶ Aman i baha na a kita, a fa na gèɗ azɓai, i suna i gada, a mco ma ga, i sun ɓai.

¹⁷ Nengaʼa man a gsyè te va kozlar, a pakay mble a va kumba ambalai,

¹⁸ i amba a ishèffè ɓai, a ngezyè a matakwan kotèkotèʼa.

¹⁹ Aman ka jhèdè wuɗai: nengaʼa wuɗi na zhè. Ko a sam kita: mwoy a mbaha na wa?

²⁰ Ko man i goɗ a nzuraʼa, ma ga a ngwodkoy va a gèɗ, a mfokoy mai i a gèɗ, ko i ga mai i ɓai.

²¹ I ga mali ɓai! Aman i nzi a nshèffè, a ga ga pa mè? I derɗa nshèffè ga.

²² Gar haha i gada: Tsaɗ tsaɗ azɓai! Ko ndo man mali na azbai, ko ndo malai, Zhiklè a gedas ta cèw cèw ba.

²³ Aman mènèwèd nengaʼa a keɗa ndo a nasa nasa, a ngwèshè a géɗ kuɗ ndo man a nʼnga mali ɓai.

²⁴ Aman ndo ambaɓi ngiɗè a ceda kokwar ngiɗè a ma, a pizlè di na a sam ndohi kita na, ara man a rka bai. Aman nengaʼa ka bi, kos wa?

²⁵ Patshi ga ta hi ta a fena ndo man a hai, ta hi ta, a i ngatsa manam ɓai.

²⁶ Ta hi ara wurom a géɗ iyam, ara mangayak a kèlè a va skwai.

²⁷ Aman i woy a i gada: nleyè ga a pcay a gèɗ, i shfa dai a i pi di ngwèshè! –

²⁸ i gi zlau skwi man a dzayè genè, te man i suna, ka pryè azɓai.

²⁹ Aman a vava i ndo malai, i gedè matakwan a va ga ambali èhèmè?

³⁰ Ko i pana va ga a iyam nkèɗècèʼa, ko i pana ri ga a sabelam,

³¹ ar ka viyè a va skwi nlizhèʼa, shüɗok, ko maslaka a va ga ba, i ndara na.

³² Nengaʼa ndo ara iyè ka ɓai, a i slaha a i mbeɗa na a ma ɓai, nga slaha nga dè kita a vna ɓai.

³³ Ndo mbazla nga kita azɓai, man a pa nga ri a gandaf.

³⁴ Da cèmay mènèwèɗ nengaʼa auda a sam ga, a zlau man a pray a va da dzakaɓamay gèɗ ɓai!

³⁵ Gar haha i woy a i gèɗè, i gi zlau nengaʼa azɓai. Aman skwi haha i sun te ndav ga ɓai.