Job 5 - Ma Zhiklè

¹ Boho da! Nda mbeɗka ka a ma wa? Te va ndohi nkezlaʼa ka da bèhè wa?

² Ngi ndav a ngédèshè ndo nrzlaʼa. Nlèyè a kéɗè ndo man maya na azɓai.

³ I rka ndo nrzlaʼa a nza dai, aman tsam-tsam gi nengaʼa ngedas na.

⁴ Wudahi nengaʼa ta dra a sam skwi ntakaha ta. Ta zler ta a sak a sam kita, ndo ntakaha ta azɓai.

⁵ Skwi nʼndi man ta ɓicaʼa, ko nkal tʼhai, ndo ngiɗè man mi a keɗaʼa a ndiaʼa, a heldama, a nda ngheda. Metsarhi ta ngezlama ta skwi mèshèlè ta.

⁶ Matakwan a tsoko gèɗ tʼherkeda ka ɓai. Nlèyè a ftska tʼherkeda ka ɓai.

⁷ Nlèyè a shkè, a dè na, ara ndidiyam. Ta yu ndo a nsi matakwan.

⁸ Aman agassa iyè, ar i gada na Zhiklè, a i ngra na ma ga a Bi Zhiklè.

⁹ Nengaʼa man a gi skwi mbiaʼa, man ndo a slaha a sun verzi na ɓai, nrkedi man ndo a slaha a ngrèʼa ɓai.

¹⁰ Nengaʼa a ngoko iyam a herkeda, a zlündo iyam a dala,

¹¹ A Zlatseda ta gèɗ a ndohi man ta manda gèɗ a hai, a slambaɗda ta gèɗ a ndohi man ta kuɗai.

¹² A gedassa skwi man ndohi kilèa ta herdahai, ta slaha ta gi skwi man ta woy a ta gia ɓai.

¹³ A ngs ta ndohi maya te kilèa ta, a ndohi ncèmma man ta cerèh ma.

¹⁴ Ta te ruva a pats tʼuda. A géɗ pats ta tètèmè va ara vaɗ.

¹⁵ Zhiklè a mbél mbelawa te ri tsakwal tengaʼa, a mbél ndo ntawassaʼa te ri ndo wuɗai.

¹⁶ A ndo ntawassaʼa a ngècè wuɗai, a zhèr skwi a ma ma, a tseda na ma a pa a ndo malai.

¹⁷ Gar haha, mwuffe a sam ndo man Bi Zhiklè a ngatsa na maya. Aman Zhiklè Bi-wuɗai a ngez ka, ka kwola ɓai!

¹⁸ Aman Zhiklè a gi mblè a va ndo, a mènè zaʼa. A tsi ndo, a mbélèʼa zaʼa.

¹⁹ A da Preka ka auda te ri skwi mwuɗitpa mokwa, matsaradaʼa a da ga ka azɓai.

²⁰ Aman ka tiɗè a mai, a preka ka auda te mʼmetsai, a preka ka auda te ri tsakwal a ma var.

²¹ A ɓér ka te ri ma ambaɓiaʼa man a dza ka; a ngédèshè ngiɗè a shkè, ka da gi zlau azɓai.

²² Ngédèshè ba, a mtasl ba, ka da mbeɗi azɓai, ka da gi zlau skwi dak azɓai.

²³ Ka gi zlau kwa te gi dau azɓai, a kin gi mandala a skwi dak.

²⁴ Gi ngaya a da ngècè pombai, kudom ngaya a da ndhe na.

²⁵ Ka da suna, ndohi te verzi ngaya ta mènè a vata, wudahi ngaya ta gi ara pombok.

²⁶ Ka da gi a mpasla torok, ara dau man tiɗè sam ntsia ma.

²⁷ Nasa maya man nga ngotso. Arsa a vava. Fu gèɗèʼa, a ka ba ka shinèʼa!