Job 3 - Ma Zhiklè

Job a kuɗai

¹ Te deɓaʼa Job a nhüno ma na, a ndurɗo pats ngècè na a hwaɗ.

² A ngaɗa:

³ Pats nyi ga da zedkoɗauda te va patshai! A vaɗ man mam ga a ngots kra nguraʼa,

⁴ pats nasa nara pats ruva. Bi Zhiklè do ngro nengaʼa ɓai, sam da hel pats nasa ɓai!

⁵ Da nde na a ruva, vani da da na dai, ndodok da pra na zlau a va!

⁶ A vaɗ nasa di da rka te pa ɓai, da ngra na a va mʼmènè tʼhwaɗ mvi ɓai, da ngra na a va mʼmènè tʼhwaɗ kia ɓai!

⁷ Halau, vaɗ nasa da zedkoɗauda te va vaɗhai, ma mwuffè da tsena te pa ɓai!

⁸ Ndohi mphömdè ndo da phomda pats nyi ga, ndohi mpoko na gèɗ auda Léviathan.

⁹ Banti a sam dakwaɗ a pats nasa, da hul sam ɓai, da zhor skwi nhel sam – aman a zhèrè ambalai – da rka pats man a hulko gèɗ ɓai!

¹⁰ A géɗ man a ngela mam ga a pats nasa ɓai, a nʼngheda matakwan haha a sam di ga ɓai.

¹¹ Dara i da metskaɗ ga tʼhwaɗ mam ga. Dara da yakay ɓai!

¹² Ta fakayè a ri èhèmè? Ta tseɗkay wa èhèmè?

¹³ Ar ncay nlèyè auda a gèɗ, a i shèk va, a i sun ma skwaʼa a va ga ɓai.

¹⁴ Ar iyè ara bihi a ndohi kita a géɗ herkeda, man ta rda a gidzavi ta,

¹⁵ man ɓai ara wud bihai man skwi mèshèlè ta a zhè, man gi tengaʼa nʼndha a sulai.

¹⁶ Iyè ara kra man ta mön mʼmènè, ara wudahi man ta rka pats ɓai.

¹⁷ Te pa ndohi ambaɓihiaʼa ta jèkeda ngi ndav. Ndohi man ntulè a keɗ ta, ta shèk va.

¹⁸ Ko ndohi dangai ta nga a pa, ta tsena mbèhè ndo mɓer ta ɓai.

¹⁹ Te pa ko nkèshèʼa, ko mbiaʼa, ta lèmèlèmè; ɓèlè mpraʼa te ri babgi na.

²⁰ Zhiklè a hela na sam a mbelaw ndo èhèmè, a va ta nshèffè a ndohi man ta hér gèɗ èhèmè?

²¹ A tengaʼa man ta woy mʼmetsai, mʼmetsi a shkè azɓai, a ta hè-shèʼa, a fena skwi mèshèlè.

²² Tengaʼa man agassa ta ndikè a gidzavai, ta wuffè holholaʼa a ta gi langlangaʼa.

²³ Ndo man a sun civèɗ na ɓai, man Zhiklè a mɓara na sak a civèɗ.

²⁴ I fu nʼngèy va a skwi nʼndi ga pèc pècèk, kuɗa ga a hi ara iyam.

²⁵ Skwi man i gi zlauaʼa, a gayè. Skwi man i gudzi te riaʼa, a nkalay a va.

²⁶ I nzahi di ɓai, gumi az di ɓai, i saka va di ɓai, a matakwan a ngsay a vaʼa.