Job 4 - Ma Zhiklè

Ma Eliphaz nshèlèkuraʼa

¹ A Eliphaz te Théman a hüno a ngaɗa na:

² Ndav ngaya a dza ka. I slaha a i gaɗa ka ɗè? Nslaha a nzi tètè wa?

³ Te va nasa ka ngatsa ta maya a ndohi kumba, a ka va ta wuɗai a ndohi man wuɗi ta azɓai.

⁴ Ka slambaɗda ndo man a woya a nkèlèhai, ka Sala ta sak man ngudɓi te pa.

⁵ Aman antanta, ka te matakwan, ndav a dza ka, skwa a ga ka, ka slaha ɓai.

⁶ Ka gi zlau Zhiklè: ka gshè va a vna azɓi èhèmè? Ko do a civèɗ nzuraʼa: ka zhèr nengaʼa ɓi èhèmè?

⁷ Huro! Ndo man nʼnga mali ɓai a zhi ɗè? Ndohi nzuraʼa ta gedas ta ɗè?

⁸ Skwi man i rka pèc pècèk: Ndohi man ta hèsh malai, a ta hin mphömè, ta da ngècèʼa.

⁹ Bi Zhiklè a da gedas ta. A ndzoan nengaʼa a hel ta ma ara ndombozlor.

¹⁰ Marizhèlè a kuɗai, a bebrè dai, aman zlèʼèn wud ta ta wush ta.

¹¹ Marizhèlè a metsi na a géɗ man a gshè skwi asaɓai, wud marizhèlèhai ta ksar ta.

¹² Aman iyè i tsena ma ngiɗè a metsar, kozlar a nhodkoy ma a haha a zlembaɗ,

¹³ ma man a keɗa ta ndohi a vaɗ te nshunè.

¹⁴ I gudzi tototoʼa, zlau a mpaslay vatasl a va.

¹⁵ Kozlar a nftèmay dai, a nslambaɗday gwots a va.

¹⁶ Ndo a nzlatsa a sam ga, aman i sun ndoʼa ɓai. I rka mèzhèɓ skwi a sam di ga, i tsena daʼai ngiɗè:

¹⁷ Ndo nzuraʼa a sam di Bi Zhiklè a zhi dè? Ndo nlizhɓiaʼa a sam ndo ngau a zhi ɗè?

¹⁸ Ndohi mizlinè nengaʼa, a fi gèɗ a vna azɓai; a golahi Zhiklè nengaʼa, a rka ta ara man ta rzla;

¹⁹ holholaʼa ndohi herkeda, man verzi ta mberfenèk, man ta hanzasl ta ara nfafar.

²⁰ Pats staɗ, ta nde ta a mberfenèk, ta zi ta a mèdèp, ndo a hér ta azɓai.

²¹ Nshèffè ta a ngél na, a ta bazl ta a géɗ man maya ta azɓai.