Job 21 - Ma Zhiklè

Job a mbeɗa na a ma Tsophar

¹ Job a hüno a ngaɗa:

² Va-tsena ma ga mbelembela, a kin ngècè skwi mbid kinè te pa!

³ Va-jèkyè, aman i ba i gèɗèʼa, a i ndeva ma ga. Te deɓaʼa va-ngwoss skwi kinè ma!

⁴ I kuɗi a géɗ ndo dè? I ga na ma a gèɗ a ndo ɗè?

⁵ Va-ngwadkay ma, va-rzle kinè, va-peda ri a bazlazlam!

⁶ Aman a vava, aman i hérèʼa, i gi zlau, a gudzedyè te va.

⁷ Ndohi ambaɓihiaʼa ta nzi a nshèf-fè èhèmè? Ta hala ma ba, ta ngècè wuɗi a ma ma.

⁸ Ndohi te verzi ta zhè, ta ngots wud wuda ta a di ta.

⁹ Gi tengaʼa a nzi a gumai, Bi Zhiklè a ndah ta a mènèwèɗ azɓai.

¹⁰ Mari tengaʼa a vèr zlè a ngèc kra, zlè a mèn kra a hi azɓai.

¹¹ Wudahi tengaʼa ta hakaɗauda te gai ara wud tambakihai, a ta tsi mɓarwasl.

¹² Ta sli dimèsh a vata a deɓ ganga a ganzavar, a ta wuffè aman ta vèɗè shingelèk.

¹³ Ta wuffè te pats nshèffè tengaʼa tèlèba, a ta dè a vèvèɗ te gumai.

¹⁴ Ko ta gaɗa na Zhiklè: Kazla ngay auda a tsagi nga! Nga woy civèɗ ngaya ɓai!

¹⁵ Bi Zhiklè Bi-wuɗi wa, aman nga gi mizlinè nengaʼa? A nga tsi ri a nengaʼa, a takaha nga te mè?

¹⁶ Manam te ri tengaʼa ka ɓi dè? Zhiklè a sun maya ndohi ambaɓihiaʼa ɓi dè?

¹⁷ Skwi nhél sam ndohi ambaɓihiaʼa a mbatsaha sak ngama, a matakwan a kala ta a va dè?

¹⁸ Sak ngama man a zede ta ndohi malihi a ndav, a ta gi ara kuza man kozlar a hilèʼa, ara topok dau man ndombozlor a cèʼa?

¹⁹ Bi Zhiklè da kalda ndo nengaʼa a matakwan ɓai, da ga na kita a gèɗ, a shinèʼa,

²⁰ aman a da rka a di na, ara man a gédèshèʼa, man a ngots ndzoan Zhiklè Bi-wuɗai.

²¹ Man a mʼmets na ma, gi nengaʼa az a nengaʼa a pa mè?

²² Ndo a slaha a ngatsa na maya a Zhiklè dè? Nengaʼa a ga ta kita a ndohi mbibihiaʼa.

²³ Ndo ngiɗè a metsi na te mwèl va, te pombai, te gumai,

²⁴ mbeza a gi zai, mar ndzerngazla te va.

²⁵ Ndo ngiɗè a metsi na a nlèyè te ndav, a ngatsa skwi manam ɓai.

²⁶ Cèw cèw ba ta dè vèvèɗ, meturɗi ta de ta pa.

²⁷ I sun nhér gèɗ kinè, nvhè ma kinè man kin vhay ma a gèɗ.

²⁸ Kin gada: Gi ndo mbiaʼa tema? Gi man ndohi nderɗe Zhiklè ta nza a pa tema?

²⁹ Kin dzhaɗ ta ndohi a civèɗ ka ɓi dè? Skwi man ndohi ta sun ta te pa, kin suna.

³⁰ Ndo ambaɓiaʼa a nzai na a pats matakwan, a ga na azɓai. A pats ndzoan a wuffè.

³¹ Nda gada na ma a di wa? Skwi man ambaɓai man a gau, mpulko di man a na auda wa?

³² Aman ta dè a verzi nckondo nengaʼa, ta ɓer gidzavi nengaʼa.

³³ Herkeda kokwar na, ambaha. Ndohi tèlèba ta dè a verzi nengaʼa. A ndohi ta ndev ɓai man ta dè a ma na.

³⁴ Ma man kin bidyè a vna, ma ambalai. Ma man kin mbeɗkay a ma, ma nʼngwèdè ndo!