Job 42 - Ma Zhiklè

Job a nʼngwoda ndav na

¹ A Job a mʼmbeɗa na ma a Ndo nzi pèc pècèk, a ngaɗa:

² Antanta i sun ma, ka slaha skwi tèlèba. Ko skwi staɗ man ka huro, a ka giaʼa, a fen ka azɓai.

³ Ndo wa man a pa na skwi a di a skwi man ka hérèʼa a ma ambalai? I gaɗda di na ka ɓai. Skwi man a fenyè a yakedyè.

⁴ Tsenaʼa, i da gèɗèʼa. I woy a i jhèɗèʼa, a ka sendayè!

⁵ I tsena labar ma ngaya a zlembaɗ genè; aman antanta i rka ka a di ga ma.

⁶ Gar haha i ngreda mali ga auda, i kuɗi a géɗ mali ga tʼherkeda, te va mèrwèc.

⁷ Aman Ndo nzi pèc pècèk a ngaɗa na Job ma haha ma, a ngaɗa na Eliphaz te Théman: I gi ndav a géɗ kinè a mandalahi ngaya cèw, a géɗ man kin goɗ ma a géɗ ga zuraʼa ara Job, ɓèl ga, ɓai.

⁸ Anai va-hul marihi 7 a droki 7, vo-do a sam Job, ɓèl ga, va-ndara na skwi a Zhiklè a géɗ va kinè. A Job, ɓèl ga, a da tsi rai a géɗ kinè. Sèi ntsi ri Job man i da cèʼa; te deɓaʼa i da ga kinè skwi ambaɓiaʼa azɓai, a géɗ man kin goɗ ma a géɗ ga zuraʼa ara Job, ɓèl ga, ɓai.

⁹ A Eliphaz te Théman, a Bildad te Shuach, a Tsophar te Naama, to do a ta gau ara man Ndo nzi pèc pècèk a ngaɗa ta. A Ndo nzi pèc pècèk a nco tsi ri Job.

¹⁰ Te deɓaʼa Ndo nzi pèc pècèk a nʼngwoda matakwan Job, aman a ntsu ri a géɗ nslamagihi na ma, a Ndo nzi pèc pècèk a mva na skwi ta ta man a ngots halaʼa cèw.

¹¹ A kramamhi nengaʼa tèlèba a demamhi nengaʼa tèlèba a gwoli na halaʼa tèlèba ta shkè a sam na, a ta ndau skwi te gi na. Ta ga na cèka, a ta bidèʼa a géɗ matakwan tèlèba man Ndo nzi pèc pècèk a nzlündoko na. Staɗ staɗ tèlèba ta va na sulai a tèslri guro.

¹² A Ndo nzi pèc pècèk a mpshè na ma a Job zaʼa, a fena halaʼa. A nʼngots tambaki 14.000, zlugumihi 6.000, zlèhi ncèw cèw 1.000, kɗèhi 1.000.

¹³ A myau wudahi 7 a dalahi 3.

¹⁴ Tsuvomaʼa a mbaha na Jemima, mbegédèʼa Ketsia, mamakaraʼa Keren-Happuc.

¹⁵ Te kokwar tèlèba ta ngots dalahi mbelaʼa ara dalahi Job ɓai. A bab ta a mva ta skwi nʼndi gai a nda kramamhi ta.

¹⁶ Te deɓ nengaʼa Job a nʼnza a nshèffè mvi 140 dai, a nrka wudahi na a wud wudahi na a di na, te verzi fad.

¹⁷ A Job nhala hurnjüfnjüfaʼa, a mʼmets na, mpasla torok.