Job 7 - Ma Zhiklè

¹ Ndo a géɗ herkeda, kala man nte var ka bi dè? Ndo a géɗ herkeda ara ndo man a vak a mizlinè ka bi dè?

² Ara bèlè man a kuɗi mèzhèɓ wof, ara ndo mizlinè man a zhèr skwi ntul na.

³ Aranta i ngots matakwan a kia kia, a i ngots matakwan man a gayè a vaɗ a skwi ntul ga.

⁴ Aman i manatʼhai, i gaɗa: Sam a ciɗè a ngèmè? Aman i slèmbèɗè, i gada: Pats a kèlè a ngèmè? I ngècè nshèk va azɓai, ha sam a kézhèwè.

⁵ Mblè a zlèzlèmè a va tèlèba. Hutèɗ va ga a pi tolom a maʼa, a tuwè zaʼa.

⁶ Patshi ga ta hi ara wurom ntsi maslaka – auna, auna, skwi man i zhèrè te pa azɓai.

⁷ Zhiklè, huro, nshèffè ga ara kozlar. A mèdèp di ga a ngècè manam asaɓai.

⁸ Ndo man a woya a rkayè, a ngatsyè azbai. Ka pakay dai, ka rkay ɓai.

⁹ Lèmèlèmè ara vanai man a hi na, a woss na, ndo man a dè a sam mʼmetsai, a shkè a deɓa asaɓai,

¹⁰ a shkè a deɓa a gi na asaɓai, a sun sam man a nza a pa halaʼa asaɓai.

¹¹ I ba i pizlè ma ga azɓai, i woy a i njè ma matakwan ga auda dai, i gi wobau te ndev nlèyè ga.

¹² I woyam mbiaʼa, i skwi ara kedam te woyam a ka vay ndo mɓeryè dè?

¹³ I gada: sam mʼmènè ga a da bidyè, sam mʼmènè ga a da pay a pa ndav;

¹⁴ te deɓaʼa ka pray zlau a va a nshunè, a skwi man i rka te nshunè a vaɗ a gudzedyè,

¹⁵ a ndav ga a hur dara ta paslamay daʼai, dara mʼmetsai a géɗ matakwan.

¹⁶ Aʼai, i woy a i nzi a mèdèp azɓai. Jèkyè! Patshi ga ara kozlar.

¹⁷ Ndo mè aman ka rkaʼa ara skwi mbiaʼa, a ka hérèʼa,

¹⁸ a ka wèrèʼa a prèk a prèk, a ka jkedèʼa lèk lèk.

¹⁹ Ka da cèhay di a ngèmè? A i ngècè nshèk va zhèɓèt kata.

²⁰ Aman i gu malai, kos i gi kè, ka ndo mɓer ndohai. Ka gu skwi haha aman i ndara ka èhèmè?

²¹ Ka pray mali ga azɓai èhèmè? Ka fa na kwa a géɗ mali ga azɓi èhèmè? Man i ma, i dè vèvèɗ; aman ka da woy iyè, ka da ngatsyè asaɓai.