Job 2 - Ma Zhiklè

Skwa a dza na Job

¹ A pats ngiɗè zaʼa, golahi Bi Zhiklè ta shke a ta zlatsa a sam Ndo nzi pèc pècèk. Madzagi ba a zhè te va tengaʼa.

² A Ndo nzi pèc pècèk a ngaɗa na madzagai: Ka shkè tema? A madzagi a ngaɗa na: I shèwèlè a géɗ herkeda tèlèba, i bizhè a ndev kokwar tèlèba.

³ A Ndo nzi pèc pècèk a ngaɗa na madzagai: Ka rka Job, ɓèl ga, dè? Ndo ngiɗè ngar nengaʼa azɓai tʼherkeda. Ndo man amba zuraʼa, a ngu amba amba tèlèba, a gi zlau Bi Zhiklè, a woy skwi ambaɓiaʼa ɓai. Ko antanta ba a nzi taraʼa genè, te ngi-zuraʼa nengaʼa. Ka pokoy gèɗ auda, aman i da gedassa Job, ambalai.

⁴ Madzagi a mʼmbeɓa na ma a Ndo nzi pèc pècèk: Ta pil ndo te di ndo. Ndo a vi skwi tèlèba man a ngotso a géɗ nshèffè na.

⁵ Gudo ri a ka lama na géɗ va na a gada va na, a i gada ka a vava, a da derde ka.

⁶ A Ndo nzi pèc pècèk a ngaɗa na madzagai: Na haha i va ka a ri a ka, aman jèka na nshèffè na!

⁷ Te deɓaʼa madzagi a mdo auda a sam di Ndo nzi pèc pècèk, a mpa na mblè a va Job, a hüno tʼhwaɗ sak na, a ndè a ndev gèɗ.

⁸ A Job a mco kizlèɗ a nfrè va na a vna, nʼnza te va mèrwèc.

⁹ A ngwoz nengaʼa a ngaɗa na: Ka gshè va a ma Zhiklè ngaya genè dè? Durɗo Bi Zhiklè dakwa, ka metsi ngaya!

¹⁰ A Job a ngaɗa na: Ka gèɗ ma ara ngwozi nrzlaʼa. Aman nga ngots skwi man amba te ri Bi Zhiklè, nga cè skwi ambaɓiaʼa ba azɓi dè? Te skwi haha tèlèba Job a nʼnga mali te ma na ɓai.

Mandalahi Job ta shkè

¹¹ Aman mandalahi Job makar ta tsenkoɗi matakwan haha tèlèba, man a ga na Job, a to do aman ta ga na cèka a ta bidèʼa, staɗ staɗ a mshkè te kokwar na. Nasa Eliphaz te Théman, Bildad te Schuach, a Tsophar te Naama.

¹² Aman ta pu di dra, ta sun Job ɓai, a ta hüno a ta gi wobau a ta kuratseda maslaka tengaʼa aussa, ta tseda lokotor a va,

¹³ a ta nzahi a herkeda a tsagi nengaʼa, mʼmèn tsaraɗ, a pats ba a vaɗ ba. Ta gaɗa ngèɗè a vna ɓai, te man ta rka matakwan nengaʼa mbiaʼa.