Job 22 - Ma Zhiklè

Ma Eliphaz mamakaraʼa

¹ A Eliphaz te Théman a hüno a ngaɗa:

² Ndo a slaha a ntakaha Zhiklè a skwi dè? Ndo man maya na zhè, a takaha géɗ va na.

³ Aman ka ndo nzuraʼa, a Zhiklè Bi-wuɗai a pa mè? Aman ka jèjèr Zhiklè, ka ngècè te pa mè?

⁴ A ga ka ndzoan, a de ka a kita, a géɗ man ka gi zlau Zhiklè de?

⁵ Shèwa ngaya mbiaʼa, mali ngaya ndikè-ma na a zhi ɗè?

⁶ Ka preda kramamhi ngaya a ma ambalai, ka cèma ta maslaka auda a va ndohai a to do adai.

⁷ Ndo man ntulè a keɗaʼa, ka va na iyam nsi ɓai. Ndo man a tiɗè a mai, ka va na movar ɓai.

⁸ Kokwar a ndo wuɗai, a ndo man ambaha a nzi a pa.

⁹ Ka mende ta ngwozi mazhihi a deɓa adai, ka batsama ta ri a wud dikai.

¹⁰ A géɗ nengaʼa gaɗda a tèuda ka a pa, a zlau a ga ka tsam-tsam.

¹¹ Skwi nhél sam a ngwode na a ruva, ka rka di ɓai; iyam a mbizhèma ka gèɗ a pa.

¹² Bi Zhiklè a zhè te géɗèʼa ka ɓi dè? Pu di a bantihai, man ta zhè dra te géɗèʼa!

¹³ Ka hur a ka gaɗa: Zhiklè a sen mè? Kita nengaʼa a da bezkaɗa va vani dè?

¹⁴ Vanai a pizleda pa, a rka di ɓai, a shè-wèlè te giɗfèk.

¹⁵ Ka dè a civèɗ nhalaʼa, man ndohi malihi ta jèjèrèʼa dè?

¹⁶ Man ta bazl ta, a nshèffè tengaʼa nrufa di ɓai, man iyam a hel ta ma.

¹⁷ Tengaʼa man ta gada: Kazla ngay auda a tsagi nga! Zhiklè Bi-wuɗai a slaha a nga nga mè?

¹⁸ Ko Zhiklè a ndha gi ta a mpshè ma; – maya ndohi ambaɓihiaʼa da herday va!

¹⁹ Ndohi nzuraʼa ta rka ta ara man ta kèlèhai, a ta wuffè, a ndo ndzuwoɗaɗaʼa a ngwossaha ta.

²⁰ Mayamhi nga ta gedas ta, njèkèɗi skwi tengaʼa, vogwa a nʼndedama!

²¹ Gar haha, va-tsu gumi a Zhiklè! A ka ngècè mpshè ma!

²² Co man a njè ka, feda ma nengaʼa a ndav ngaya!

²³ Aman ka manda géɗ a hi a ka ngwodko ndav a sam Zhiklè Bi-wuɗai, aman ka dzomko skwi nzura ka ɓai auda te gi ngaya,

²⁴ te deɓaʼa ka da rka guro ara wyak, a guro te Ophir ara kwa te woyam.

²⁵ Te man Zhiklè Bi-wuɗai, nengaʼa skwi mèshèlè ngaya, ma nengaʼa ara sulai.

²⁶ Te deɓaʼa ka da wuffè a géɗ Zhiklè Bi-wuɗai, a ka pi di a Bi Zhiklè.

²⁷ Ka da tsi ri a nengaʼa, a nengaʼa a cè ntsi ri ngaya, ka da gi ara ma ngaya man ka gaɗdahai.

²⁸ Skwi man ka hérè te gèɗ ngaya, a da gi amba, skwi nhél sam a hela civèɗ ngaya.

²⁹ A manda ta gèɗ a hi a ndohi nfi va; ndohi man ta kalda di ta a hai, a takaha ta.

³⁰ Ndo man nʼnga mali ɓai, Zhiklè a porkoɗauda, a mbelaʼa, a géɗ man ri nengaʼa nlizhɓai.