Job 41 - Ma Zhiklè

¹ Ndo mpiɗékwuda, azɓai. Nslaha a nzlècè a sam na wa?

² Nzlatsa a sam na a mʼmbel na wa? Tʼhwaɗ giɗfèk tèlèba, wa?

³ I woy ngèɗè a gèɗ va nengaʼa mbiaʼa dai, a gèɗ mbambi nengaʼa, a gèɗ ngi na.

⁴ A cè na hutèɗ auda wa? A tèr ri a va zlèʼèn nenga wa?

⁵ Mwinè ma nenga wa? Zlèʼèn nengaʼa heɓheɓaʼa.

⁶ Deɓ nengaʼa nara gambar nɗukoaʼa.

⁷ Lakalavaʼa diɓdiɓaʼa, kozlar a bizhè a pa azɓai

⁸ ngiɗè a gshè ngiɗè, skwi a kezla ta azɓai.

⁹ Aman a tsi wardèshèu, di nengaʼa a si dai ara pats wushèr.

¹⁰ Skwi ntiv vogwa a shkè auda te ma na, ara nèʼèn vogwa.

¹¹ Tʼhtsan nengaʼa vodzok a shkè auda, ara man a ɗüzhè auda te shiɗèf man ta ti skwi te pa.

¹² Nshèffè nengaʼa a vècè ndazli vogwa, vogwa a shkè auda te daʼai nengaʼa.

¹³ Wuɗi te daʼai nengaʼa, zlau a zhè a ma nengaʼa.

¹⁴ Hutèɗ va nengaʼa, ko ka mbercèʼa, ntska, a gidè va azɓai.

¹⁵ Tukwal nengaʼa ara kwa, ara kwa vova.

¹⁶ Aman a slèmbèɗè, ndohi wuɗai ta gi zlauaʼa, zlau a dzakaɓama ta gèɗ.

¹⁷ Tsakwal a slaha zlèʼèn nenga ɓai, ko kafahi gwèsh, ko sulom, ko gambar.

¹⁸ Züdo a sam nengaʼa ara kuza, züdo a sam na ara wof nhuslaʼa.

¹⁹ A hi auda a sam ndo lèkèɗ azbai, kwa te vangava a pèslè a sam na ara kuza ambalai;

²⁰ gèɗ gada a sam na ara pandar; tsakwal man ta kèlèʼa a zlinè azɓai.

²¹ Njèjèr kedam nara cil koloba, a cizl herkeda ara devar burraʼa.

²² A gi aman iyam mbiaʼa a hubètè, a wurr iyam ara mbar te gongong.

²³ A verzi nengaʼa civèɗ nhela, drav iyam a si dai.

²⁴ Skwi ngiɗè ngar nengaʼa azɓai a gèɗ herkeda. Zhiklè a ngau, zlau a keɗa kedam azɓai a mèdèp.

²⁵ Skwi mbiaʼa tèlèba a gi zlau nengaʼa. Bai a géɗ skwi dak mbiaʼa tèlèba.