Job 6 - Ma Zhiklè

Job a mbeɗa na ma a Eliphaz

¹ Job a hüno a ngaɗa:

² Hai! Man a matsa i slaha i livè nlèyè ga, a i feda matakwan ga a kilo!

³ Te man a njèlè, a fena wyak te woyam, a géɗ nengaʼa ma ga a zlak na.

⁴ Sulom Bi Zhiklè man wuɗi na zhè, a dzayè, dèrè nengaʼa a ruɓyè te va. Bi Zhiklè a mpray zlau nengaʼa man wuɗitpa a va.

⁵ Man mandi a zhè a ma kɗèh, a kuɗi ɗè? Aman ksof a zhe a ma zlè, a kuɗi dè?

⁶ Lak man boma a te di bai, ta ndia dè? Iyam slasli nslekaɗaʼa a jèn de?

⁷ Skwi man i woy a i tèrè halaʼa ɓai, a nʼnde na a skwi nʼndi ga antanta.

⁸ Skwi man i tsi ri a géɗèʼa, da shkè. Bi Zhiklè da vay skwi man i jhèɗèʼa!

⁹ Dara Bi Zhiklè a haslyè a pa, da proko rai, da ndevdyè.

¹⁰ Aman aranta skwi mbidyè a zhè, a i wuffè, ko skwa a ndzayè a vata, a géɗ man i tsakala ma a géɗ Zhiklè nkezlaʼa ɓai.

¹¹ I ngots wuɗi tema a i zhèrè a ma ma. Ndikè-ma nshèffè ga na ahngwa, aman i nzi a ma ma?

¹² I vi auda ara kwa dè? Zluèɗ va ga züdo dè?

¹³ A vava i slaha i takaha va ga a ri ga bai. Skwi ntaka-hayè az a sam ga bai.

¹⁴ Ndo matakwan ar a si nslamagi na te va, ko a njèkeda Zhiklè, ko a njèkeda bai.

¹⁵ Kinè kramamhi ga, kin ngwodyè tʼhwaɗaʼa te nʼnderh ma ambalai.

¹⁶ Ara iyam a hi te woyam a wuɗai a via,

¹⁷ a ngwar a gwèr na.

¹⁸ Ndohi zlugumihai ta gshè civèɗ ngiɗè, ta dè hèshèkèd a ta zi ta.

¹⁹ Ndohi zlugumihi te Théman ta ngél dai, ndohi gani te Séba ta zhér skwi a dai.

²⁰ Aman skwi man ta co a ndav, a ngwode ta te deɓaʼa, ta ngècè azɓai. Aman ta ndikè a pa, gèɗ ta ndzakaɓa.

²¹ Kinè a sam ga antanta lèmèlèmè arsa. Kin pakay dai, iyè te skwi mwuɗitpa, a i ndara kinè.

²² I gaɗa kinè: Va-vay skwaʼa – i goɗ ɗè? I dzhoɗo skwi mèshèlè kinè ɗè?

²³ Va-mbelkay auda te ri ndo mayam ga, va-pryè auda te ri ndo wuɗai – i gada kinè dè?

²⁴ Va-sendayè, a i nzi tètè! Va-ngray skwi manayakedyè!

²⁵ Ma nzuraʼa a jèn! Aman ma kinè a ngezyè, a takahayè te mè?

²⁶ Kin woy a kin gay ndzoan a géɗ ma ga dè, a kin gada ndo man ta keɗa na va a hi a gèɗ ma ambali dè?

²⁷ Ko kra dikai, kin cèmma a géɗèʼa. Ko mandal kinè, kin verslè a géɗèʼa.

²⁸ Aman va-pakay dai! Ma man i gada kinè a dai, ma ncèkèlma ka ɓai.

²⁹ Dè ma! Ngi mali nta ka ɓai! A vava ngi-zuraʼa ga a zhè dai.

³⁰ I sun ngèɗè ɓi ɗè? I sun nɗél skwi mbelaʼa te va skwi ambaɓiaʼa ɓi ɗè?