Job 16 - Ma Zhiklè

Job a mbeɗa na ma a Eliphaz

¹ Job a hüno a ngaɗa:

² I tsena ma kumba aranta! Kinè tèlèba, kin ndohi mbid ndo man kin dzakaɓamay gèɗ.

³ Ma kinè ambaɓi haha a da ndivè a ngèmè? Kin tseday gèɗ a hi a ma kinè èhèmè?

⁴ Aman agassa skwa a ga kinè lèmèlèmè ara iyè, ar i nderh ma lèmèlèmè ara kinè, a i gidè gèɗ kwota-kwotaʼa

⁵ ar i va kinè wuɗi a ma genè, a i bid kinè a ma genè.

⁶ Aman ko man i gèɗè, skwi man a dzayè a gahayè dara azɓai. Aman i nzi tètèʼa, a jèkahayè azɓai.

⁷ Antanta a nge-zyè, a dzakaɓamay gèɗ, matakwan tèlèba a ngaìyè a pa.

⁸ A ngu malwuɗi a géɗ ga, va ga ngworaʼa a pinyè.

⁹ Ndzoan a nkalkay a gèɗ, a parahayè; a peɗi zlèʼèn a iyè; ndo mayam ga a mberzhyè a dai.

¹⁰ Ta gay ma a va, ta derɗkayè a hai pècèkèrkèraʼa; ta tèlèba ta humdokoy va a gèɗ.

¹¹ Zhiklè a viyè a ri ndohi nzuraʼa ka ɓai, a kaldyè a ri ndohi ambaɓihiaʼa.

¹² I nza ga, a nengaʼa a nkaldyè a hai, a ngsyè te daʼai, a ntsedyè a hai, a nzlatsedyè a pa, a mɓarkayè.

¹³ Sulom nengaʼa a gi sliu-sliuaʼa a tsagi ga, a mɓorkoɗai, a dzay a hwaɗ, i sia te va azɓai. A ntuwkoy mèdètèr auda tʼhwaɗ.

¹⁴ A ntezyè ruts rats tele va ga, a nkalkay a va ara ndo var.

¹⁵ I feda maslaka sam kuɗa a va, i tseda gèɗ a hai a herkeda.

¹⁶ Di ga nʼndha a kuɗa, a pay a dai.

¹⁷ Ko ri ga a nʼnga mali ɓai, a i tsu ri a ndav nzuraʼa.

¹⁸ Herkeda, ka vsha na herkeda a di a Pombaz ga ɓai, ka ngheda kuɗa ga ɓai!

¹⁹ Ani ba, ndo malwuɗi ga a zhè te zhiklè te géɗèʼa; nengaʼa man a gi malwuɗi a géɗ ga a zhè te géɗèʼa.

²⁰ Mandalahi ga ta livkayè, aman Bi Zhiklè a sun kuɗ ga.

²¹ A woy ndo nʼnzay a deɓa a zhè a sam Bi Zhiklè, ara man ndo a nzi a deɓa a nslamagi na.

²² Njèkè mvi a ma a vata asaɓai. Iyè a civèɗ man i menkada deɓa te pa asaɓai.