Job 39 - Ma Zhiklè

¹ Ka ngsko na skwi a marizhèlè cè? Ka va ta skwi nʼndi a wud marizhèlèhi man mi a bazl ta cè?

² Aman ta nghede va te vèvèɗ, a ta pi va tʼhwaɗ vah.

³ Ntsaka na skwi a ngwak wa? Aman wudahi nengaʼa ta kuɗa na Zhiklè, a ta hi auna ta hi auna a ta ngatsa skwi nʼndi ɓai.

⁴ Ka sun pats man ɓok a yi kra cè? Ka sun man mènèɗ a ɗish va cè?

⁵ Ka ngra ki tengaʼa man kra tʼhwaɗ, a ka vu pats nyi tengaʼa cè?

⁶ Ta mènèhai, ta yi kra, nɗish-va klèng.

⁷ Wudahi tengaʼa ta grè a dala, ta dè ta, ta shkè a deɓa a sam mam ta azɓai.

⁸ Mpeda kɗèh a hèshèkèd wa? Mpra wa?

⁹ Man i va na hèshèkèd a sam nʼnzi na, a ɓala a gi na.

¹⁰ A fi gèɗ a nhèzlèwè te kokwar azɓai, a tsena mbèhè ndo mbèlèʼa azɓai.

¹¹ A bizhè a za, a ngècè sam mandi na, a jèjèr sam mɓayaʼa tèlèba.

¹² Kevar a ga ka mizlinè-cè? Ka feda a kudom ngaya a vaɗ cè?

¹³ Ka mana na teɓa a daʼai a mpizhè cè?

¹⁴ Ka fi gèɗ a vna a géɗ man wuɗi na zhi dè, ka feda a mizlinè ngaya cè?

¹⁵ Ka hur a shkè a deɓa a slaha a paka ka dau man ka kuzlo a hedak cè?

¹⁶ Zhèrèu a tsi a kelpasl, gwots nengaʼa mbelembelaʼa, ngiɗè arsa a zhi dè?

¹⁷ A yi slasli na a herkeda, a pats a ndza na a ncüzlko wud na auda;

¹⁸ skwi ngiɗè a nda mbatsaha a sak, skwi dak a nda mbècè a pa, a hérè azɓai.

¹⁹ A fa na gèɗ a wudahi na azɓai. Aman a ngeza ambalai, a na na a pa mè?

²⁰ A géɗ man Bi Zhiklè a mva na maya ɓai, nhér gèɗ na azɓai.

²¹ Aman a hai, a jèkeda plèsh a ndo a deɓaʼa a pa.

²² Ka mva na wuɗi a plèsh cè? Ka mpa na gadzgadzar a deɓa a plèsh cè?

²³ Ka ngu aman a nzevi ara dzari sa cè? Nkudi nengaʼa sa wuɗitpa.

²⁴ A gècèdè sak a vara, a ngreda wuɗi na auda, a hi a var.

²⁵ Zlau a dza na azɓai, a gudzi azɓai, a mindè va na a deɓa a sam tsakwal azɓai.

²⁶ Gambar a kafahi gwèsh a zhèngèzhè ta slhè a deɓ nengaʼa.

²⁷ A gucè azɓai a civèɗ; aman tolom a tsai, a nza na ɓai.

²⁸ Pèc pècèk aman tolom a tsai, a wuffè, var a zhkèha dra, a mbèhè bihai, a lalau var.

²⁹ Vezai a hi a zhiklè a géɗ maya ngaya cè, a wuzhè kelpasl na a civèɗ dukwaɗ?

³⁰ Vezi a hi a zhiklè, a gi gi na te za, a géɗ man ka ngaɗa na dè?

³¹ A gi gi na te za, a mènè a pa, a géɗ za te géɗèʼa, a gi ndakmaʼa.

³² Te pa a kwotè skwi man a woya a ngshèʼa, a ngel di dra.

³³ Wudahi nengaʼa ta si Pombaz. Na zhè a sam skwi mbazlaʼa.

³⁴ Ndo nzi pèc pècèk a ngaɗa na Job zaʼa:

³⁵ Ndo mverslè a woya a ga na ndzoan a Zhiklè Bi-wuɗi dè? Ndo man a woya a ngra na maya ngiɗè a da mbeɗa na a pa!

³⁶ A Job a mʼmbeɗa na a ma a Ndo nzi pèc pècèk:

³⁷ I senka mè, i da mbeɗa ka a pa kè? I pizlè ma ga técèʼa.

³⁸ I goɗ sak staɗ, i goɗ sak cèw, i minè a géɗèʼa asaɓai.