Job 19 - Ma Zhiklè

Job a mbeɗa na ma a Bildad

¹ Job a hüno a ngaɗa:

² Kin mbeɗamay ndav, kin da jèkè a ngèmè? Kin gatsyè a hi a ma kinè.

³ Kin derdyè a gi sak kula ma, a kin gay skwi ambaɓiaʼa, a kin gi hori azɓai.

⁴ Aman agassa a vava i gu malai, ma ga.

⁵ Man ɓai kin woy a kin gre gèɗ, a kin ngatsay maya a ndzoan,

⁶ va-suna, Bi Zhiklè a ngwodkay kita a gèɗ, a nengaʼa a mbeɗyè a ɓalai.

⁷ I kuɗi a géɗ man ta gayè wuɗai; aman ndo a mbeɗay a ma azɓai. I béhè, aman ta takahayè; aman ta kalahay ma azɓai.

⁸ Zhiklè a mɓara civèɗ, a i slaha a i dè a ma ma azɓai. Ruva a civèɗ ga.

⁹ A ncèmay nʼnjèl ga, a ncèmay mpèɗè gèɗ auda te gèɗ.

¹⁰ A ndeɗatskayè a sam tèlèba; skwi man i zhèrè dai a ptsomayè auda a ma ara wof.

¹¹ Ndav nengaʼa a dza na worworaʼa a gèɗ ga, a rkayè ara ndo mayam na.

¹² Golahi na ta herdekay va, ta zlatskayè a civèɗ, ta tèuda gi ga a pa.

¹³ Kramamhi ga ta jèkyè, gwoli ga ta kwolyè.

¹⁴ Ndohi gi ga a mbal ta te gi ga, i pca ta a gèɗ.

¹⁵ Ndohi mizlinè ga ta rkayè ara ndo mbrok, ara ndo man verzi na tsaɗ.

¹⁶ I baha na ɓèl ga, a mbeɗkay a ma azbai, ko man i tsi ri kam kam.

¹⁷ Nshèffète ma ga a zhkèha ngwoz ga. Va ga a zhkèha ta kramamhi ga.

¹⁸ Ko wudahi ambalai ta derdyè. Aman i slèmbèɗè, ta ngwossa-hayè.

¹⁹ I ndara ta a mandalahi ga tèlèba; ndohi man i woy ta, ta ngwoday ma a gèɗ.

²⁰ Zluèɗ va ga a hüsl na tʼhwaɗ hutèɗ, a hüsl na auda a deɓ vatasl.

²¹ Kinè mandalahi ga, i da se kinè te va, i da se kinè te va! Ri Bi Zhiklè a nlamayè.

²² Kin parahayè lèmèlèmè ara Zhiklè èhèmè? Zluèɗ va ga man a gedas na a haha a slra kinè a di bi dè?

²³ A woy ta windeda ma ga haha a ɗèlèwèr!

²⁴ A woy ta vècèda a kwa a gada züdo, a sulom, a mèdèp.

²⁵ Iyè i suna, ndo nʼnzakay a deɓa a zhè a nshèffè, nengaʼa ndi-kè-ma ndo a géɗ herkeda.

²⁶ Ko hutèɗ va ga a hüsl na, ko va ga a ngedas na, a di i da rka Bi Zhiklè.

²⁷ A vava i da rkaʼa a di ga, a di ga a da rkaʼa – ndo ngiɗè ka ɓai. Skwi haha a sokoy pombaz auda te va.

²⁸ Aman kin gada: Nga da pèrè a pa nkèkèkè? Nga da vhè ma a géɗèʼa te mè?

²⁹ Va-gu zlau tsakwal a sam kinè! Aman ndzoan a shkè a géɗ ndohi malai, a kin da suna: kita a zhè di genè.